Mushindu wa kutuadija kulonga ne bantu mukanda wa Bible ulongesha

Padi muntu umanya mua kutuadija kulonga Bible ne bantu, udi umvua muoyo umusaka bua kulonga nabu. Mukanda wetu mupiamupia wa Bible utu ulongesha tshinyi menemene? neutuambuluishe. Mêyi a ntuadijilu adi mu dibeji 3-7 mmalongolola bimpe bua kumona mua kufikisha muntu ku dilonga Bible ne mukanda eu. Nansha aba batshidi babangilaku mudimu wa buambi nebamone ne: mbitekete bua kutuadija kulonga Bible ne bantu ne mukanda eu.

▪ Udi mua kutuadija ne malu adi mu dibeji 3:

Panyima pa wewe mumane kutela bualu kampanda bua mu ngumu anyi budi butatshisha bantu ba muaba unudi, leja muntu nkonko mifunda ne maleta mafikisha bikole idi mu dibeji 3, ne mulomba bua ayandamune. Pashishe bulula mu dibeji 4-5.

▪ Peshi udi mua kutuadija ne bimfuanyi bidi mu dibeji 4-5:

Udi mua kuamba ne: “Kuakumvuaku disanka bu malu adibu baleja mu bimfuanyi ebi mua kuenzeka anyi?” Anyi udi mua kuebeja ne: “Ku malu onso aa, mbuepi buutu ujinga ne: buenzeke?” Teleja diandamuna diende ne ntema yonso.

Padi muntu uleja mvese udi mumusankishe, umuleje tshidi Bible ulongesha pa bualu abu ne nukonkonone nende bikoso bia mu mukanda bidi biakula pa mvese au. (Tangila kazubu kadi mu dibeji dia tshisakidila etshi.) Konkonona nende bikoso anu bu muutu wenza pautu ulonga Bible ne bantu. Udi mua kubikonkonona mu minite itanu anyi dikumi dituku dia kumpala nansha bimanyine kulu.

▪ Udi kabidi mua kufikisha muntu ku diakula ne malu adi mu dibeji 6:

Leja muntu nkonko idi kuinshi kua dibeji ne muebeja ne: “Ukatuku mudiele lumue lua ku nkonko eyi anyi?” Yeye muleje lukonko alu, ubulule mukanda ne umuleje bikoso bidi biluandamuna. (Tangila kazubu kadi mu dibeji dia tshisakidila etshi.) Panudi nukonkonona bikoso abi, udi ulombola dilonga dia Bible.

▪ Udi mua kuleja muntu mutu dilonga dia Bible dienzeka ne malu adi mu dibeji dia 7:

Bala biambilu bisatu bia kumpala bidi mu dibeji dia 7 ne bulula mpindieu nshapita 3 ne nukonkonone nende tshikoso 1-3 bua kumuleja mushindu wa kulonga. Longolola bua wewe kupingana bua kuandamuna nkonko idi mu tshikoso 3.

▪ Mua kulongolola dikumbula dipiadipia:

Panudi nutua ku ndekelu kua dilonga musangu wa kumpala, longolola mushindu wa kulua kutungunuka ne muyuki. Udi mua kuamba ne: “Mu minite mikese patupu, tudi bamone tshidi Bible ulongesha pa tshiena-bualu tshimpe etshi. Musangu udi ulonda, netuakule bua [ela lukonko lunuandamuna]. Ndiku mua kulua kabidi lumingu lualonda anu dîba dia buena edi bua tuetu kuyukila anyi?”

Bu mudi dituku dia Yehowa dienda disemena, udi utungunuka ne kutupesha bia mudimu bua tuetu kumona mua kuwenza bimpe. (Mat. 28:19, 20; 2 Tim. 3:17) Tuenzayi mudimu bimpe ne mukanda wetu mupiamupia eu bua kutuadija kulonga Bible ne bantu.

Mushindu wa kufila mukanda wa Bible ulongesha

Tshisakidila etshi tshidi ne ngenyi ya bungi ya mushindu wa kufila mukanda wa Bible ulongesha. Bua kuikalabi bimpe menemene, uyambe mu ebe mêyi, wakaje mbuelelu webe wa muyuki bilondeshile bantu ba muaba unudi ne wibidilangane ne malu kampanda adi mu mukanda eu. Udi kabidi mua kuenza mudimu ne imue ngenyi idi miakanyine bantu badi mu teritware webe.​—Tangila Mudimu wetu wa Bukalenge wa Tshiongo 2005, dib. 8.

Armagedone

▪ “Patu bantu bumvua bakula bua Armagedone, batu bela meji ku dibutuka dia bantu ne bintu bionso. Nebikukemeshe bua kumvua ne: Armagedone udi bushuwa bualu buimpe bua tuetu kuindila anyi? [Lekela muntu andamune. Pashishe bala Buakabuluibua 16:14, 16.] Mona muikale nsombelu panyima pa Armagedone.” Bala tshikoso tshia 21 mu dibeji dia 82-84.

Bible

▪ “Misangu ya bungi bantu batu bamba ne: Bible n’Dîyi dia Nzambi. Ukadiku mudiebeje mudi mukanda udi bantu bafunde mua kuikala Dîyi dia Nzambi anyi? [Lekela muntu andamune. Pashishe bala 2 Petelo 1:21 ne tshikoso 5 mu dibeji dia 19-20.] Mukanda eu udi uleja mudi Bible wandamuna nkonko eyi.” Leja nkonko idi mu dibeji 6.

▪ “Mu matuku etu aa, bantu mbamanye malu a bungi menemene. Kadi nkuepi kutudi mua kupeta mibelu mimpe bua kuikala ne disanka ne nsombelu mulenga? [Lekela muntu andamune. Pashishe bala 2 Timote 3:16, 17 ne tshikoso tshia 12 mu dibeji dia 22-23.] Mukanda eu udi umvuija mutudi mua kuikala ne nsombelu udi usankisha Nzambi ne utusankisha petu.” Leja kazubu ne bimfuanyi bidi mu dibeji dia 122-123.

Bipupu/​Makenga

▪ “Patu bipupu bikuata bantu, bavule batu badiebeja bikala Nzambi udi bushuwa utabalela bantu ne umona makenga abu. Ukadiku mudiele pebe lukonko elu anyi? [Lekela muntu andamune. Pashishe bala 1 Petelo 5:7 ne tshikoso tshia 11 mu dibeji dia 11.] Mukanda eu udi uleja muajikija Nzambi makenga a bantu onso kong.” Leja nkonko idi ku ntuadijilu mu dibeji dia 106.

Dîku

▪ “Tuetu bonso tutu basue kuikala ne nsombelu wa disanka mu dîku. Ki mmomu anyi? [Lekela muntu andamune.] Bible udi uleja ne: bua dîku kuikaladi ne nsombelu wa disanka, muntu yonso udi ne bua kuikala ne dinanga anu bu mudi Nzambi.” Bala Efeso 5:1, 2 ne tshikoso 4 mu dibeji dia 135.

Disambila

▪ “Ukadiku mudiebeje bua kumanya mushindu utu Nzambi wandamuna masambila anyi? [Lekela muntu andamune. Pashishe bala 1 Yone 5:14, 15 ne tshikoso tshia 16-18 mu dibeji dia 170-172.] Nshapita eu udi kabidi umvuija bua tshinyi tudi ne bua kusambila Nzambi ne tshitudi mua kuenza bua kutelejaye masambila etu.”

Lufu/​Dibishibua ku lufu

▪ “Bantu ba bungi badi badiebeja tshidi tshifikila muntu padiye ufua. Udi wela meji ne: kudi mushindu wa tuetu kutshimanya anyi? [Lekela muntu andamune. Pashishe bala Muambi 9:5 ne tshikoso 5-6 mu dibeji dia 58-59.] Mukanda eu udi uleja kabidi tshidi dibishibua ku lufu didi Bible mulaye diumvuija bua bafue.” Leja tshimfuanyi tshidi mu dibeji dia 75.

▪ “Patu muntu utudi banange ufua, tutu tujinga bua kumumona tshiakabidi. Ki mmuomu anyi? [Lekela muntu andamune.] Bantu ba bungi bakumvua bimpe pakamanyabu ne: Bible udi ulaya ne: bafue nebajuke. [Bala Yone 5:28, 29 ne tshikoso tshia 16-17 mu dibeji dia 71-72.] Nshapita eu udi kabidi wandamuna nkonko eyi.” Leja nkonko idi ku ntuadijilu kua dibeji dia 66.

Muoyo wa kashidi

▪ “Bantu ba bungi mbasue kuikala ne makanda a mubidi ne kulala bidimu bia bungi pa buloba. Bu kuoku mushindu, newitabe bua kushala ne muoyo kashidi anyi? [Lekela muntu andamune. Pashishe bala Buakabuluibua 21:3, 4 ne tshikoso tshia 17 mu dibeji dia 53-54.] Mukanda eu udi umvuija mushindu uudi mua kupeta muoyo wa tshiendelele ne muikala nsombelu pakumbana malu aa.”

Mvita/​Ditalala

▪ “Bantu bonso badi bakeba ditalala. Udi wela meji ne: kutekemena ditalala pa buloba ntshilota anyi? [Lekela muntu andamune. Pashishe bala Musambu wa 46:8, 9.] Mukanda eu udi umvuija muajikija Nzambi mvita ne muatekaye ditalala pa buloba bujima.” Leja tshimfuanyi tshidi mu dibeji dia 35, ne konkononayi tshikoso tshia 17-21 mu dibeji dia 33-34.

Nzubu

▪ “Mu matunga a bungi, mbilue bualu bukole bua kupeta nzubu muimpe wa kusombela. Udi wela meji ne: dituku dikuabu muntu yonso neapete muaba muimpe wa kusombela anyi? [Lekela muntu andamune. Pashishe bala Yeshaya 65:21, 22 ne tshikoso tshia 20 mu dibeji dia 34.] Mukanda eu udi uleja muakumbana bualu budi Nzambi mulaye ebu.”

Tshitendelelu

▪ “Bantu ba bungi mbatuadije kumona ne: bitendelelu ke bidi bikebela bantu ntatu pamutu pa kuyijikija. Udi wela meji ne: bitendelelu bidi bilombola bantu mu njila muimpe anyi? [Lekela muntu andamune. Pashishe bala Matayo 7:13, 14 ne tshikoso 5 mu dibeji dia 146.] Nshapita eu udi ukonkonona malu asambombo adi aleja tshitendelelu tshidi Nzambi wanyisha.” Leja malu aa mu dibeji dia 147.

Yehowa Nzambi

▪ “Bantu ba bungi badi bitabuja Nzambi mbasue kudiumvua pabuipi nende. Kadi uvuaku mumanye ne: Bible udi utulomba bua kusemena kudi Nzambi anyi? [Lekela muntu andamune. Pashishe bala Yakobo 4:8a ne tshikoso tshia 20 mu dibeji dia 16.] Mbenze mukanda eu bua kuambuluisha muntu bua kumanya Nzambi bimpe ku diambuluisha dia Bible wende.” Leja nkonko idi ku ntuadijilu mu dibeji dia 8.

▪ “Bantu ba bungi batu basambila bua dîna dia Nzambi ditumbe. Ukadiku mudiebeje bua kumanya dîna adi anyi? [Lekela muntu andamune. Pashishe bala Musambu wa 83:18 ne tshikoso 2-3 mu dibeji dia 195.] Mukanda eu udi uleja tshidi Bible ulongesha menemene pa bidi bitangila Yehowa Nzambi ne tshidiye mulongoluele bantu.”

Yezu Kristo

▪ “Bantu ba bungi mbamanye Yezu Kristo. Bamue badi bamba ne: uvua muntu wa dikema wa pa buloba apa tshianana. Bakuabu badi bamutendelela bu Nzambi Wa-Bukole-Buonso. Udi wela meji ne: kuitabuja Yezu Kristo nunku kudi ne mushinga anyi?” Lekela muntu andamune. Pashishe bala Yone 17:3 ne tshikoso 3 mu dibeji dia 37-38. Leja muntu nkonko idi ku ntuadijilu muinshi mua tshiena-bualu tshia nshapita.

[Kazubu mu dibeji 5]

Mushindu wa kulomba mapa

“Biwikala musue kufila kebe kakese kaudi naku bua kukuatshisha mudimu wa pa buloba bujima eu, nenkangate ne disanka dionso.”

“Nansha mutudi katuyi tupanyisha mikanda yetu, tutu tuitaba makuta nansha makese atu bantu bafila ku budisuile bua kukuatshisha mudimu wetu wa pa buloba bujima.”

“Udi mua kuikala udiebeja ne: mmunyi mutudi tufika ku dienza mudimu eu. Mbualu mudimu eu udi wenzeka ne diambuluisha dia mapa adi bantu bafila ku budisuile. Biwikala musue kufila diebe dipa nansha dikese lelu’eu, nendiangate ne muoyo mujima.”

(1) Lukonko, (2) Mvese, ne (3) Nshapita

Mushindu mupepele wa kuleja mukanda wa Bible utu ulongesha tshinyi menemene? ngua: (1) kujula lukonko, (2) kubala mvese muakanyine, ne (3) kuleja nshapita udi wakula pa tshiena-bualu atshi mu mukanda ne kubala nkonko idi ku ntuadijilu muinshi mua tshiena-bualu tshia nshapita. Pikala muntu ne dijinga dia kumanya malu makuabu, udi mua kumuleja mutu dilonga dia Bible dienzeka pa kukonkonona nende bikoso bia ku ntuadijilu kua nshapita au. Tudi mua kutuadija dilonga dia Bible mushindu eu anu musangu wa kumpala utudi tupetangana ne muntu anyi patudi tumupinganyina.

▪ “Udi wela meji ne: bantu ba bungi badi mua kufika ku dimanya Mufuki wetu wa bukole buonso bu mudi Bible wamba muaba eu anyi?” Bala Bienzedi 17:26, 27, ne lekela muntu andamune. Pashishe nuye mu nshapita wa 1.

▪ “Pa kumona ntatu itudi nayi lelu’eu, udi umona ne: mêyi adibu bamba muaba eu adi mua kutukolesha ku muoyo ne kutupetesha ditekemena anyi?” Bala Lomo 15:4, ne lekela muntu andamune. Pashishe nuye mu nshapita 2.

▪ “Bu wewe ne bukokeshi bua kushintulula malu nunku, kuvuaku mua kuashintulula anyi?” Bala Buakabuluibua 21:4, ne lekela muntu andamune. Pashishe nuye mu nshapita 3.

▪ “Udi wela meji ne: bana nebasankaku pabu bu mudibi bileja mu musambu wa kale eu anyi?” Bala Musambu wa 37:10, 11, ne lekela muntu andamune. Pashishe nuye mu nshapita 3.

▪ “Udi witaba ne: mêyi aa neakumbanaku anyi?” Bala Yeshaya 33:24, ne lekela muntu andamune. Pashishe nuye mu nshapita 3.

▪ “Ukadiku mudiebeje bua kumanya bikala bafue bamanye mudi malu mashale enzeka panu anyi?” Lekela muntu andamune. Pashishe bala Muambi 9:5, ne nuye mu nshapita 6.

▪ “Udi wela meji ne: dituku dikuabu netumone kabidi balela ne balunda betu bakadi bafue bu mudi Yezu ubiamba mu mvese eyi anyi?” Bala Yone 5:28, 29, ne lekela muntu andamune. Pashishe nuye mu nshapita wa 7.

▪ “Udi mumone bishi, ntshinyi tshidi tshikengela kuenza bua disua dia Nzambi kuenzekadi pa buloba bu mudidi dienzeka mu diulu mudi disambila edi diamba?” Bala Matayo 6:9, 10, ne lekela muntu andamune. Pashishe nuye mu nshapita wa 8.

▪ “Udi witaba ne: tudi mu matuku adibu bamba muaba eu anyi?” Bala 2 Timote 3:1-4, ne lekela muntu andamune. Pashishe nuye mu nshapita wa 9.

▪ “Bantu ba bungi badi badiebeja bua tshinyi ntatu idi yenda anu ikola. Ukadiku mumone tshidi mvese eu wamba anyi?” Bala Buakabuluibua 12:9, ne lekela muntu andamune. Pashishe nuye mu nshapita wa 10.

▪ “Kutuku muanji kukeba diandamuna dia lukonko bu mudi elu anyi?” Bala Yobo 21:7, ne lekela muntu andamune. Pashishe nuye mu nshapita wa 11.

▪ “Udi wela meji ne: kutumikila mibelu ya Bible kudi mua kuambuluisha bantu bua kuikala ne disanka mu dîku anyi?” Bala Efeso 5:33, ne lekela muntu andamune. Pashishe nuye mu nshapita wa 14.

Udi mua kubala ne kufunda dilonga dia Bible mu luapolo anu wewe mumane kudilombola misangu ibidi kunyima kua musangu wa kumpala uuvua muleje mushindu utu dilonga dienzeka ne padibi bimueneka ne: neditungunuke.