Mudimu munene wa diyisha utu bantu kabayi banji kumona
Kukadi bidimu bipite pa 100, Bantemu ba Yehowa batu bayisha lumu luimpe. (1 Kol. 9:23) Mu mudimu eu munene wa diyisha utu bantu kabayi banji kumona, tudi tuyisha lumu luimpe mu miakulu nkama ne nkama. Tudi balufikishe mu matunga mapite pa 230. (Mat. 24:14) Kadi bua tshinyi mudimu eu udi ne mushinga? Mmunyi mudiwu wenzeka pa buloba bujima?
Bande wa video wa Les Témoins de Jéhovah: organisés pour prêcher la bonne nouvelle neandamune nkonko eyi ku diambuluisha dia malu adimu adi aleja mishindu mishilangane ya midimu yetu pa buloba bujima. Paudi utangila bande eu, ukebe mua kuandamuna nkonko eyi: (1) Mmunyi mudibu balongolole mudimu wetu ne mudibu baulombola? (2) Mmunyi mudi Tshibambalu tshia difunda, tshia dikudimuna, tshia dizola, dikuata mêyi mu bande ne dipatula bande ya bindidimbi biambuluisha bua kuyisha lumu luimpe? (3) Ntshipatshila kayi tshitudi natshi mu didiundisha biapu bietu bia dipatuila mikanda ne tshibambalu tshia diyitumina bisumbu? (Yone 17:3) (4) Batu bapatula mikanda bungi kayi ku biamu mu tshidimu tshimue? (5) Mikanda yetu ya malu a mu Bible mmiambuluishe bua kuenza tshinyi? (Eb. 4:12) (6) Ntshinyi tshidibu benza bua kuambuluisha bafofo ne bampudi matshi bua kulongabu Bible? (7) Makuta a kuenza nawu mudimu wetu eu atu afuma kuepi? (8) Mmunyi mudi Tshibambalu tshia malu a mpitadi, tshidi tshitangila malu a bisumbu ne tshia malu a mpungilu bituambuluisha? (9) Bu muudi Ntemu wa Yehowa, mmunyi mudi bande wa video eu mukuambuluishe bua kumanya ne kuikala ne dianyisha bua (a) bionso bidi bulongolodi bua Yehowa buenza bua kuyisha lumu luimpe? (b) mêku a Betele mapite pa 100 adi pa buloba bujima? (c) tulasa tua dilongesha batangidi ne bamisionere? (d) mushinga wa kutuadija dituku dionso ne dikonkonona dia mvese wa mu Bible ne kulongolola bisangilu bia lumingu luonso? (e) masanka atudi tupeta patudi tubuela mu bisangilu bietu bia bena Kristo? (f) tshienzeka pa buloba paluabu Mparadizu? (Yesh. 11:9) (g) kudifila mu mudimu wa dinowa udi wenda wenzeka?—Yone 4:35.
Mmalu kayi mimpe avuabu bambe kudi balela bebe, bamanyangana nabu, bantu bautu uya kutangila ne balongi ba Bible pauvua mubaleje bande eu? Kujingakanyi to, leja bantu bande eu ne bambile lumu luimpe.—Mat. 28:19, 20.