Tudi ne bua kunemeka bukokeshi bua Yehowa

Ngikadilu kayi udi ukuvuila mu mutu padibu batela mêna aa a kale: Kola, Datana ne Abilama? Buntomboji! Bavua batombokela tshinyi? Bukokeshi bujadika kudi Nzambi. Malu adi atangila nsombelu wabu mubi mmalonda mu bule ne mu butshiama mu Nomba nshapita wa 16, ne mmakula kabidi mu tshiena-bualu tshia: “Tukokelayi bukokeshi bua Nzambi ne lulamatu” mu Tshibumba tshia Nsentedi tshia mu dia 1 Tshimungu 2002. Nenumone ne: kubala malu aa ne pashishe kubandila mushindu udibu baaleja udi welesha meji mu bande wa video wa Respectons l’autorité de Jéhovah kudi ne dikuatshisha kunudi. Neumone dikokangana divua pankatshi pa bana ba lulamatu ba Kola ne tatuabu uvua ntomboji, ukavua uluisha Mfumu mutambe bunene wa bifukibua bionso. (Nom. 26:9-11) Drama eu udi uleja malu menzeke, udi ne bua kutupesha lungenyi lua kushala ne lulamatu lukole kudi Yehowa.

Paudi ubandila bande wa video eu, keba mua kumona muvuabi bimueneka patoke ne: Kola ne dingumba diende bavua bapangile ku diteta dia lulamatu mu malu asambombo aa: (1) Mmushindu kayi uvuabu bapange mua kunemeka bukokeshi bujadika kudi Nzambi? (2) Mmunyi muvuabu balekele lutambishi, diambu ne mukawu bibakokesha? (3) Mmunyi muvuabu bimanyine anu pa bilema bia bantu bavua Yehowa mupesha bukokeshi? (4) Ndungenyi kayi lua kudiabakena luvuabu nalu? (5) Bua tshinyi midimu ya pa buayi ivuabu nayi kayitshivua ibasankisha kabidi? (6) Munyi muvua lulamatu luabu kudi balunda babu ne bena mu mêku abu lukole lupita lulamatu luabu kudi Nzambi?

Tuelayi meji mushindu udi malongesha atudi bapeta mu drama eu wa mu Bible atangila mmuenenu wetu wa bukokeshi bujadika kudi Nzambi lelu: (1) Mmunyi mutudi ne bua kumona dipangadika kampanda dia bakulu munda mua tshisumbu ne bua tshinyi? (2) Mmunyi mutudi mua kumbusha ngenyi mibi yonso idi munda muetu? (3) Ntshinyi tshitudi ne bua kuenza bua bilema bia aba badibu bapesha bujitu bua kutulombola? (4) Ntshinyi tshitudi ne bua kuenza tuetu babange kupeta lungenyi lua didiabakena mu muoyo wetu? (5) Mmunyi mutudi ne bua kumona mudimu kayi wonso wa mu nyuma udibu batupesha bua kuenza? (6) Nganyi udi kayi ne bua kuangata muaba wa lulamatu luetu kudi Nzambi, ne ndîba kayi didi nsombelu eu mua kulua diteta dikole kutudi?

Nebikale bimpe bia dikema bua se: nubandile kabidi bande wa video eu panyima pa nuenu bamane kuyikidilangana mu tshisumbu pa malu aa. Dibandila edi dikuambuluishe bua kulama bikole mu lungenyi bua tshinyi tudi ne bua kunemeka bukokeshi bua Yehowa misangu yonso!​—Mus. 18:25; 37:28.