Dinanga ke didi dituambuluisha bua kuyisha bimpe
1 ‘Luayi kundi, meme nennupe dikisha.’ (Mat. 11:28) Mêyi mimpe avua Yezu muambe aa adi aleja muvuaye munange bantu ne uditeka pa muaba wabu. Tuetu bena Kristo tudi ne bua kuidikija Yezu pa kuleja mutudi banange bantu badibu bafinyine panshi kudi malu a ba pa buloba ebu badi kabayi ne dinanga. Mmunyi mutudi mua kuleja mutudi banange bantu patudi tuyisha lumu luimpe?
2 Ku mêyi etu: Yezu uvua munange bantu, ke bualu kayi misangu yonso ivuaye upeta mushindu, uvua ubayisha lumu luimpe. (Yone 4:7-14) Tuetu banange bantu, katuakuelakana bua kubayisha padi mpunga umueneka to. Tshilejilu, muana mukuabu wa bakaji wa bidimu bisambombo wakayisha mamu uvua musombe ku luseke luende pavuabu bindile bua kubondopabu. Ntshinyi tshivua tshimufikishe ku dienza nanku? Udi wamba ne: “Mamu au uvua umueneka muikale ne dijinga dia kumanya Yehowa.”
3 Tudi mua kuleja mutudi banange bantu pa kubakuisha ne musangelu ne mimuemue ne dîyi dilenga dia buwetu. Tubateleje bimpe padibu bakula bua tujingulule malu adi mabatonde, tuditatshishe bua bualu buabu bua kubaleja ne: tudi babanange. (Nsu. 15:23) Anu bu Yezu, tutambe kuimanyina pa mukenji muimpe wa Bukalenge bua Nzambi ne dinanga ne luse luende kudi bantu.—Mat. 24:14; Luka 4:18.
4 Ku bienzedi bietu: Yezu uvua wambuluisha bantu pavuaye ubamona mu lutatu. (Mat. 15:32) Tudi petu mua kuenzela bantu malu adi aleja mutudi babanange patudi mu buambi. Tshilejilu, muanetu wa bakaji mukuabu wakamona mamu kampanda utata bua kumvua malu a mushinga avuabu bamuambila ku telefone mu muakulu mukuabu. Ke muanetu au kutuadija kumukudimuinawu. Tshivuaye mumuenzele atshi tshiakafikisha mamu au ku diyukila ne muanetu malu a Nzambi ne kuitabaye bua kulonga Bible. Kabidi, dituku dikuabu diakaya muanetu wa balume kampanda kutangila muntu uvuabu bayukile nende musangu mukuabu, wakumusangana mutshioke bikole, mupange too ne mua kumbusha nkuasa munene uvua mu mushiku wende wa mbelu. Pakamuambuluishaye bua kusemeja nkuasa au ku luseke, muanetu wakasomba mu muine nkuasa au bobu kutuadija kulonga nende Bible. Muntu au uvua ne dianyisha dia bungi bua tshivuaye mumuenzele.
5 Patudi tuyisha, tudi tuleja mutudi banange Nzambi ne banange kabidi bantu netu. (Mat. 22:36-40) Patudi tuleja dinanga dietu ku mêyi ne ku bienzedi bietu, tudi tufikisha bantu ba muoyo muimpe ku dijingulula ne: tudi ne bulelela.