Tshitudi tulongela kudi muendeshi wa mazuwa a mâyi

MUNTU udi wendesha nkayende mazuwa mu mâyi manene udi mua kupungila bikole. Dipungi didi mua kufikisha muendeshi wa mazuwa ku njiwu, bualu udi mua kubanga kuenza bilema ne kuangata mapangadika mabi. Bua malu aa, muendeshi wa mazuwa utu wanyisha bikole mudimu wa longo lua mazuwa. Longo lutu lumuambuluisha bua kuanjiku kuikisha ne kupetulula makanda padi mazuwa mashale mimane pa mâyi kaayi mua kuya muaba wa njiwu. Kabidi, longo lutu lutangija tshia-mutu tshia mazuwa kudi tshipepele ne mavuala bifumina, ne ludi luambuluisha mazuwa bua kushala mashindame anu muaba udiwu.

Anu mutu bendeshi ba mazuwa bapeta ntatu kabukabu mu mâyi, misangu yonso bena Kristo batu bapeta ntatu ya kudi bena panu ne ke bua tshinyi batu dijinga ne dikisha. Umue musangu Yezu wakambila balongi bende ne: ‘Luayi bienu nkayenu mu muaba wa patupu, nuikishe tshitupa.’ (Mâko 6:31) Lelu, bamue bantu batu bangata mbingu mikese bua kuenza luendu anyi batu baya kuendakana mu matuku a ku ndekelu kua lumingu ne dîku diabu. Malu aa adi mua kukankamija muntu ne kumupeshilula bukole. Kadi mmunyi mutudi mua kujadika ne: tudi bimpe mu nyuma mu bikondo bia ntatu ya nunku? Ntshinyi tshidi mua kuikala bu luetu longo lua mu nyuma, tshiatuambuluisha bua katupueki ne mâyi ne bua kushala bashindame?

Yehowa mmutupeshe tshintu tshidi mua kutuambuluisha. Tshintu atshi m’Bible udi muikale Diyi diende Dinsantu. Tuetu tumubala dituku dionso, tudi mua kushala pabuipi ne Yehowa ne kubenga kumbuka kudiye. Mibelu idimu idi mua kutuvuija bashindame ne idi kabidi mua kutupesha mushindu wa kukandamena mateyi a Satana ne a bukua-panu buende. Dilonda ndongamu wa dibala dia Bible pa tshibidilu, nansha tuetu katuyi bamulonde menemene mutudi bafunde, didi mua kuikala bu luetu longo lua mu nyuma.​—Yoshua 1:7, 8; Kolosai 2:7.

Mufundi wa misambu udi utuvuluija ne: “disanka didi kudi muntu” udi ne ‘disanka mu mikenji ya Yehowa, ne mu mikenji yende mudiye welangana meji munya ne butuku.’ (Musambu 1:1, 2) Kubala Dîyi dia Nzambi dituku dionso nekututuadile “disanka” dia kuikala bakankamane ne kupetulula makanda a mu nyuma, badilongolole bua kutungunuka ne lubilu luetu lua bena Kristo.