BIBLE udi wenza mudimu misangu mipite pa 70 ne muaku wa tshiena-Ebelu sheʼohlʹ ne wa tshiena-Greke haiʹdes udi mumue nawu. Miaku ibidi eyi idi itangila lufu. Imue Bible idi iyikudimuna ne: “ku bajangi,” “kandondu ka bafue,” “inferno,” “lukita,” “tshina” anyi “Muaba wa Bafue.” Kadi miakulu ya bungi kayitu ne miaku idi yamba tshidi sheʼohlʹ ne haiʹdes biumvuija menemene to. Miaku eyi itu yumvuija tshinyi menemene? Tumonayi mpindieu mudibu benza nayi mudimu mu mvese ya bungi.

Muambi 9:10 udi wamba ne: ‘Kakuena kulongolola kua malu, kakuena lungenyi anyi meji ku Muaba wa Bafue kuudi uya.’ Mvese eu udi usua kuamba ne: Muaba wa Bafue ndukita lutubu bajiika muntu anyi? Tòo, bualu patu Bible wakula bua lukita lutubu bajiika muntu, katu wenza mudimu ne sheʼohlʹ anyi ne haiʹdes (Muaba wa Bafue). (Genese 23:7-9; Matayo 28:1) Bible katu kabidi wenza mudimu ne muaku sheʼohlʹ (“Muaba wa Bafue”) bua lukita ludibu bajiika bena dîku dimue bonso anyi bantu ba bungi musangu umue to.​—Genese 49:30, 31.

Kadi “Muaba wa Bafue” ntshinyi menemene? Bible udi wamba ne: “Muaba wa Bafue” mmuaba munene bikole kupita lukita lunene lutubu bela bitalu bia bungi musangu umue. Tshilejilu, Yeshaya 5:14 udi wamba ne: Muaba wa Bafue udi ‘udiundisha kumvua kuawu kua nzala, udi ubulula mukana muawu kamuyi ne nshikidilu.’ Nansha mudi Muaba wa Bafue mumine bantu bungi kabuyi kubala, udi amu ne nzala ya kudia bakuabu. (Nsumuinu 30:15, 16) Nkita itu yangata anu bantu bungi kampanda, kadi ‘Muaba wa Bafue kawena uwula to.’ (Nsumuinu 27:20) Muaba wa Bafue kautu uwula to, ne kautu ne mikalu nansha. Nunku, sheʼohlʹ anyi haiʹdes (Muaba wa Bafue) ki mmuaba wetu wa bushuwa eu to, kadi ndukita lua bukua-bantu, mmuaba wa mu tshimfuanyi utu bantu ba bungi balala tulu mu lufu.

Tshidi Bible ulongesha bua dibika dia bafue tshidi tshituambuluisha bua kumvua kabidi bimpe tshidi sheʼohlʹ ne haiʹdes (“Muaba wa Bafue”). Padi Bible wakula bua Muaba wa Bafue, udi wakula kabidi bua lufu lua aba bikala mua kubishibua.a (Yobo 14:13; Bienzedi 2:31; Buakabuluibua 20:13) Dîyi dia Nzambi didi diamba kabidi ne: mu Muaba wa Bafue mudi bantu bavua benzele Yehowa mudimu ne ba bungi bavua kabayi bamuenzelawu. (Genese 37:35; Musambu 55:15) Nunku Bible udi ulongesha ne: ‘dibika dia bafue nedikaleku, ne dia bakane ne dia babi.’​—Bienzedi 24:15.

MMUNYI muutu umona Dituku dia Dilumbuluisha? Ba bungi batu bela meji ne: bantu miliyare ne miliyare nebapite kumpala kua nkuasa wa bumfumu wa Nzambi, ne nebabalumbuluishe muntu umue ku umue. Bamue nebaye mu diulu ne bakuabu nebakengeshibue bua kashidi. Kadi Bible yeye udi umvuija dituku edi mu mushindu mushilangane bikole. Kêna udileja bu dituku dia kutshina to, kadi bu tshikondo tshia masanka ne dilengeja dia malu.

Mupostolo Yone udi umvuija Dituku dia Dilumbuluisha mu Buakabuluibua 20:11, 12 nunku: ‘Ngakatangila nkuasa wa butumbi munene mutoke, ne wakadi ushikamapu, wakanyemabu kudi buloba ne diulu kumpala kuende, ne kabakabisangena muaba kabidi. Ngakatangila bafue, banene ne bakese, bimane kumpala kua nkuasa wa butumbi; ne mikanda yakabuluibua, mukanda mukuabu wakabuluibua kabidi, udi wa muoyo; bakalumbuluisha bafue ku malu akadi mafunda mu mukanda, bu muakadi bienzedi biabu.’ Nnganyi udi ulumbuluisha mu mvese eu?

Yehowa Nzambi ke Mulumbuluishi munene wa bantu. Kadi udi upesha muntu mukuabu mudimu wa kulumbuluisha eu. Bilondeshile Bienzedi 17:31, mupostolo Paulo wakamba ne: Nzambi ‘wakasungula dituku didiye ulumbuluisha ba pa buloba mu buakane kudi muntu wakasungulaye.’ Yezu Kristo ke Mulumbuluishi udi Nzambi musungule. (Yone 5:22) Kadi ndîba kayi didi Dituku dia Dilumbuluisha dituadija? Nedinenge mutantshi bule kayi?

Mukanda wa Buakabuluibua udi uleja ne: Dituku dia Dilumbuluisha nedituadije panyima pa mvita ya Armagedone, pikalabu bamane kubutula bulongolodi bua Satana.a (Buakabuluibua 16:14, 16; 19:19–20:3) Kunyima kua Armagedone, nebele Satana ne bademon bende mu dijimba bua bidimu tshinunu. Mu tshikondo atshi, bantu 144 000 nebikale balumbuluishi ne ‘nebakokeshe ne Kristo bidimu tshinunu.’ (Buakabuluibua 14:1-3; 20:1-4; Lomo 8:17) Dituku dia Dilumbuluisha ki mbualu kampanda bua lukasa lukasa budi bunenga anu mêba 24 patupu to. Nedinenge bidimu tshinunu.

Munkatshi mua bidimu tshinunu abi, Yezu Kristo ‘nealumbuluishe badi ne muoyo ne badi bafue.’ (2 Timote 4:1) “Badi ne muoyo” nebikale “musumba munene wa bantu” bapanduka ku Armagedone. (Buakabuluibua 7:9-17, MMM) Mupostolo Yone wakamona kabidi ‘bafue bimane kumpala kua nkuasa wa butumbi’ wa dilumbuluisha. Anu muvua Yezu mulaye, ‘bonso badi mu nkita ya tshivulukilu nebumvue dîyi dia Kristo ne nebapatuke’ pabishabu bantu ku lufu. (Yone 5:28, 29, NW; Bienzedi 24:15) Kadi nebalumbuluishe bantu bilondeshile malu kayi?

Bilondeshile tshikena-kumona tshia Yone, ‘mikanda yakabuluibua’ ne ‘bakalumbuluisha bafue ku malu akadi mafunda mu mukanda, bu muakadi bienzedi biabu.’ Mu mikanda eyi mudi malu avua bantu benze kale anyi? Tòo, dilumbuluisha kadiakuimanyina pa malu avua bantu benze kumpala kua kufuabu to. Bua tshinyi tudi tuamba nanku? Bualu Bible udi wamba ne: “Muntu udi mufue udi mubingishibue ku bubi.” (Lomo 6:7) Bantu babishibua, nebabike ne mibi yabu mimane kujimina. Nunku, mikanda eyi idi ne bua kuikala mikenji mikuabu ya Nzambi. Bua bantu bapanduka ku Armagedone ne bua babishibua kupetabu bonso muoyo wa tshiendelele, nebikale ne bua kutumikila mikenji ya Nzambi, pamue ne eyi yikala Yehowa mua kufila pamuapa mu bidimu tshinunu. Nunku, nebalumbuluishe bantu bilondeshile malu ikalabu ne bua kuenza mu Dituku dia Dilumbuluisha.

Bantu miliyare mivule nebapete bua musangu wa kumpala mushindu wa kulonga disua dia Nzambi ne kuditumikila mu Dituku dia Dilumbuluisha. Bidi biumvuija ne: nekuikale mudimu wa bungi wa dilongesha bantu. Bushuwa, ‘badi bashikama pa buloba nebayile buakane.’ (Yeshaya 26:9) Tshidibi, ki mbantu bonso bajinga kuenza disua dia Nzambi to. Bualu Yeshaya 26:10 udi wamba ne: ‘Bialejabu muntu mubi diakalengele, kêna uyila buakane; munkatshi mua buloba bua buakane mene yeye neenze malu mabi, ne kêna umona butumbi bua Yehowa.’ Nebashipe bantu babi aba bua kashidi mu Dituku dia Dilumbuluisha.​—Yeshaya 65:20.

Ku ndekelu kua Dituku dia Dilumbuluisha, bantu bikala ne bua kupanduka ‘nebikale ne muoyo’ menemene bualu nebikale bapuangane. (Buakabuluibua 20:5) Nunku Dituku dia Dilumbuluisha nedifikishe bantu ku nsombelu mupuangane uvuaku ku ntuadijilu. (1 Kolinto 15:24-28) Pashishe, nekuikale diteta dia ndekelu. Nebasulule Satana ne nebamulekele bua atete kupambuisha kabidi bantu bua musangu wa ndekelu. (Buakabuluibua 20:3, 7-10) Mulayi wa mu Bible udi ulonda eu neukumbane bua bantu babenga kulonda Satana: ‘Bantu bakane nebapiane buloba, nebashikamemu tshiendelele.’ (Musambu 37:29) Bulelela, Dituku dia Dilumbuluisha nedituadile bena lulamatu bonso masanka a bungi be!