‘Mulume wa diakalenga muena mukaji mulenga’

KU MISANGU, bamue bantu batu bashiminyina ku bukole Bantemu ba Yehowa ne: batu bashipa mabaka. Kadi mêku a bungi mimpe adi munda muawu ne muena dibaka anu umue muikale Ntemu wa Yehowa mmaleje ne: kabiena nanku to. Diteleja ne ditumikila mibelu ya mu Bible mu dîku didi dilela mabaka a disanka, anu bu mudibi bileja mu mukanda udi ulonda eu mupatula mu tshikandakanda kampanda tshia mu France.

“Kukadi mpindieu bidimu bu 28, ndi ne diakalenga dia kuikala ne mukaji mulenga udi Ntemu wa Yehowa. Mmukoleshe bana banyi batanu, munkatshi muabu mudi babidi badi kabayi bende, ne ditabalela dia muomumue ne dinanga dia bungi. Ndi mpindieu ndombola kumpanyi udi ne bena mudimu 45 ne ndi mua kunujadikila se: mukajanyi mmungambuluishe bikole bua kuenza mudimu wanyi bimpe. Ke bua tshinyi pamvua mumone bakula mu tshikandakanda tshianyi tshia pa tshibidilu bua Bantemu ba Yehowa bu badi njiwu mu tshitupa tshia Lot-et-Garonne, ngakangata dipangadika dia kunujadikila bulelela.”

Mukanda au udi wamba kabidi ne: “Kabatu banua makanya anyi bakuatshika maluvu to. Mbualu bua njiwu anyi? Batu bena Kristo badi balama lutulu ne kabayi benzeja muntu nansha umue ku bukole bua kutumikilaye mikenji itubu balonda. Kabidi, batu tshilejilu tshimpe mu malu a bungi. . . . Kanuena mua kubasangana mu bilumbu bia buivi bua makuta anyi dienda mushinga ne bintu bia lulengu to. Kabatu baditshipa bua kushala bajike, ne ndi mua kunujadikila ne: batu anu bu mudi bantu bonso. . . .

“Nudi pamu’apa mua kunkonka ne: Kadi bua tshinyi wewe kuena Ntemu wa Yehowa? Bualu bidi bikengela kuikala ne ditabuja dia bena Kristo ne bikadilu bia tshishiki, ne ki mbipepele bua bantu bonso kuikala nabi nansha.”

Newanyishe dikumbula anyi?

Nansha mu bulongolodi ebu busaluke, kudi mushindu wa kupeta disanka ku diambuluisha dia dimanya dijalame didi Bible ufila pa bidi bitangila Nzambi, Bukalenge buende ne pa dilongolola diende dia dikema didiye mupangadije bua bukua-bantu. Biwikala ujinga kupeta mamanyisha a pa mutu, peshi ujinga bua muntu kampanda alua kukutangila bua kulonga nebe Bible kabiyi kufuta mfranga, suaku webeje Bantemu ba Yehowa ba muaba uudi musombele anyi kudi Association “Les Témoins de Jéhovah”, B.P. 634 Limete, Kinshasa, République démocratique du Congo.