Tudilongolole bimpe bua Tshivulukilu

Tuetu bayidi ba Kristo tudi ne disanka ne diakalenga dia kudilongolola bimpe bua dituku ditutu tuvuluka lufu lua Yezu Kristo ku dilolo. (Luka 22:19) Mmalu kayi atudi ne bua kuenza bua kudilongolola bua Tshivulukilu?

▪ Dîba ne muaba: Muntu yonso udi ne bua kumanya dîba ne muaba wenzekela Tshivulukilu. Padi bisumbu bia bungi bienzela Tshivulukilu mu Nzubu wa Bukalenge umue, mbimpe kufika kumpala kua dîba ne kumbuka diakamue padi tshienu tshisangilu tshijika bualu dîba didi dishala bua tshisangilu tshikuabu kutuadija ndikese. Nudi ne bua kuepuka bua kunguila patupu mu mishiku ya mbelu, mu njila, muaba wa dimanyikila mashinyi, mioto anyi makalu.

▪ Mabeji a dibikila nawu bantu: Bamanyishi bonso mbapete mabeji a kubikila nawu bantu anyi? Mbamanye malu adi mafundamu anyi? Nukadi bambulule mushindu unuaafila bua kubikila bantu anyi? Mbanganyi banuabikila? Nuenze muenu muonso bua kufila mabeji onso a dibikila nawu bantu mu Tshivulukilu.

▪ Mua kufikisha bamue bantu muaba wa Tshivulukilu: Bamue bantu badi basue bulelela ne bana betu bakuabu badi mua kuikala dijinga ne diambuluisha bua kufika muaba wa Tshivulukilu. Mmushindu kayi unudi balongolole bua kubambuluisha?

▪ Mampa ne mvinyo: Numanye ne: kanuena mua kupitshisha mampa ne mvinyo kumpala kua dîba kadiyi dianji kubuela to. Nulongolole bua kutuadila muela manyi yonso udi kayi ne mushindu wa kufika mu Tshivulukilu diampa ne mvinyo. Nudi ne bua kukeba mampa ne mvinyo bidi biakanyine ne kuya nabi muaba unuenzela Tshivulukilu kumpala kua dîba.​—Bala Tshibumba tshia Nsentedi tshia dia 15 Luishi 2003, dibeji dia 14-15, tshikoso tshia 14, 17.

▪ Nzubu wa Bukalenge: Nulongolole Nzubu wa Bukalenge ne numusukule kumpala kua dîba. Nudi ne bua kuya ne malongo, vere, mêsa ne tshilamba tshia kubuikilapu tshimpe ku Nzubu wa Bukalenge ne kubiteka pa muaba wabi kumpala kua dîba. Nuenu nuenzela Tshivulukilu muaba mukuabu, nukebe biamu bia mêyi bimpe kumpala kua dîba bua bantu bonso bateleje ngamba-malu bimpe. Nudianjile kusungula bakididianganyi ne bana betu badi ne bua kuendesha mampa ne mvinyo ne nubaleje mua kuenzabu midimu yabu bimpe. Nubambile kabidi bua bavuale bimpe ne bakoseshe nsuki yabu bimpe.

Tshivulukilu tshia lufu lua Yezu Kristo ntshikondo tshia mushinga mukole. Ke bualu kayi tudi ne bua kudilongolola bimpe muntu yonso pa nkayende ne mu tshisumbu. Yehowa neabeneshe bantu bonso badi banyisha bionso bidiye mutuenzele ku diambuluisha dia mulambu wa Muanende munanga Yezu Kristo.