Mandamuna ku nkonko yenu

▪ Mmunyi munudi mua kulombola bisangilu bia mudimu wa buambi?

Tshipatshila tshia tshisangilu tshia mudimu wa buambi ntshia kutuambuluisha bua kushala ne lungenyi luetu luonso lutuma anu ku mudimu utualua kuenza pajika tshisangilu etshi, mmumue ne: mudimu wa buambi. Bua nanku, muntu udi ulombola tshisangilu etshi udi ne bua kuikala mudilongolole bimpe ne mukumbane bua kuambila bantu ngenyi mimpe idi ikankamija, ngenyi misunguluke ne miakanyine ya kuenza nayi mudimu dituku adi. Mvese wa dituku yeye wakula bua mudimu wa buambi, apu nudi mua kumubala ne kumumvuijangana bimpe mu mêyi makese patupu. Nansha nanku, tshisangilu etshi tshidi ne bua kushindamena nangananga pa mudimu wa buambi wenzeka dituku adi, bua kumona mua kuambuluisha bonso bapatuka mu buambi bua bikale badilongolole bimpe bua kukumbaja mudimu wa dituku adi biakane.​—2 Tim. 4:5.

Nudi mua kuyikila bua malu adi makanyine kuenza nawu mudimu adi mu Mudimu wetu wa Bukalenge bua bamanyishi bonso bikale bamanye bimpe mikanda ya kufila kudi bantu ngondo au ne mushindu wa kuyifila. Pikala dituku adi dikale dia difila bibejibeji, nudi mua kuenza dinaya dia tshilejilu dimanyine pa ngenyi idi mu tshiena-bualu tshia ne: “Mushindu wa kufila bibejibeji.” Bua matuku makuabu, nudi mua kuangata mbuelelu umue ta ibidi idi miakanyine bua teritware wenu mu kakanda ka Mua kutuadija ne kutungunuka ne mayuki (peshi mu mukanda wa Comment raisonner). Nudi nansha mua kulejangana peshi kuenza dinaya dia tshilejilu bua kuleja mushindu wa kuenza mudimu ne Bible ku nzubu ne ku nzubu, tshia kuenza padi malu atu akosesha mayuki ajuka, mushindu wa kulomba muntu bua nutuadije kulonga nende Bible peshi tshia kuenza bua kupinganyina muntu bua kukolesha dijinga dia kumanya bia bungi divuaye muleje.

Tshisangilu tshia mudimu wa buambi katshiena ne bua kupitshisha minite 10 anyi 15, bionso ebi kusangishamu ne diabanya dia bantu, difila dia teritware ne disambila. Padi tshisangilu etshi tshijika, muntu yonso udiku udi ne bua kumanya muntu udiye ne bua kupatuka nende mu buambi, kumanya kabidi ne muaba wayabu kuyishila, pashishe badi ne bua kuya pa lukasa mu teritware udibu babapeshe kabayi bajingakana. Bu mudi tshisangilu etshi tshiangata minite mikese patupu, bidi bikengela bua bantu bonso bafike pa dîba. Padi tshisangilu tshia mudimu wa buambi tshienzeka kunyima kua tshisangilu kampanda tshia tshisumbu, bu mudi Dilonga dia Tshibumba tshia Nsentedi, tshidi ne bua kuikala tshîpi menemene. Kabiena bikengela kukonkonona mvese wa dituku to, bualu nudi nufuma ku dikonkonona makuabu malu a mu Bible.

Muanetu wa balume mukumbane ukadi mutambule ke unudi ne bua kudianjila kusungula kumpala kua dîba bua kulombolaye tshisangilu tshia nunku. Bikalaku dituku adi kakuyi muanetu wa balume udi mua kulombola tshisangilu mu dituku kampanda, bakulu badi nansha mua kusungula muanetu wa bakaji mutambule udi mua kulombola tshisangilu etshi pa muaba wa muanetu wa balume. Dîba adi muanetu wa bakaji udi ne bua kushala musombe ne kukonkonona mvese wa dituku anyi kuakula bua lungenyi lukuabu ludi lumvuangana ne malu a mudimu wa buambi. Udi ne bua kuakula amu bikese ne kêna ne bua kupua muoyo bua kusuika tshitambala ku mutu.

Bisangilu bia mudimu wa buambi mmishindu milenga milongolola bua kutukankamija ne kutuakaja bimpe bua tuetu kumona mua kuikala tupatuka mu buambi. Bua tshisangilu etshi kuambuluishatshi bantu bonso, udi utshilombola udi ne bua kudianjila kudilongolola bimpe.