Nshapita wa 10

Dikina dia “malu muondoke a Satana”

TIATIRE

1. Bilondeshile bisumbu bikuabo, Tiatire uvua usanganyibua penyi, ne nnsombelu kayi uvuaku pa bidi bitangila malu a Nzambi?

MUTANTSHI wa kilometre 65 ku sud-est wa Bergama (Pergame) kudi tshimenga tshilenga tshia Akhisar mu ditunga dia Turquie. Kukadi bidimu bitue ku 1 900, mmuaba uvua usanganyibua tshimenga tshia Tiatire. Kumbukila ku Pergame, mutangidi muena-ngendu uvua mua kufika kakuyi lutatu ku tshimenga tshia Tiatire pa kulonda njila wa munda mua mikalu e kutungunuka mutangile ku bisumbu bikuabo bitela mu Buakabuluibua nshapita 3​—Sarde, Filadelfi, ne Laodisé. Bishilangane ne nsombelu wa ku Pergame, mbimueneke se: Tiatire ki mmuaba uvua ntendelelu wa amperere mujame bikole nansha, kadi uvuaku pende ne nzubu ya ntendelelu ne ntempelo mijidila ba-nzambi ba bampangano. Tiatire uvua nsangilu wa bungenda-mushinga muende lumu.

2, 3. (a) Ntshinyi tshivua Mifundu midianjile kuamba pa bidi bitangila mukaji kampanda wa ku Tiatire wakalua muena nkristo? (b) Bua bena nkristo ba ku Tiatire, kuikala kua Yezu “Muana wa Nzambi” ne kuikala kuende ne ‘mêsu bu ludimi lua kapia,’ kudi kumvuija tshinyi?

² Bu muvua Paulo umanyisha lumu luimpe mu tshimenga tshia Macédoine, wakapetangana ne Lydie, mukaji ngenda-mushinga wa bilamba bikunze mu tshimenga tshia Tiatire. Mukaji eu ne bena nzubu wende buonso bakitaba ne disanka mukenji uvua Paulo umanyisha, ne wakaleja ngikadilu wa diakidila benyi wa pa buende. (Bienzedi 16:14, 15) Bilondeshile muyuki wa mu Bible, mmuntu wa kumpala wa ku Tiatire uvua mukudimune mutshima ku buena-nkristo. Kunyima kua bidimu, bakasa tshisumbu mu tshimenga etshi. Tshine etshi ke tshivua Yezu mutumine mukenji wende mule wa ku yonso. Udi wamba ne: “Ne kudi muanjelu wa tshisumbu tshidi ku Tiatire, funda ne: Mona tshidi Muana wa Nzambi wamba, eu udi ne mêsu bu ludimi lua kapia ne makasa mafuanangana ne mutaku udi ubalakana.”​—Buakabuluibua 2:18.

³ Ke musangu umu’epele udi miaku “Muana wa Nzambi” imueneka mu Buakabuluibua, nansha mudi Yezu wakula bua Yehowa mu mvese mikuabo, wamba ne: “Tatu wanyi.” (Buakabuluibua 2:27; 3:5, 21) Ditela dia muanzu eu divua misangu mikuabo divuluija bena nkristo ba ku Tiatire malanda makole adi pankatshi pa Yezu ne Yehowa. Muana eu udi ne ‘mêsu bu ludimu lua kapia’​—atshi ndidimuija kudi bena nkristo ba ku Tiatire didi dibamanyisha ne: dilumbuluisha diende nedikale bua tshintu tshionso tshidiye umone bu manyanu mu tshisumbu. Pa kufunkuna tshiakabidi makasa ende adi bu mutaku udi ubalakana, udi uvuluija tshilejilu tshia dikema tshia lulamatu tshivuaye mufile pavuaye wendakana pa buloba. Kabiyi mpata, bena nkristo ba ku Tiatire bakateleja mubelu wende; ke tshitudi petu ne bua kuenza lelu’eu.​—1 Petelo 2:21.

4, 5. (a) Bua tshinyi Yezu uvua mua kuela bena nkristo ba ku Tiatire ka-lumbandi? (b) Ntshimanyinu kayi tshifuanangane ne tshia tshisumbu tshia Tiatire tshidi natshi bisumbu bia Bantemu ba Yehowa?

⁴ Diakalenga, Yezu udi ne mabingila bua kuela bena nkristo ba ku Tiatire ka-lumbandi. Udi wamba ne: “Ndi mumanye bienzedi biebe, ne dinanga diebe, ne ditabuja diebe, ne mudimu webe, ne dinanukila diebe, ne ndi mumanye ne: kukadi lupolo kampanda, bienzedi biebe mbivulangane kupita bia kumpala.” (Buakabuluibua 2:19) Bishilangane ne bena Efeso, bena nkristo aba bela manyi kabavua bajimije dinanga diabo dia kumpala bua Yehowa to. Ditabuja diabu ndikole. Kabidi, bienzedi biabu mbivule kupita bia kumpala, ne anu bu bisumbu bisatu bia kumpala, bena nkristo ba ku Tiatire badi baleja dinanukila. Ke tshimanyinu tshia bisumbu kufika ku 100 000 bia Bantemu ba Yehowa bidi bimuangalake pa buloba bujima lelu’eu! Dinanga bua Yehowa didi dimuenekela ku bienzedi, eku mitalu bua mudimu wa buambi itabuluja bulongolodi, isaka bansonga ne bakulakaje ku mudimu. Bungi bua Bantemu badi badifila mu mudimu bu bampanda-njila budi anu buenda buvula; nenku, badi batumika ne meji ne dîba didi dibashadile bua kumanyisha ditekemena dia butumbi dia Bukalenge bua Nzambi bualua.​—Matayi 24:14; Mako 13:10.

⁵ Kukadi makumi mavule a bidimu, bena lulamatu bavule, bena mu bashadile bela manyi ne bena mu musumba munene, bakaleja dinanukila dia tshitembu mu mudimu wa Nzambi, eku bena mu bulongolodi ebu badi babanyunguluke benda badiina mu mîdima kabayi ne ditekemena dia kumbukamu. Nenku, tuikalayi ne dikima! Mukanda wa Buakabuluibua udi ushindika bumanyishi bua baprofete ba Nzambi ba kale. “Dituku dinene dia Yehowa dikadi pabuipi. Didi pabuipi ne didi diambuluja lukasa.”​—Sefanya 1:14; Yoele 2:1; Habakuka 2:3; Buakabuluibua 7:9; 22:12, 13.

“Mukaji Yezabele”

6. (a) Nansha muvua Yezu ne mabingila a kutumbisha tshisumbu tshia Tiatire, uvua mushindamene pa muanda kayi udi ukengela kutabalela ne ntema? (b) Yezabele uvua nganyi, ne uvua ne bukenji bua kudiamba mudiye muprofete anyi?

⁶ Mesu a Yezu mafuanangane ne ludimi lua kapia, adi ela patoke bualu kampanda budi bukengela kutabalela diakamue. Yezu udi wambila tshisumbu tshia Tiatire ne: “Nansha bikale nanku, ndi mukulamine bualu ebu munda: udi mulekele mukaji Yezabele, udi udiamba mudiye muprofete, ne udi ulongesha ne upambuisha bapika banyi bua kuendabo masandi ne kudia bintu bilambuila mpingu.” (Buakabuluibua 2:20) Mu siekele wa dikumi K.B.B., mukalenge-mukaji Yezabele, mutendeledi wa Baala ne mukaji wa mukalenge Akabe wa Izalele, uvua muende lumu lubi bua dishipangana diende, tshiendenda tshiende tshia masandi ne ngenzelu yende mibi ya dituminangana mêyi. Yehu, muela manyi wa Yehowa, wakamushipesha. (1 Bakalenge 16:31; 18:4; 21:1-16; 2 Bakalenge 9:1-7, 22, 30, 33) Mutendeledi wa mpingu Yezabele kavua mua kudiamba mudiye muprofete nansha. Kavua mushindu umue ne Miriam ne Deborah, bakasadila mu Izalele ne lulamatu bu baprofete-bakaji to. (Ekesode 15:20, 21; Balumbuluishi 4:4; 5:1-31) Ne spiritu wa Yehowa kakamusaka bua kumanyisha mikenji ne milayi bia kudi Nzambi, bu muvuabi bua Anna, muprofete-mukaji mukulakaje, ne bua bana ba bakaji banayi ba Filipe, mumuangalaji wa lumu luimpe.​—Luka 2:36-38; Bienzedi 21:9.

7. (a) Pa kuamba ne: “Mukaji Yezabele,” Yezu udi ufunkuna buenzeji kayi? (b) Mmunyi muvua bakaji bena mu tshisumbu baleje ngikadilu wabu wa dienza malu ku tshikandi?

⁷ Nenku, mbimueneke patoke ne: “mukaji Yezabele,” udi udiamba mudiye muprofete-mukaji ku Tiatire, mmuena dishima. Ki mmusakibue mu bienzedi biende kudi spiritu wa Nzambi nansha. Kadi, nnganyi muine? Mbimuenek’amu se: mmukaji peshi kasumbu ka bakaji badi ne buenzeji bubi bua tshinyangu mu tshisumbu. Bamue bakaji ba mu tshisumbu bavua pamu’apa bafikishe benamu ku tshiendenda tshia masandi, bafila mabingila makuate bundu a bidibo benza ku bukole pa kutumika bibi ne Mifundu. Milayi ya buprofete ya dishima, bulelela! Pa kutumika ne buenzeji buabo, badi bafikisha bena nkristo ku dipona anu bu bobo bine mu ‘masandi, dipanga bukezuke, lukuka lua masandi, majinga mabi ne dialakana, didi mene ditendelela dia mpingu.’ (Kolosai 3:5) Badi bafikisha bena mu tshisumbu ku dilonda nsombelu wa buenzavi ne wa buiminyi bu eu udi muanyishibue mpindieu, pamu’apa mukankamija, mu bitendelelu bivule bia bukua-buena-nkristo.

8. (a) Ndidimuija kayi didi Yezu ufila pa bidi bitangila “Yezabele” wa ku Tiatire? (b) Mmunyi muvua buenzeji bubi bua bakaji bumueneke mu tshikondo tshietu etshi?

⁸ Yezu udi utungunuka pa kuambila bakulu ba ku Tiatire ne: “Ndi mumupeshe tshikondo bua kunyingalalaye, kadi ki mmusue kunyingalala bua masandi ende nansha. Monayi, nkadi pa kumuela pa bulalu bua makenga, ne aba badi benda nende masandi, mu dikenga dinene, bikalabo kabayi banyingalale bua bienzedi biende.” (Buakabuluibua 2:21, 22) Anu muvua Yezabele umueneka mukokeshe Akabe ku kale ne pashishe mudiwule Yehu, mukumbaji wa dilumbuluisha muteka kudi Nzambi, bia muomumue, pa kutumika ne buenzeji buabo, bakaji aba badi pamu’apa bakeba mua kuenzeja babayabo ne bakulu malu ku bukole bilondeshile bidibo basue. Mbimueneke se: bakulu ba ku Tiatire badi balengulula dikalaku dia Yezabele eu peshi buenzeji bubi bua bakaji. Apa, Yezu udi ubatumina didimuija dikole, kudibo bobo, kadi ne kudi tshisumbu tshia tshisamba tshia Yehowa tshia lelu’eu kabidi. Mu tshikondo tshietu etshi, bakaji ba mushindu’eu bena bukokeshi kampanda bakadi bafikishe babayabo ku butontolodi ne bafike too ne ku disonguela basadidi ba lulamatu ba Yehowa pa kubafunda ku tubadi.​—Fuanyikija ne Yuda 5-8.

9. (a) Bua tshinyi mêyi a Yezu adi atangila Yezabele kaena anyanga lumu lua bakaji buonso badi mu tshisumbu? (b) Ndîba kayi menemene didi buenzeji bua Yezabele bumueneka?

⁹ Abi kabiena binyanga nansha kakese lumu lua bakaji ba lulamatu bena mu tshisumbu tshia bena nkristo. Lelu’eu, tshitupa tshinene tshia mudimu wa bumanyishi ntshikumbaja kudi bana betu bakaji ba lulamatu; ku diambuluisha dia malonga a Bible adibo balombola, badi bafikisha misumba ya bapiabapia mu tshisumbu. Nzambi yeye muine udi ubabenesha, anu bu mudibi bileja mu Musambu wa 68:11 mutudi tubala ne: “Yehowa yeye nkayende udi wamba dîyi; bakaji badi bamanyisha lumu luimpe badi tshiluilu tshinene.” Mukaji wa kanemu ne mupole-malu, ngikadilu “udi mene ne mushinga munene ku mêsu kua Nzambi,” udi mua kuikala ne buenzeji buimpe kudi bayende. (1 Petelo 3:1-4) Mukaji wa tshitembu ne muenji wa mudimu mmusamuna kudi mukalenge Lemuele. (Nsumuinu 31:10-31) Anu padi mukaji usambuka mikalu yende pa kudinga balume, pa kuela mpata anyi pa kubenga kuitaba bumfumu buabo, ke padi buenzeji bua Yezabele bumueneka.​—Efeso 5:22, 23; 1 Kolinto 11:3.

10. (a) Bua tshinyi Yezabele ne bana bende mbafundila tshibawu? (b) Aba badi balua bana ba Yezabele badi mu nsombelu kayi wa njiwu, ne ntshinyi tshidibo ne bua kuenza?

¹⁰ Pa bidi bitangila “mukaji eu Yezabele,” Yezu udi utungunuka ne: “Ne bana bende, nembashipe ne dikenga dia lufu, nenku bisumbu bionso nebimanye ne: ndi eu udi ukonkonona tonyi ne mitshima, ne nennupeshe, muntu ne muntu, bilondeshile bienzedi bienu.” (Buakabuluibua 2:23) Yezu uvua mupeshe Yezabele ne bana bende dîba bua kunyingalala, kadi mbananukile mu buenzavi buabo, nenku, badi ne bua kupeta dilumbuluisha. Eu ke mukenji mukole bua bena nkristo ba mu tshikondo tshietu etshi. Aba badi bidikija Yezabele, balume anyi bakaji, ne badivuija bana bende pa kubenga kutumikila mêyi-maludiki a mu Bible pa bidi bitangila bumfumu anyi nsombelu mulenga, peshi pa kuleja mutu mukole kufika too ne ku dipanga kuangata ne mushinga bantu badi Nzambi muteke pa midimu, bine aba badi ne kusama kua njiwu mu nyuma. Bushuwa, muntu wa mushindu’eu yeye mubikile bakulu ba tshisumbu bua kumusambidila, “disambila dia ditabuja nedisanguluje muena kusama, ne Yehowa neamujule”​—anu bienzaye malu ne budipuekeshi bilondeshile masambila a mushindu’eu. Kadi, muntu nansha umue, mulume anyi mukaji, kedi meji se: udi mua kushima Nzambi anyi Kristo pa kukeba mua kusokoka bienzedi biende bibi bia buenzavi, anyi pa kumuenesha luidi lua dishima bu Ntemu muena mitalu mu mudimu.​—Yakobo 5:14, 15.

11. Mmunyi mudi bisumbu biambuluishibua lelu’eu bua kudimukila njiwu idi ifuma ku buenzeji bubi bua bakaji?

¹¹ Diakalenga, bisumbu bivule bia Bantemu ba Yehowa lelu’eu mbimanye njiwu eyi. Bakulu mbena kutabalela ne badi bamona malu mabi ne mmuenenu idi kayiyi ya bena teokrasi. Badi badikolesha bua kuambuluisha balume ne bakaji badi mu njila wa njiwu, bua kukolabo mu nyuma ne bua kuenzabo mudimu bua didilongolola diabu patshidiku dîba. (Galatia 5:16; 6:1) Ne dinanga ne disu dikole, batangidi aba bena nkristo badi bimanyika mmuenenu yonso wa bakaji wa kuenza tusumbu [munda mua tshisumbu] tufuanangane ne tua bakaji [ba mu bulongolodi ebu] balombi ba dipikudibua diabu ku bukole. Kabidi, ku musangu ne ku musangu, mibelu mikumbanyine idi ifidibua mu mikanda ya Société Watch Tower.a

12. Mmushindu kayi udi bena mu kasumbu ka Yone baleja mitalu mifuanangane ne ya Yehu?

¹² Kadi, padiku tshilema tshinene tshia dienda dia masandi, nangananga padidi dilua tshilele, benji ba mpekatu badi kabayi banyingalala badi ne bua kuipatshibua. Tuvulukayi mitalu ivua nayi Yehu bua kumbusha mu Izalele buenzeji buonso bua Yezabele. Bia muomumue lelu’eu, bena mu kasumbu ka Yone badi baleja pabo disu dikole, bafila tshilejilu kudi ‘ba-Yonadabe,’ bena mudimu nabo, ne badileja bashilangane ne ba-ministre balenguludi ba bubi ba mu bukua-buena-nkristo.​—2 Bakalenge 9:22, 30-37; 10:12-17.

13. Ntshinyi tshidi tshindile aba badi bapona mu buenzeji bubi bua bakaji?

¹³ Bu mudiye Mutuadi wa mikenji ne Nzuji wa Yehowa, Muana wa Nzambi udi wenza muonso mua kuenza bua kutandula Yezabele wa lelu’eu ne kumuela pa bulalu bua makenga, bualu disama diende dia mu nyuma kadiena mua kuondopibua. (Malaki 3:1, 5) Aba badi bapone mu buenzeji ebu bubi bua bakaji nebabêle pabo mu dikenga dinene, dia diipatshibua diabumbusha mu tshisumbu tshia bena nkristo, bienze amu bu badi bafue. Bikalabo kabayi banyingalale, bakudimuke ne bapingajibue mu tshisumbu, nebapetangane kabidi ne lufu lua ku mubidi ku “dikenga dia lufu,” palua dikenga dinene. Bangabanga ne kufika aku, badi mua kubajadikulula bianyingalalabo menemene bua bienzedi biabo bibi.​—Matayi 24:21, 22; 2 Kolinto 7:10.

14. (a) Mmunyi mudi Yezu utumika ne bakulu bua kukosa bimue bilumbu, bu mudi buenzeji bua Yezabele? (b) Mmunyi mudi tshisumbu mua kutua bakulu badi bakosa bilumbu bia mushindu’eu nyama ku mikolo?

¹⁴ “Bisumbu bionso” bidi ne bua kumanya ne: Yezu utu ukonkonona “tuonyi,” majinga muondoke, ne ‘mutshima,’ bumuntu bua munda, pamue ne bipatshila bisokoka. Bua kipatshila aka, utu utumika ne balume ba kueyemenyibua, mitoto anyi bakulu bua kujikija bimue bilumbu, bu mudi buenzeji bua Yezabele padibo bumueneka. (Buakabuluibua 1:20) Kunyima kua bakulu aba bamane kukonkonona tshilumbu tshia mushindu’eu ne lubatshi ne batshikose, muntu nansha umue kêna ne bua kukeba mua kumanya bua tshinyi ne mmushindu kayi uvua dipangadika diangatshibue. Buonso badi ne bua kuitaba ne budipuekeshi dilumbuluisha dia bakulu ne kutungunuka ne kutua mitoto eyi ya tshisumbu nyama ku mikolo. Lulamatu kudi Yehowa ne kudi bulongolodi buende nelufutshibue. (Musambu wa 37:27-29; Ebelu 13:7, 17) Ku luebe luseke, Yezu udiku mua kukubenesha paluaye kufuta muntu yonso bilondeshile bienzedi biende.​—Galatia 5:19-24; 6:7-9.

“Binudi nabi, nubilame bikole”

15. (a) Ntshinyi tshivua Yezu muambile bena nkristo bavua kabayi badinyangishe kudi Yezabele? (b) Ntshinyi tshidi tshileja se: aba buonso bavua badiamba mudibo bena nkristo mu 1918 kabavua banyanga kudi bukua-buena-nkristo butontolodi?

¹⁵ Pashishe, Yezu udi wamba mêyi aa adi akolesha ku muoyo: “Kadi, nuenu bakuabo badi ku Tiatire, aba buonso badi kabayi ne dilongesha edi, nangananga aba badi kabayi balonge mua kumanya ‘malu muondoke a Satana,’ bu mudibo bamba, ndi nnuambila ne: Tshiena nnutekela bujitu bukuabo. Kadi binudi nabi, nubilame bikole too ne pangalua.” (Buakabuluibua 2:24, 25) Ku Tiatire, kudi anyima ya lulamatu idi kayiyi mipone ku buenzeji bua Yezabele. Mushindu wa muomumue, munkatshi mua bidimu 40 bia kumpala kua 1918 ne kutuadijila pine apo, munkatshi mua aba badi badiamba bena nkristo, buonso kabavua balengulule bienzedi bia buenzavi ne binyanguke bidi bitambe kumuangalaka mu bukua-buena-nkristo to. Kasumbu kakese ka Balongi ba Bible badi bamanyike lelu’eu mu dîna dia Bantemu ba Yehowa kakadienzeja bua kuambuluisha bena mu Ekleziya mishilangane bua kujingulula ntuadijilu wa malongesha mavule a bumpangano a mu bukua-buena-nkristo; kasumbu aka koko kine kakalekela mitabuja wonso ne bienzedi bia bena Babilone bipetela kudi bukua-buena-nkristo butontolodi. Ku mine aa kudi dilongesha didi dilengulula malu mabi dia “mukaji Yezabele.”

16. Nansha muvua Yezu ne kasumbu kaludiki ka mu siekele wa kumpala kabayi basakidila bujitu bukuabo, tudi ne bua kudilama ku tshinyi?

¹⁶ Bena mu kasumbu ka Yone bavua kabidi bakankamija bena mudimu nabo, musumba munene, bua kuepuka buenzeji bua masandi bufuanangane ne bua mu bulongolodi bubi bua manaya. Kabiena bikengela kumona peshi kujingulula ku bienzedi tshidi tshiumvuija dinyanguka, peshi kumanya bitudi ne bua kuepuka. Njila wa meji ng’wa kudilama kule ne “malu muondoke a Satana.” Anu mudi Yezu ubiamba ne: “Tshiena nnutekela bujitu bukuabo.” Abi bidi bituvuluija dipangadika didi dilonda edi dia kasumbu kaludiki ka bena nkristo ba mu siekele wa kumpala: “Spiritu munsantu ne tuetu bine tuamonyi ne: ki mbimpe bua kunutekela bukuabu bujitu anu bintu ebi bidi bikengedibua: kudilama ku bintu bishipela mpingu, ne ku mashi, ne ku nyama mifiekela mu nshingu pa kuyishipa, ne masandi. Binuadilama bimpe ku bintu ebi, nenulubuluke.” (Bienzedi 15:28, 29) Bua kulubuluka mu nyuma, wepuke ntendelelu wa dishima, ditumika dibi ne mashi (bu mudi diedibua mashi mu mubidi) ne tshiendenda tshia masandi! Nenku, nansha makanda ebe a mubidi neakubibue pawu.

17. (a) Satana udi uteta bantu lelu’eu ku diambuluisha dia “malu muondoke” kayi? (b) Tudi ne bua kuikala ne mmuenenu kayi pa “malu muondoke” a mu bulongolodi bukodiakane bua Satana?

¹⁷ Lelu’eu, Satana udi utumika ne makuabo “malu muondoke,” tshilejilu, ngenyi mikodiakane ne filozofi idi ilabidila lungenyi. Pa kumbusha ngelelu ya meji idi ilengulula ne ikankamija bubi, ku “malu” aa kudi kabidi dipaka dia manga ne dilongesha dia bintu-bidimenene. Mmunyi mudi Mufuki muwule tente ne meji wangata “malu aa muondoke”? Mupostolo Paulo udi utumanyisha mêyi aa a Nzambi: “Nembutule meji a bena meji.” Bishilangane, “malu muondoke a Nzambi” mmatekete, adi umvuika bimpe ne adi akolesha ku muoyo. Bena nkristo ba meji badi bepuka “malu muondoke” a mu bulongolodi ebu bukodiakane bua Satana. Katupu muoyo ne: “Bulongolodi ebu budi bupita ne nkuka yabu kabidi, kadi eu udi wenza disua dia Nzambi udi ushala ne muoyo tshiendelele.”​—1 Kolinto 1:19; 2:10; 1 Yone 2:17.

18. Mmabenesha kayi adi Yezu mulaye bena nkristo bela manyi badi bashale ne lulamatu too ne ku nshikidilu, ne ndisanka kayi dikala nadi babiishibue aba ku Armagedon?

¹⁸ Mpindieu, Yezu udi utumina bena nkristo ba ku Tiatire mêyi a dikankamija. Adi kabidi mpokolo wa dikankamija bua bena nkristo bela manyi lelu’eu: “Ne kudi eu udi utshimuna ne udi ulama bienzedi bianyi too ne ku nshikidilu, nemmupeshe bukokeshi pa matunga, ne neakokeshe bantu ne dikombo dia tshiamu, nunku, nebabozeke bu ngesu ya dîma, anu bu mumvua panyi mubupete kudi Tatu wanyi.” (Buakabuluibua 2:26, 27) Bulelela, ndisanka dia dikema! Bukokeshi ebu budibo bapeshe batshimunyi bela manyi ku dibiishibua diabu ku lufu nkudisangisha kuabo, ku luseke lua Yezu, mu mudimu wa kubutula matunga a buntomboji ku Armagedon ku diambuluisha dia “dikombo dia tshiamu.” Bingoma bia bukole bia nikleere bia matunga aa nebiele tupata palua Kristo kubutula baluishi bende amu bu mudiye mua kuenza bua ngesu ya dîma.​—Musambu 2:8, 9; Buakabuluibua 16:14, 16; 19:11-13, 15.

19. (a) “Mutoto wa mu dinda” nnganyi, ne mmu ngumvuilu kayi muawufilabo kudi batshimunyi? (b) Ndikankamija kayi didibo bapeshe musumba munene?

¹⁹ Yezu udi usakidila ne: “Ne nemmupeshe mutoto wa mu dinda.” (Buakabuluibua 2:28) Yezu yeye muine udi umvuija pashishe tshidi “mutoto” eu pa kuamba ne: “Ndi muji ne kankanunuina wa Davidi, mutoto wa nkesha wa mu dinda.” (Buakabuluibua 22:16) Eyowa, Yezu ke udi bushuwa ukumbaja mulayi udi ulonda eu uvua Yehowa muenzeje Balame ku bukole bua kuamba: “Bushuwa, mutoto neupatukile kudi Yakoba, ne kabiyi mpata, dikombo dia bukalenge nedijuke mu Izalele.” (Nomba 24:17) Mmu ngumvuilu kayi muafila Yezu “mutoto wa mu dinda” kudi batshimunyi? Kabiyi mpata, mpa kudifila yeye muine kudibo, pa kudia nabo malanda masheme, mapite bukole! (Yone 14:2, 3) Ndikankamijapu kayi bua kunanukila! Bia muomumue, bidi dikankamija bua musumba munene bua kumanya ne: “mutoto wa mu dinda” ukadi pa kutumika ne bukokeshi buende bua Bukalenge pa kuasulula Mparadizu apa pa buloba.

Tushale bena muoyo mutoke

20. Nnsombelu kayi udi mu bukua-buena-nkristo udi utuvuluija bufuba kampanda bua tshisumbu tshia Tiatire?

²⁰ Mukenji eu uvua ne bua kuikala mupeshe bena nkristo ba ku Tiatire dikima dia bungi. Anjibi kuela meji: Muana wa Nzambi mutumbishibue mu diulu uvua muakule yeye nkayende ne bena nkristo ba ku Tiatire pa bidi bitangila imue ya ku ntatu yabo! Kabiyi mpata, bamue ba kudibo bavua bitabe buludiki buende bua dinanga. Mukenji eu, mule wa ku yonso muanda-mutekete, udi utuambuluisha kabidi bua kumanya tshisumbu tshilelela tshia bena nkristo mu tshikondo tshietu etshi. Mu 1918, pavua Yezu mulue mu ntempelo wa Yehowa bua dilumbuluisha, bitendelelu bivule bidi bibikidibua ne: mbia bena nkristo, bivua bidinyange pa kudifila ku ditendelela dia mpingu ne ku tshiendenda tshia masandi a mu nyuma. (Yakobo 4:4) Bamue bavua bashila mitabuja abu pa malongesha a bakaji ba lungenyi lukole ba mu siekele wa 19, bu mudi Ellen White muena Ekleziya adventiste du septième jour ne Mary Baker Eddy wa Ekleziya wa science chrétienne, ne matuku ashadi aa, bakaji bavule mbatuadije kulongesha kumpala kua bena kuitabuja. (Tangila dishilangana ne 1 Timote 2:11, 12.) Mu tusumbu tushilangane tua bena katolike, Mariya udi upeshibua kanemu ne lumu kupita Nzambi ne Kristo. Pabi, Yezu kakamupesha lumu ne kanemu bia mushindu’eu to. (Yone 2:4; 19:26) Malongolodi adi itaba buenzeji bua bakaji bua mushindu’eu bubengangane ne mikenji adi bushuwa mena nkristo anyi?

21. Mmalongesha kayi atudi mua kupetela ku mukenji wa Yezu mutumina tshisumbu tshia Tiatire?

²¹ Muena nkristo yonso pa nkayende, nansha yeye muena mu kasumbu ka Yone anyi ka mikoko mikuabo, neenze bimpe bua kukonkonona mukenji eu. (Yone 10:16) Bamue badi mua kutetshibua bua kulonda njila mupepele wa kudienzela mudibo basue, anu bu balongi aba ba Yezabele ba ku Tiatire. Bakuabo badi mua kutetshibua bua kudilekelela ne kuditua mu buenzavi. Tshilejilu, lelu’eu ntatu idi itamba kumueneka pa bidi bitangila biakudia bienza ne mashi ne diedibua dia mashi mu mubidi. Kudi bamue badi pamu’apa mua kuela meji se: kuikala ne mitalu mu mudimu anyi kuenza miyuki kudi kubapesha bukenji bua kudilekelela mu malu kampanda, tshilejilu, pa kutangila filme ya tshikisu anyi tshiendenda tshia masandi, nansha mu cinema peshi mu tusete tua video anyi kabidi pa kunua maluvu kupitshisha. Didimuija didi Yezu mupeshe bena nkristo ba ku Tiatire didi ditukandika bua kuangata madikadidi a mushindu’eu. Yehowa mmusue bua tuikale bakezuke, balamate menemene kudiye, katuyi badiabanye bu muvua bena nkristo bavule ba ku Tiatire.

22. Mmunyi mudi Yezu ushindika mushinga wa kuikala ne ditshi dia lumvu?

²² Ndekelu wa bionso, Yezu udi wamba ne: “Eu udi ne matshi umvue tshidi spiritu wambila bisumbu!” (Buakabuluibua 2:29) Bua musangu muinayi, Yezu udi wamba mêyi aa adi apingana ku musangu ne ku musangu bu dipunguluja ne akomesha mikenji yende isatu yalonda. Udiku ne ditshi dia lumvu anyi? Pikalabi nanku, tungunuka ne kuteleja ne ntema mibelu idi Nzambi ufila anu kufila ku diambuluisha dia spiritu wende ne ku butuangaji bua tshiamu tshiende tshia mudimu.

[Mêyi adi kuinshi]

[Bimfuanyi mu dibeji 51]

Lelu’eu, mudimu wa bumanyishi mmukumbaja mu tshitupa tshiawu tshinene kudi bana betu ba bakaji ba lulamatu badi batua bumfumu bua teokrasi nyama ku mikolo ne budipope