Musangelu

MUSANGELU udi ulengeja muyuki, uuvuija mushême. Nansha mudibi bikengela kuikala ne malu mimpe a kuamba, musangelu wa muntu udi wakula ke utu wenza bua bantu bashale ne ntema. Muntu yonso (nansha muikale nganyi) udi mua kulonga mua kuikala ne musangelu.

Leja muudi udiumvua. Yezu wakambila mukaji muena Samariya ne: batendeledi ba Yehowa badi ne bua kumutendelela “mu nyuma ne mu bulelela.” (Yone 4:24) Mutshima udi ne dianyisha ke udi usaka bantu bua kutendelela Nzambi, ne badi kabidi bamutendelela mu diumvuangana ne bulelela budi mu Dîyi diende. Muntu yeye muikale ne dianyisha dia nunku, nebimuenekele mu diakula diende. Neazukile bua kuambila bakuabu malu malengele a Yehowa. Mpala wende, jeste ne dîyi diende nebileje mudiye udiumvua menemene.

Kadi bua tshinganyi imue misangu muntu udi munange Yehowa ne udi witaba malu adiye wamba udi mua kupangila musangelu padiye wakula? Bidi nanku bualu kudilongolola nkayaku ki nkukumbane to. Tshiena-bualu tshiende tshidi ne bua kumubuela ne kumutuila. Tuambe tshilejilu ne: udi ne tshiena-bualu tshidi tshiakula bua tshintu tshia kupikula natshi bantu tshivua Yezu Kristo mufile. Paudi wenza mudimu eu, udi ne bua kuikala ne tshia kuamba ne kuikala ne dianyisha dia bungi kabidi bua mushinga udi nawu tshintu tshia kupikulangana natshi etshi kuudi ne kudi bateleji popamue. Udi ne bua kukeba bua kuikala ne dianyisha bua bualu bulenga budi Yehowa Nzambi ne Kristo Yezu benze ebu. Udi ne bua kuela meji bua kumanya mualua tshintu etshi kufikisha bantu ku masanka a tshiendelele ne mubidi mupuangane pa buloba ebu bukudimuna mparadizu. Nunku ikala mutuishibue mu mutshima webe bua malu aa.

Bible udi wamba ne: Ezela (mufundi ne mulongeshi mu Isalele) “uvua mudifile ne muoyi wende mujima bua kulonga mikenji ya [Yehowa], kuyikumbaja, kuyilongesha bena Izraele.” (Eze. 7:10, MMV) Tshiambilu etshi “uvua mudifile ne muoyi wende mujima” tshidi tshiumvuija ku muaku ku muaku ne: “Uvua mulongolole mutshima wende.” Tuetu petu balongolole malu a kuamba, balongolole kabidi ne mutshima wetu, netuakule malu afumina mu mutshima. Malu menza ne mutshima mujima nenku adi mua kuambuluisha bantu batudi tuambila bua kunanga bulelela ne muoyo umue.

Uvuluke badi bakuteleja. Bua kuikala ne musangelu, wikale mujadike ne: bateleji badi dijinga ne malu audi nawu. Bidi biumvuija ne: paudi udilongolola, mbimpe ukebe malu malenga ne ulombe Nzambi bua akuludike bua malu ebe aa ambuluishe bantu badi bakuteleja. (Mus. 32:8; Mat. 7:7, 8) Ukebe bua kumanya tshidi bantu ne bua kutelejila malu au, mushindu udiwu mua kubambuluisha, ne mushindu uudi mua kuakula bua buobu kumona mushinga wawu.

Ulongolole tshiena-bualu tshiebe too ne paudi umvua ne: mpindieu tshidi tshikusankisha bikole. Ki mbua ne: malu audi nawu adi ne bua kuikala amu mapiamapia to, kadi mushindu uudi wenza muyuki ke udi mua kuikala mupiamupia. Newikale ne musangelu bua kuenza muyuki biumvua ne: newambuluishe bantu bua kulengejabu malanda abu ne Yehowa, kuanyisha malu adiye mulongolole, kujikija ntatu idibu nayi bimpe, anyi bua kuyisha bimpe.

Kadi bidi bishi biwikala ne mudimu wa kubala? Kumanya mua kubala patupu miaku ne tusumbu tua miaku biakane ki nkubala bilenga to. Longa malu au. Biwikala ne bua kubala Bible, wenze makebulula bua wikale mumanye bimpe diumvuija menemene dia malu au. Mona mudi malu aa akuambuluisha wewe ne badi bakuteleja, uabale mpindieu bua kubambuluishawu.

Kadi bua mudimu wa budimi? Konkonona tshiena-bualu tshiebe ne mvese ya kubala. Keba malu adi bantu batamba kuyikila. Bisanji ne bikandakanda bidi biamba tshinyi? Nntatu kayi idi bantu bapeta? Wewe mudipaye ne bionso bidi bikengedibua bua kuambila bantu ne: Dîyi dia Nzambi didi dileja mua kujikija malu makole adi abakuata ne kabidi umvua mioyo ya munda ikuzuka bua kubambilawu, musangelu neudiluile.

Enza muyuki ne bulenga bua kuleja musangelu. Musangelu utu umuenekela ku muyuki muenza ne bulenga. Udi mua kumuenekela kabidi ku mpala webe. Bidi ne tshia kumvuika ne: udi mutuishibue, kadi kabiyi bia lutambishi to.

Ikala ne nkatshinkatshi. Bamue badi mua kuikala ne musangelu pa kalu ne kalu. Kadi bidi bikengela kubaleja ne: padi musangelu upita, bantu nebabatangile buobu pamutu pa kutelejabu malu adibu bamba. Bua badi ne buôwa, bidi bikengela kubakolesha mu mikolo bua kuakulabu ne musangelu.

Musangelu utu wambulukilangana. Wewe utangila bantu ne wakula ne musangelu, bantu nebaupete pabu. Tshilejilu, bu muvua Apolo wakula ne musangelu, bakamba ne: uvua ngamba-malu wa dilambu. Wewe muwule tente ne nyuma wa Nzambi, muyuki webe muenza ne musangelu neusake bateleji ku dienza tshiudi wamba.​—Bien. 18:24, 25; Lomo 12:11.

Musangelu muakanyine ngenyi. Musangelu webe kaupitshipitshi bungi mu muyuki mujima to; bua tshianana bateleji nebatshioke kumpala kua dîba bapanga mushindu wa kukulonda. Kabakuteleja malu ebe kampanda avua ne bua kubakankamija to. Ke bua tshinyi ngenyi ya muyuki webe yonso kayena ne tshia kuikala mumue ku ntuadijilu ne ku ndekelu to. Kadi ku lukuabu luseke, kuenza muyuki mutalalangane nkubi. Wewe musungule malu a muyuki webe ne lubatshi, neakusankishe menemene. Tshidibi imue ngenyi neyilombe musangelu wa bungi kupita mikuabu. Kadi uyibuejakajangane bimpe mu muyuki.

Bidi bikengela nangananga kuamba malu manene ne musangelu. Muyuki udi ne bua kuikala ne ngenyi minene, muaba wa wewe kuimanyina. Malu manene adi ne tshia kuikala malu adi asaka bantu ku dienza bualu kampanda. Wewe mumane kutuisha bantu, mpindieu udi ne bua kubasonsola, kubaleja bulenga bua kutumikila malu audi muambe. Musangelu webe ke wenza ne: malu audi wamba afike ku dilenga mitshima yabu. Musangelu webe kawikadi wa ku makolela to. Kudi ne bua kuikala tshintu kampanda tshidi tshienza bua ne: wenze muyuki webe ne musangelu. Mmalu atudi nawu.