Mua kutuadija kuyukila bimpe ne bantu

1. Mmunyi mutudi ne bua kuangata mishindu ya difila mikanda idibu batupesha?

¹ Pa tshibidilu batu bapatula mishindu ya kufila bibejibeji bietu ne mikanda mikuabu mu Mudimu wetu wa Bukalenge. Patudi mu buambi, katuena mua kuambulula mishindu eyi ya difila mikanda yetu anu mudiyi mifunda amu to. Mbayipatule bua kutupesha lungenyi pa tshitudi mua kuamba. Netuenze nayi mudimu bimpe, bu tuetu mua kuakula mu etu mêyi. Diakula mu etu mêyi bu pa tshibidilu didi diambuluisha muntu utudi tuyukila nende bua kudiumvuaye bimpe ne didi dileja bulelela bua bitudi tuamba ne muoyo mujima.​—2 Kol. 2:17; 1 Tes. 1:5.

2. Bua tshinyi tudi ne bua kuangata ne mushinga bilele bia muaba utudi, patudi tudilongolola bua kuyisha?

² Akaja mushindu webe wa kuyukila ne bantu: Bilele bia muabu utudi bidi ne mushinga wa bungi pa mushindu utudi tutuadija kuyukila ne bantu bua kuyisha lumu luimpe. Nutuku nuanji kuelangana muoyo ne kusambangana ne muntu kumpala kua kutuadija kuyukila anyi? Peshi bantu ba mu teritware wenu batu basue bua nubaleje diakamue tshinudi bendele? Nsombelu eu utu ushilangana bilondeshile muaba ne muaba ne imue misangu bilondeshile muntu ne muntu. Bidi bikengela kuikala kabidi ne busunguluji mu diela dietu dia nkonko. Nkonko idi imueneka bu mikumbane mu imue miaba, mu mikuabu idi mua kutondesha bantu nsombelu. Ke bua tshinyi, tudi ne bua kuikala ne busunguluji ne kulongolola mushindu wetu wa kutuadija kuyukila ne bantu bilondeshile bilele bidibu banyishe muaba utudi.

3. Bua tshinyi tudi ne bua kutangila nkoleshilu ne ngelelu wa meji wa bantu batudi tuyukila nabu?

³ Kabidi, tudi ne bua kutangila nkoleshilu ne ngelelu wa meji wa bantu ba mu teritware wetu patudi tudilongolola bua mudimu wa buambi. Tshilejilu, udi mua kuyukila pamuapa ne muena Katolike wa dilambu pa Matayo 6:9, 10 bishilangane ne muudi mua kuyukila ne muntu utu kayi mumanye disambila dia “Tatu wetu.” Tuetu tudianjila kudilongolola misangu yonso netupete mushindu wa kuakaja mushindu wetu wa kutuadija kuyukila ne bantu bua se: malu atudi tuamba asankishe bantu batudi tupetangana nabu mu buambi.​—1 Kol. 9:20-23.

4. Bua tshinyi didilongolola bimpe didi ne mushinga wa bungi?

⁴ Nansha patudi tuenza mudimu ne mushindu muimpe mumane kufunda bua kuyukila ne bantu, didilongolola bimpe didi anu ne mushinga. Tudi ne bua kubala ne ntema tshiena-bualu anyi nshapita wa mukanda utudi tusua kufila ne kukeba malu adi mua kusankisha bantu. Pashishe kubueja mishindu ya kuyukila ne bantu eyi mu diyuki dietu. Anu patudi tuibidilangana ne malu mimpe adi mu mikanda yetu, ke patudi mua kupeta mushindu wa kuyifila ku bantu ne disanka.

5. Bua tshinyi tudi ne bua kulongolola mushindu mukuabu wa kutuadija kuyukila ne bantu ne mmunyi mutudi mua kuenza nanku?

⁵ Mishindu mikuabu ya kutuadija: Batuku batuelela mukenji bua kuenza mudimu anu ne mishindu mimane kufunda bua kutuadija kuyukila ne bantu anyi? Tòo. Bu binuikala ne mushindu mukuabu muimpe wa kutuadija kuyukila ne bantu, anyi mvese kampanda, enzayi nende mudimu. Nangananga ne bibejibeji, nudi mua kukeba mishindu mivule ya kuleja biena-bualu bikuabu bidi munda bidi mua kusankisha bantu ba mu teritware wenu. Panudi nuenza manaya a tshilejilu mu Tshisangilu tshia Mudimu, nudi mua kuenza dinaya didi dileja mushindu mukuabu udi upatula bipeta bimpe mu teritware wenu. Pa kuenza mushindu’eu, yonso wa kutudi neikale ne mushindu wa kuyisha bimpe lumu luimpe.

Mushindu wa kufila bibejibeji

(Nuangate bia Mfualansa bikala bia Tshiluba kabiyiku)

Tshibumba tshia Nsentedi 15 Tshio.

“Tuetu bonso tudi dijinga ne nsombelu muimpe buetu ne bua bana betu kabidi, kadi bantu bavule badi bela meji ne: mbibakolele bua kupeta nsombelu bu nunku. Udi wela meji ne: tudiku ne bukokeshi pa matuku etu atshilualua anyi? [Lekela muntu andamune.] Tshibejibeji etshi tshidi tshileja ku diambuluisha dia malu a mu Bible ne: tudi ne bukokeshi, kadi matuku etu atshilualua adi alondeshila malu atudi tusungula bua kuenza katshia ku mpindieu.” Bala Dutelonome 30:19.

Réveillez-vous! 22 Tshio.

“Patudi tusama, tutu tuanyisha doktere udi wangata ne mushinga mushindu utudi tudiumvua. Kadi udiku mumone ne: babedi ba bungi batu babenga kuangata ne mushinga ngenyi ya ba-doktere babu anyi? [Lekela muntu andamune.] Tshibejibeji etshi tshidi tshileja ntatu itu ba-minganga bapeta ne muikala matuku etu atshilualua bua malu a manga.” Bala Yeshaya 33:24.

Tshibumba tshia Nsentedi 1 Lui.

“Kabienaku bitonda bua mudi bantu ba bungi lelu’eu bakenga bua malu a tshikisu anyi? [Tela bualu kampanda budi bumanyike muaba unudi, ne lekela muntu andamune.] Tshibejibeji etshi tshidi tshileja mushindu udi Nzambi umona muoyo wa muntu. Tshidi kabidi tshiumvuija mualua Nzambi kutumbushila makenga onso adiku lelu.” Bala Musambu 72:12-14.

Réveillez-vous! 8 Lui.

“Lutatu lunene lutudi nalu lelu’eu ndua mua kutshimuna tunyinganyinga. Udi umona pebe nanku anyi? [Lekela muntu andamune.] Bulelela, Bible ukavua mudianjile kumanyisha bualu ebu. [Bala 2 Timote 3:1.] Tshibejibeji etshi tshidi tshileja mishindu mimpe idi mua kukuambuluisha ne dîku diebe bua kutshimuna tunyinganyinga.”