Tshingenza ntshinyi pikalabu bakeba kungela tuntu tukese tua mu mashi anyi bakeba kungondapa ne ngondapilu idi ilomba mashi anyi meme muine? — TSHIBUTSHILU TSHIA MIKANDA TSHIA KU ENTERNETE tshia Watchtower

Lama

Tshingenza ntshinyi pikalabu bakeba kungela tuntu tukese tua mu mashi anyi bakeba kungondapa ne ngondapilu idi ilomba mashi anyi meme muine?

Bible udi welela bena Kristo mukenji wa ‘kulekela mashi.’ (Bien. 15:20) Ke bualu kayi Bantemu ba Yehowa kabatu bitaba bua babele mashi onso mu kabujima kawu anyi bintu binene bidi bienza mashi bu mudi globile mikunze, globile mitoke, plakete anyi plasma to. Bobu bine kabatu nansha bafila abu mashi bua kuondopabu nawu bantu bakuabu anyi baalamisha bua kubondopabu nawu bobu bine to.—Lew. 17:13, 14; Bien. 15:28, 29.

Tuntu tukese tua mu mashi ntunganyi, ne bua tshinyi dituela muntu mbualu budi muena Kristo yonso ne bua kudiangatshila dipangadika yeye nkayende?

Tuntu tukese tua mu mashi mbintu bitubu bapatuila mu mashi padibu baatata. Tshilejilu, badi mua kutata plasma (tshimue tshia ku bintu binene binayi bidi bienza mashi) ne kupatula bintu bidi bilonda ebi: mâyi (bia pa 100 bitue ku 91); proteyine bu mudi albimine, globiline ne fibrinojene (bia pa 100 bitue ku 7); ne bintu bikuabu bitu bidisha mubidi bu mudi: hormone, kapepe, vitamine, bisote ne bintu bikuabu bia muendundu (bia pa 100 bitue ku 1,5).

Mukenji wa dilekela mashi udi kabidi utangila tuntu tukese tua mu mashi etu anyi? Mbikole bua kuandamuna ne: to anyi eyowa. Bible kêna anu uleja tshia kuenza mu bualu bua kantu ne kantu konso ka mu mashi to.a Kadi tshitudi bamanye ntshia ne: tuntu tukese tua mu mashi tua bungi ntupatuila anu mu mashi atu bamue bantu bafila bua kuondapa nawu bantu bakuabu. Muena Kristo yonso udi ne bua kudiangatshila diende dipangadika bilondeshile kondo kende ka muoyo, dia kuitaba anyi dia kubenga ngondapilu wa bamuondopa ne tuntu etu.

Paudi wangata mapangadika a mushindu eu, udiele nkonko eyi: Ndiku mumanye ne: pandi mbenga tuntu tukese tuonso tua mu mashi etu bidi biumvuija ne: ndi mbenga kabidi ne amue manga, bu mudi aa atu aluisha tuîshi kampanda (virus) ne masama anyi manga adi ambuluisha mashi bua kukuatakanawu bua kuakamisha anyi? Ndiku mua kumvuija munganga bua tshinyi ndi mbenga anyi ngitaba bua kungelabu tumue tuntu tukese tua mu mashi anyi?

Bua tshinyi ndi ne bua kudiangatshila dipangadika meme nkayanyi mu bualu bua imue ngondapilu idi ilomba mashi anyi meme muine?

Nansha mudi bena Kristo kabayi bafila mashi abu bua kuelabu bantu anyi baalamisha bua kulua kubelawu bobu bine, amue malu anyi mateta a mashi atu baminganga benza kaatu anu abengangana ne mikenji ya mu Bible to. Ke bualu kayi muntu yonso udi ne bua kudiangatshila dipangadika bilondeshile kondo kende ka muoyo, dia kubenga anyi dia kuitaba imue ngondapilu itu ilomba dienza mudimu ne mashi ende yeye muine.

Bangabanga ne kuangata dipangadika dia mushindu eu, udiele nkonko eyi: Bikalabu mua kuanji kuenza bua ndambu wa mashi anyi ikale upitshila mu biamu, pamuapa banji baimanyika katupa kîpi kaatshiyi anyunguluka abuela mu mubidi apatuka, kondo kanyi ka muoyo nekanganyishile bua kuangata mashi aa bu ne: atshidi anu mashi anyi, kabiyi bilomba nunku bua ‘baapumune panshi’ anyi? (Dut. 12:23, 24) Kondo kanyi ka muoyo kalongesha kudi Bible kadi mua kundumbuluisha bikalabu dîba divuabu bangondapa adi bankoke ndambu wa mashi, baasukule ne balue kuangelulula mu mubidi anyi? Ndiku mumanye bimpe ne: pandi mbenga ngondapilu yonso ya bangondapa ne mashi anyi meme bidi biumvuija ne: ndi mbenga ngondapilu bu mudi wa ditata mashi anyi wa dienza mudimu ne biamu pa muaba wa muoyo anyi wa bisulusulu anyi? Mvuaku musambile kumpala kua meme kuangata dipangadika edi anyi?b

Mmapangadika kayi andi mua kudiangatshila?

Tangila tuzubu tudi mu mabeji abidi adi alonda aa. Kazubu ka 1 kadi kaleja tumue tuntu tukese tua mu mashi ne mushindu utu baminganga bondopangana natu. Ku tuntu tuonso etu, enza kamanyinu ku luseke lua tuudi mua kubenga anyi kuitaba. Kazubu 2 kadi kaleja imue ngondapilu itubu batamba kuondopangana nayi ya bondopa muntu ne mashi ende yeye nkayende. Ku ngondapilu yonso eyi, enza kamanyinu ku luseke lua iudi mua kubenga anyi kuitaba. Mabeji abidi aa ki mmikanda idibu mua kunemeka mu malu a luondapu to, kadi mandamuna audi mufundapu neakuambuluishe bua wewe kuuja karte kebe ka Instructions médicales/Désignation d’une personne de confiance (DPA).

Mapangadika ebe ikale anu audi mudiangatshile wewe nkayebe, kuyi mulonde kondo ka muoyo ka muntu mukuabu to. Kabidi, muena Kristo nansha umue kêna ne bua kulumbuluisha mukuabu bua mapangadika adiye muangate to. Mu malu aa, ‘muntu ne muntu neadiambuile bujitu buende.’—Gal. 6:4, 5.

[Mêyi adi kuinshi]

a Udi mua kupeta malu makuabu mu Tshibumba tshia Nsentedi tshia dia 15 Kabalashipu 2004, dibeji dia 29-31.

b Udi mua kupeta malu makuabu mu Tshibumba tshia Nsentedi tshia dia 15 Kasuamansense 2000, dibeji dia 30-31, ne mu ditadi dia Des alternatives à la transfusion—Documentaires.

KAZUBU KA 1

BIDI BIBI BUA BENA KRISTO

DIPANGADIKA DIUDI NE BUA KUDIANGATSHILA

MASHI ONSO

TUNTU TUKESE TUA MU MASHI

Biudi ne bua kusungula

PLASMA

ALBIMINE—BIA PA 100 BITUE KU 4 BIA PLASMA

Mproteyine udibu bapatule mu plasma. Albimine ya mishindu mikuabu itu kabidi mu mitshi, mu biakudia bu mudi mabele ne mayi, ne mu mabele a mamu udi wamusha muana. Imue misangu batu bela albimine wa mu mashi mu manga atubu bapesha muntu udi mujimije mashi a bungi anyi udi muoshike bibi. Manga aa adi mua kuikala ne albimine bia pa 100 bitue ku 25. Manga makuabu a bungi batu baenza ne albimine mikese menemene, bu mudi amue manga a érythropoïétine (EPO).

____ Ndi ngitaba albimine

anyi

____ Ndi mbenga albimine

IMINOGLOBILINE—BIA PA 100 BITUE KU 3 BIA PLASMA

Ntuntu tukese tua mu proteyine tudibu mua kuenza natu amue manga adi aluisha tuîshi kampanda ne masama a bia pa muminu (kakela, bilundu), disama dia ntetanos, dia mutshima (hépatite virale) ne dia mukupa. Badi kabidi mua kuenza natu mudimu bua kukuba muana utshidi munda ku amue masama a lufu, ne kuenza manga a kuondopa nawu muntu udibu basume kudi nyoka anyi kudi ntande.

____ Ndi ngitaba iminoglobiline

anyi

____ Ndi mbenga iminoglobiline

BIKUATAKAJI BIA MASHI—BIA PA 100 BISHADILE KU 1 BIA PLASMA

Mmishindu kabukabu ya proteyine itu yenza bua mashi kukuatakanawu ne kulekelawu dipatuka. Batu bayipesha bamue babedi batu mashi apatuka tshianana tshianana. Batu kabidi benza nayi manga a kukamisha nawu mputa padibu bayitela ne bua kuimanyika mashi panyima pa dipanda dia muntu. Bumue bua ku manga a nunku adibu benza ne bikuatakaji bia mashi ke cryoprécipité. Umanye ne: Mpindieu bakadi benza bimue bikuatakaji bia mashi ne bintu bidi kabiyi biangatshila mu mashi to.

____ Ndi ngitaba bikuatakaji bia mashi bidi biangatshila mu mashi

anyi

____ Ndi mbenga bikuatakaji bia mashi bidi biangatshila mu mashi

GLOBILE MIKUNZE

HEMOGLOBINE—BIA PA 100 BITUE KU 33 BIA GLOBILE MIKUNZE

Tshintu etshi mproteyine utu wendesha kapepe kadi ne oksijene mu mubidi mujima ne uya ne kadi ne karbone mu bisulusulu. Batu imue misangu bapesha babedi batu mashi abuuka bikole anyi badi baajimije musangu umue a bungi menemene manga menza ne hemoglobine wa mu mashi a muntu anyi a nyama.

____ Ndi ngitaba hemoglobine

anyi

____ Ndi mbenga hemoglobine

HEMINE—BIA PA 100 BISHADILE KU 2 BIA GLOBILE MIKUNZE

Ntshintu tshidi tshikanda mudimu wa proteyine idibu babikila ne: anzime, tshitu mu hemoglobine. Batu bondopa natshi amue masama a mu mashi atu amueneka ku mpukampuka (porphyrie) atu akuata tshifu anyi mala, tujilujilu tuonso ne buongo ne mijilu yonso ne dimuma dia muoyo.

____ Ndi ngitaba hemine

anyi

____ Ndi mbenga hemine

GLOBILE MITOKE

INTERFERON—KANTU KAPITE BUKESE KA MU GLOBILE MITOKE

Mproteyine idi iluisha amue masama makebesha kudi virus ne a kansere. Interferon ya bungi ki mmiangatshila mu mashi to. Imue ya kudiyi mmienza ne tuntu tukese tua mu globile mitoke ya muntu.

____ Ndi ngitaba interferon idi miangatshila mu mashi

anyi

____ Ndi mbenga interferon idi miangatshila mu mashi

PLAKETE

Too ne lelu, ki mbanji kutata plakete bua kupatulamu tuntu tukese tua kuondopa natu bantu to.

KAZUBU 2

DIPANGADIKA DIUDI NE BUA KUDIANGATSHILA
NGONDAPILU ITU ILOMBA ANU MASHI EBE WEWE MUINE
TSHIDI NGONDAPILU AU	BULENGA BUENDE	Biudi ne bua kusungula (Pamuapa udi mua kuanji kuyukila ne munganga kumpala kua wewe kuitaba anyi kubenga ngondapilu eyi.)
DIKOKA MASHI A MUABA UDIBU BAPANDA	Mashi kaena ajimina a bungi to. Badi bakoka mashi adi apatuka mu mputa anyi mu mubidi wa muntu padibu bamupanda. Pashishe baasukula anyi baatata, balua kuapingaja mu mubidi wa muntu au, pamuapa kabayi banji kuimanyika luendu luawu.	____ Ndi ngitaba ____ Ndi mua kuitaba anyi kubengac ____ Ndi mbenga
DIENGULULA MASHI (HÉMODILUTION)	Mashi kaena ajimina a bungi to. Padibu bapanda muntu, badi bakoka mashi adi apatuka, baatuma mu bibombi ne bapingaja buanga budi kabuyi buenza ne mashi pa muaba wawu. Padibu bamuelabu, mashi adi ashala mu mubidi wende adi enguluka enza bu adi avula, kadi mikale ne globile mikunze anu mikese. Patshidibu bamupanda apu anyi padibu bajikija, badi bamuelulula mashi avuabu balamine mu bibombi au.	____ Ndi ngitaba ____ Ndi mua kuitaba anyi kubengad ____ Ndi mbenga
DIPITSHISHILA MASHI MU BIAMU	Mashi adi atungunuka anu ne luendu luawu. Mashi adi apitshila mu tshiamu tshidi tshienza mudimu bu muoyo anyi bisulusulu, mudiwu apeta kapepe ka oksijene, pashishe apingana kabidi mu mubidi wa mubedi.	____ Ndi ngitaba ____ Ndi mua kuitaba anyi kubengae ____ Ndi mbenga
DITATA MASHI (DIALYSE)	Mudimu bu wa tshitupa kampanda tshia mubidi. Mu ngondapilu eu, badi bapitshishila mashi mu tshiamu tshidi tshiatata ne tshiasukula kumpala kua kupinganawu mu mubidi wa mubedi.	____ Ndi ngitaba ____ Ndi mua kuitaba anyi kubengaf ____ Ndi mbenga
DIJIKA MUABA UDI MÂYI A MU MUONGO APATUKILA	Didi dimanyika dipatuka dia mâyi a mu muongo. Badi bangata tundambu tua mashi a mubedi muine, bamutuatu mu kakobakoba kadi kajingile buongo bua mu muongo. Batu benza nunku bua kujika kasoso kadi mâyi a mu muongo apatukila.	____ Ndi ngitaba ____ Ndi mua kuitaba anyi kubengag ____ Ndi mbenga
DIPATULA PLASMA MU MASHI (PLASMAPHÉRÈSE)	Didi diambuluisha bua kuondapa amue masama. Badi bakoka mashi baatata bua kumushamu plasma. Mpindieu bela buanga mu mashi budi bupingana pa muaba wa plasma, balua kuapingaja mu mubidi wa mubedi. Bamue baminganga badi mua kujinga bua kupingaja plasma wa muntu mukuabu pa muaba wa plasma mubi udibu bumushe mu mubidi wa mubedi. Bobu bajinga kuangata plasma wa muntu mukuabu nanku, muena Kristo kêna ne bua kuitaba to.	____ Ndi ngitaba ____ Ndi mua kuitaba anyi kubengah ____ Ndi mbenga
DIENZA KAMANYINU MUABA UDI DISAMA	Didi diambuluisha bua kumanya muaba udi disama anyi bua kudiondopa. Badi bakoka ndambu wa mashi, baasambakaja ne buanga, baapingaja mu mubidi. Bungi bua mêba adi mashi au mua kushala pambelu kaayi mu mubidi wa muntu budi mua kushilangana.	____ Ndi ngitaba ____ Ndi mua kuitaba anyi kubengai ____ Ndi mbenga
GEL PLAQUETTAIRE AUTOLOGUE (LUAYIYI LUA KUKUATAKAJA NALU PLAKETE LUENZA NE MASHI EBE WEWE MUINE)	Udi ukamisha mputa, mashi kaayi kabidi apueka a bungi. Badi bakoka ndambu wa mashi baasambakaja mu buanga bua mâyimâyi buikale ne plakete ne globile mitoke ya bungi. Batu bafita luayiyi elu miaba idibu bapande muntu anyi mu mputa mikuabu. Umanye ne: Imue luayiyi batu bayenza ne bikuatakaji bia mashi a ngombe.	____ Ndi ngitaba ____ Ndi mua kuitaba anyi kubengaj ____ Ndi mbenga

c d e f g h i j Dimanyisha: Mishindu ya diondopangana ne ngondapilu eyi itu ishilangana bilondeshile munganga ne munganga. Ebeja munganga udi ukondopa bua akumvuije bimpe tshidi ngondapilu yonso udiye usua kukuondopa nende ulomba bua wewe kumanya ni kêna utupa ku mikenji ya Nzambi anyi ubengangana ne mapangadika audi mua kudiangatshila bilondeshile kondo kebe ka muoyo.