‘Kabiena binsankisha to’
1 Patutu tuyisha imue miaba, bantu batu pamuapa batuandamuna ne: ‘Kabiena binsankisha to.’ Nunku, ntshinyi tshidi mua kutuambuluisha bua kubenga kuteketa mu mikolo padi bantu batuandamuna ne tshibengu mu buambi? Mmunyi mutudi mua kufika ku dijula bantu nyota ya kuteleja lumu luimpe?
2 Ikala ne disanka: Tuetu bamanye tshidi bantu batuandamuina ne tshibengu netufike ku dishala anu ne disanka dietu. Bantu badibu balongeshe ne: Bintu bionso mbidimenene anyi badi bakolele mu mêku avuabu kabayi batendelela kabena mua kuangata Bible ne mushinga to. Nsombelu wa mpala ibidi udi bakuabu bamone mu bitendelelu mmubatekeshe mu mikolo. Bakuabu badi babenga kututeleja bua malu adi mabatonde, kabatshiyi ne bua nsongo budibu batekemena mu matuku atshilualua. (Ef. 2:12) Banga pabu ki ‘mbamanye bualu’ to, bualu ntatu ya pa buloba ebu mmibanyungulule mutu.—Mat. 24:37-39.
3 Nansha mudi bamue bantu babenga bua kututeleja, tutungunukayi anu ne kuyisha ne disanka, bualu patudi tuenza nanku tudi tutumbisha Yehowa. (1 Pet. 4:11) Patudi tuyisha Dîyi dia Nzambi too ne kudi bantu badi kabayi basue kututeleja, tudi kabidi tukolesha ditabuja dietu. Nunku tudienzeje bua kumona bantu badi mu teritware wetu bu mudi Yehowa ubamona. Yehowa wakumvuila bena mu Ninewe luse bualu ‘kabavua mua kujingulula [mudi] tshianza tshia balume ne tshia bakaji’ bishilangane to. (Yona 4:11) Bantu ba mu teritware wetu badi dijinga ne lumu luimpe! Nunku, pamutu pa kulekela bua kubayisha, tukebe mishindu ya kubajula nyota ya kumvua malu adi mu Bible.
4 Bambila malu adi matonde bantu muaba unudi: Pamuapa udi mua kuakula bua bualu budi butonda bantu muaba unudi mu mêyi ebe a mbangilu ne kuebeja muntu tshidiye wela meji. Teleja padiye wakula, umuleje mulayi wa mu Bible udi ukolesha bantu ku muoyo bilondeshile bualu budi bumutonde. Tshilejilu, panyima pa njiwu kampanda ivua mienzeke, muanetu wa balume mukuabu uvua uleja muntu uvuaye upeta ku nzubu yonso muvua bualu abu bumutonde pende bikole. Udi wamba ne: “Bantu bavua batuadija diakamue kuakula. Mvua muyukile bimpe ne bantu ba bungi dituku adi anu bua mumvua mbaleja muvua tshivua tshibenzekele tshintonde panyi bikole.”
5 Bukalenge bua Nzambi nebujikije ntatu yonso idi nayi bantu. Keba bua kumanya lutatu ludi lutamba kutatshisha muntu uudi uyukila nende. Dîba adi udi mua kuitaba bua wewe kumuambila tshidi Bible ulaya bua bualu abu. Yeye kayi mukuteleje dituku adi, udi mua kuanyisha bua kukuteleja “musangu mukuabo.”—Bien. 17:32, MMM.