‘Luayi kundi, meme nennupe dikisha’
‘Kuyisha Dîyi’ kudi kukolesha
UVUA muntu mupuangane uvuabu batume ne mudimu wa mushinga mukole. Ndongeshilu wende uvua mulenga be, ke bualu kayi ‘diyisha diende diakakemesha bantu.’ (Matayo 7:28) Uvua kabidi muyishi uvua kayi upungila to. Dîba diende, bukole buende ne bintu biende bikuabu uvua ubiteka anu bua mudimu wa diyisha Bukalenge bua Nzambi. Bushuwa, Yezu Kristo wakendakana mu ditunga diabu dijima wenda uyisha ne ulongesha kayi ne wa kumufuanyikija nende.—Matayo 9:35.
Mudimu wa mitalu uvua nawu Yezu uvua wa kuyisha bantu ba mu tshikondo tshiende ‘lumu luimpe lua bukalenge’ ne wakalongesha bayidi bende bua kuwenzabu pabu pa buloba bujima. (Matayo 4:23; 24:14; 28:19, 20) Bujitu bua mudimu wabu wa diyisha, difuimpakana dia dîba kabidi ne bungi buawu bivuaku mua kuzengeja balongi bende bapange bupuangane bavua bikale ne mikalu mu malu avuabu benza anyi?
Tòo. Bualu panyima pa yeye mumane kuambila balongi bende bua kulombabu bena mudimu bakuabu kudi Yehowa Nzambi “Mfumu wa budimi,” Yezu wakabatuma bua kuya kulongesha bantu. (Matayo 9:38, MMM; 10:1) Pashishe wakabajadikila ne: bujitu bua kuikala balongi bende pamue ne mudimu wa kuyisha bivua mua kubapesha dikisha ne kubasamba. Yezu wakamba ne: ‘Luayi kundi, meme nennupe dikisha.’—Matayo 11:28.
Mpokolo wa disanka
Dibikila adi divua dia luse, dinanga ne bulenga! Didi dileja muvua Yezu uditatshisha bikole bua balongi bende. Bayidi bende badi bapeta dikisha, bapeta bukole padibu bakumbaja mudimu wabu wa kuyisha “lumu luimpe” lua Bukalenge bua Nzambi. Mudimu eu udi ubapesha disanka dilelela.—Yone 4:36.
Bidimu bia bungi kumpala kua Yezu kuluaye pa buloba, Mukanda wa Nzambi ukavua muleje ne: disanka divua ne bua kuikala ngikadilu wa bantu badi benzela Nzambi mudimu wa tshijila. Bakaleja bualu ebu patoke pakimba mufundi wa Misambu ne: ‘Nuelele Yehowa mbila ya disanka, nuenu bonso ba pa buloba. Nukuatshile Yehowa mudimu ne disanka. Nulue kumpala kuende ne kuimba kua misambu.’ (Musambu 100:1, 2) Lelu bantu ba bisamba bionso badi basanka bua Yehowa, ne mêyi adibu bamutumbisha nawu adi bu mbila ya tshiluilu tshia mvita tshidi tshitshimune. Aba badi badilambule kudi Nzambi tshia bushuwa badi balua kumpala kuende “ne kuimba kua misambu.” Ne mbikumbane bua kuenza nanku, bualu Yehowa udi “Nzambi wa disanka,” udi musue bua basadidi bende bikale ne disanka padibu bakumbaja tshivuabu badilambuile kudiye.—1 Timote 1:11, NW.
Bena mudimu bakolesha
Mmunyi mudibi mua kuenzeka ne: mudimu mukole utudi tuenza mu buambi kawena ututshiokesha, kadi udi bushuwa utukankamika? Bushuwa, kuenza mudimu wa Yehowa kuvua anu bu biakudia bivua bipesha Yezu bukole. Yezu wakabambila ne: ‘Bidia bianyi bidi kuenza bu mudi wakuntuma musue ne kujikija mudimu wende.’—Yone 4:34.
Bia muomumue, lelu bena Kristo bayishi ba lukunukunu badi bapeta disanka padibu ‘bambila bantu dîyi dia Nzambi.’ (2 Timote 4:2) Connie, mukaji muena Kristo ukadi mushindame ne utu wenza mêba mapite pa 70 ku ngondo mu mudimu wa kuyisha udi wamba ne: “Kunyima kua meme mumane kubanga buambi, ntu ne disanka ne ntu ngumvua bimpe nansha meme mupungile ku dilolo.”
Kadi netuambe tshinyi padi bantu buobu kabayi bitabe mukenji wa Bukalenge? Connie udi utungunuka wamba ne: “Nansha buobu bitabe anyi kabayi bitabe, kakutu kuanji kuikala dîba dindi ngumvua kanyinganyinga bua mundi muenze mudimu wa buambi to. Pa kumbusha dimanya dia ne: tshindi ngenza tshidi tshisankisha Yehowa, ndi mmona bimpesha disanka bua kuakula bua bulelela, bualu pandi nyikila ne bantu nunku, ditekemena dilenga didi mu Bible didi dikola munda muanyi.”
Bakuabu badi bamona ne: kuambuluisha bantu bua bapete dimanya dijalame dia Yehowa kudi kupesha muoyo wabu tshipatshila. Meloney, munga mamu utu wenza pa tshibidilu mêba mapite pa 50 ku ngondo mu mudimu wa diyisha, udi wamba ne: “Mudimu wa buambi udi ufila bukole bualu udi undeja tshia kuenza ne tshia kuipatshila mu muoyo wanyi. Pandi mu buambi, ntatu indi nayi ne malu atu ambungamija dituku dionso bidi bituya.”
Millicent, muanetu mukuabu wa bakaji wa lukunukunu, udi wamba ne: “Mudimu wa buambi udi ulengeja dituku dionso dindi ngambila bakuabu malu adi Nzambi mulongoluele bantu ne dindi mbumvuija mushindu walua tshiakabidi buloba ebu Mparadizu. Mudimu eu udi uvuija Yehowa mulelela ku mêsu kuanyi dituku dionso ne udi umpesha ditalala mu mutshima wanyi kabidi ne disanka dindi tshiyi mua kupeta mu mushindu mukuabu nansha.”
Badi bakolesha badi bitaba mukenji
Mudimu wa bena Kristo mmukoleshe tshia bushuwa bayishi ba Bukalenge ne aba badi bitaba pabu mukenji eu wa muoyo, badi pabu bakankamana. Nansha muvua mulongeshi mukuabu wa mu ditunga dia Portugal bamulongeshe malu a Nzambi kudi bamansere ne bansaserdose, wakalua kujingulula ne: tshitendelelu tshiende katshivua tshikumbaje majinga ende a mu nyuma to. Nkonko yende ivua itangila malu a mu Bible kayivua mianji kupeta mandamuna ayi to. Dilonga dia Bible ne muanetu wa bakaji mukuabu Ntemu wa Yehowa diakamuambuluisha bua kumvua malu a mu Mukanda wa Nzambi bumue ku bumue. Mulongeshi eu wakasanka bikole. Wakamba ne: “Mu Disatu dionso mvua ngindila dilonga dianyi dia Bible ne muoyo kulu kulu, bualu [Ntemu eu] uvua wandamuna nkonko yanyi lumue ku lumue, ufila bijadiki bia mu Bible bivua bintuisha.” Lelu utudi tuamba eu, mamu eu ukadi musadidi wa Yehowa mudilambule, ne yeye pende udi ukolesha bakuabu ne bulelela bua mu Bible.
Nenku tudi mua kuamba ne: ni mmushinga udi nawu mudimu udi Bantemu ba Yehowa benza ni mbunene bua teritware udibu ne bua kuwenzela ki mbibapite mutu to. Nansha dibenga kuteleja dia bantu anyi buluishi ki mbibatekeshe mu maboko to. Mbadifile muabu muonso bua kukumbaja mudimu wabu wa diyisha Bukalenge. Badi bayisha bantu lumu luimpe miaba yonso idibu mua kubapeta: ku miaba idi mashinyi imanyina mu États-Unis (1), ku tshipalu tshia ndeke mu ditunga dia Corée (2), mu mikuna ya Andes (3) anyi mu tshisalu mu Londres (4). Balongi ba Yezu ba mu matuku etu aa badi batungunuka ne kuenza mudimu wabu eu udi usankisha. Yezu mmukumbaje mulayi wende, bualu mmubakoleshe bua buobu kukolesha pabu bakuabu ba bungi mudibu benza mpindieu.—Buakabuluibua 22:17.