Udi muvuluke anyi?

Dibala dia nimero ya ndekelu ya Tshibumba tshia Nsentedi divua dikusankishe anyi? Nanku anji tangila ni udi mua kuandamuna nkonko idi ilonda eyi:

• Bua tshinyi bavua basungule dituku dia 25 Tshisua-munene bu dituku dia diledibua dia Yezu?

Dîyi dia Nzambi kadiena dileja dituku diakaledibua Yezu to. Umue mukanda udi wamba ne: “Dituku dia 25 Tshisua-munene didibu bateke bua kusekelela Nowele ki ndipetela ku dibala dia bidimu dienza bimpe bua kufika too ne ku diledibua dia Yezu nansha, kadi mbadipetele mu mafesto avuabu benza mu Lomo tshikondo tshivua butuku bulua bule (solstice d’hiver).” (Enciclopedia Hispánica) Bena Lomo ba kale bavua benza mafesto, batshionkomoka ne bapeshangana bintu bua kusekelela dîba pavuadi dibanda mulu mu muvu wa mashika.​—15/12, dibeji 4-5.

• Mukanda wa Bienzedi 7:59 udi usua kuamba ne: Stefano wakasambila Yezu anyi?

Tòo. Bible udi wamba ne: tudi ne bua kusambila anu Yehowa Nzambi nkayende. Kadi bu muvua Stefano mumone Yezu mu tshikena-kumona, wakadimona muikale ne mushindu wa kumuela dîyi buludi ne: ‘Mukalenge Yezu, angata muoyo wanyi.’ Stefano uvua mumanye bimpe ne: bavua bapeshe Yezu bukokeshi bua kubisha bafue. (Yone 5:27-29) Ke bualu kayi wakamulomba bua kulama muoyo wende anyi bukole bua muoyo too ne dituku divuaye ne bua kulua kumubisha ku lufu.​—1/1, dibeji 31.

• Mmunyi mutudi bamanye ne: ki mbafundile muntu malu amuenzekela matuku atshilualua?

Nzambi utu mupeshe muntu budikadidi, katu mumufundile tshiamufikila to. Yehowa kavua mua kuikala ne dinanga ne buakane bu biobi bikale ne: mmumane kujadika nsombelu utudi ne bua kuikala nende tuetu katuyi banji kuledibua, ne pashishe ulua kutulumbuluisha bua malu atudi tuenza. (Dutelonome 32:4; 1 Yone 4:8).​—15/1, dibeji 4-5.

• Bua tshinyi kuamba ne: bishima kabiena mua kuenzeka nkupanga budipuekeshi?

Bamue bena meji badi bitaba ne: kabena ne dimanya dionso dia bintu bia dikema bidi mu bifukibua bia Nzambi to, badi bamba ne: kabena kabidi mua kuamba ne dishindika dionso ne: kudi bualu budi kabuyi mua kuenzeka. Batu bitaba bua kuamba ne: bualu kampanda kabuena bufuane kuenzeka to.​—15/2, dibeji 5-6.

• Bua tshinyi Mulumbuluishi Shimishona wakalomba baledi bende bua bamukebele mukaji muena Peleshete? (Balumbuluishi 14:2)

Mikenji ya Nzambi ivua ikandika disela mukaji wa munkatshi mua batendeledi ba nzambi ya dishima. (Ekesode 34:11-16) Kadi mukaji muena Peleshete uvua ‘utamba kusankisha’ Shimishona. Shimishona “wakadi ukeba bualu kudi bena Peleshete.” Uvua munange mukaji au bua tshipatshila atshi. Nzambi wakakuatshisha Shimishona ne nyuma wende. (Balumbuluishi 13:25; 14:3, 4, 6).​—15/3, dibeji 26.

• Muena Kristo udi mua kupesha muena mbulamatadi mfranga peshi tshintu bua mudimu wende anyi?

Ki mbimpe kukosa muntu udi ne muanzu mishiku anyi kumupesha tshintu bua kalondi tshidi mikenji yamba, bua abuikile mêsu pa tshilema peshi bua atuenzele bualu bua pa buabu to. Kadi ki mbibi bua kupesha muena mbulamatadi makuta anyi tshintu padiye wenza mudimu wende peshi bua atuenzele bualu budi mikenji yanyisha nansha bua kabatuenzedi bualu kampanda budi kabuyi buakanyine.​—1/4, dibeji 29.