Mushindu wa kuikala ne disanka

TUETU bonso tutu basue kuikala ne disanka, ki mmuomu anyi?​— Kadi ki mbantu bonso batu ne disanka to. Udiku mumanye ne: mbua tshinyi anyi?​— Mbualu ki mbalonge mua kumanya tshidi menemene tshifila disanka to. Badi bela meji ne: kuikala ne bintu bia bungi ke mushindu wa kuikala ne disanka. Kadi padibu bapeta bine bintu abi, disanka diabu kadiena nansha dishala mutantshi mule.

Bualu bunene menemene mbuobu ebu. Mulongeshi Munene wakamba ne: ‘Kupa kudi kutamba kuangata kusankisha muntu.’ (Bienzedi 20:35) Nunku, mmushindu kayi udi muntu mua kuikala ne disanka?​— Mpadiye upesha bakuabu bintu ne ubenzela malu. Uvuaku mumanye bualu ebu anyi?​—

Tuanjayi kuela meji bikole pa bualu ebu. Yezu wakambaku ne: muntu udi upeta tshintu kampanda tshidibu bamupesha kakuikala ne disanka anyi?​— Tòo, kakamba nanku to. Wewe si utu musue bua bantu bakupesheku tshintu, ki mmuomu anyi?​— Bantu bonso batu basue nanku. Bitu bituenza disanka patudi tupeta bintu bilenga.

Kadi Yezu wakamba ne: kudi disanka dia bungi patudi tufila. Nunku nganyi uudi wewe mua kuamba ne: mmupeshe bantu bintu bia bungi kupita bantu bonso?​— Bushuwa, n’Yehowa Nzambi.

Bible udi wamba ne: Nzambi ‘utu wapa bantu bonso muoyo ne mupuya ne bintu bionso.’ Udi utulokeshila mvula ututemeshila ne munya bua bikunyibua bimene tupete biakudia. (Bienzedi 14:17; 17:25) Kabiena bikemesha padi Bible ubikila Yehowa ne: “Nzambi wa disanka”! (1 Timote 1:11) Kupesha bakuabu bintu ntshimue tshia ku malu atu avuija Nzambi ne disanka. Tuetu petu patudi tufila nanku, bidi mua kutupesha disanka.

Mpindieu, ntshinyi tshitudi mua kupesha bantu bakuabu? Udi mua kuamba tshinyi?​— Imue misangu tshintu tshia kupesha muntu tshidi tshilomba makuta. Padibi bikale tshintu tshidi mu makazen, udi ne bua kutshisumba ne makuta. Nanku pawikala musue kupesha muntu tshintu tshia mushindu au, udi ne bua kulama makuta too ne pawapeta makuta makumbane bua kutshisumba.

Kadi ki mbambe ne: bintu bionso bia kupeshangana bidi ne bua kufumina anu mu makazen to. Tshilejilu, dituku didiku munya mukole, dikopo dia mâyi matalale ditu dimpe be! Nanku paudi upesha muntu udi ne nyota tshintu tshia nunku, udi wewe mua kumvua disanka diudi upeta bualu udi mumupeshetshi.

Dituku dikuabu wewe ne mamuebe nudi mua kulamba bitumbula bimpe. Bidi bisankisha. Kadi ntshinyi tshiudi mua kuenza ne bimue bitumbula abi tshidi mua kutamba kukusankisha bikole pamutu pa kubidia bionso wewe nkayebe?​— Eyowa, udi mua kupesha pende umue wa ku balunda bebe ndambu. Newanyisheku bua kuenza nunku imue misangu anyi?​—

Mulongeshi Munene ne bapostolo bende bavua bonso bamanye disanka didi dimueneka patudi tupeshangana tshintu. Udiku mumanye tshiakapeshabu bantu bakuabu anyi?​— Tshivua tshintu tshitambe buimpe kupita bionso pa buloba apa! Bavua bamanye bulelela budi butangila Nzambi, ne bavua babumanyishe bakuabu ne disanka. Bakenza mudimu eu kabayi bakeba bua muntu kubapeshaye makuta to.

Dimue dituku mupostolo Paulo ne mulunda wende wa menemene muyidi Luka bakamonangana ne muntu mukaji mukuabu uvua pende musue kupeta disanka dia kufila. Bakapetangana nende lua ku musulu kampanda. Paulo ne Luka bavua baye kuine aku bualu bavua bumvue ne: uvua muaba wa disambila. Bivua bilelela bualu pakafikabu, bakasangana bamue bantu bakaji basambila.

Paulo wakatuadija kuambila bantu bakaji abu lumu luimpe ludi lutangila Yehowa Nzambi ne Bukalenge buende. Umue wa ku bakaji abu uvua Ludia, ne yeye wakateleja ne ntema mikole. Pashishe, Ludia wakasua kuenza bualu kampanda bua kuleja ne: uvua bushuwa munange lumu luimpe luvuaye mumvue. Nanku wakasengelela Paulo ne Luka ne: “Panuikala bammone ne: ndi mulamatshi wa [Yehowa], nuvue kusombela ku nzubu kuanyi.” Nenku yeye wakababikidisha ku nzubu kuende.​—Bienzedi 16:13-15, MMM.

Ludia uvua ne disanka dia kuakidila basadidi ba Nzambi abu mu nzubu muende. Uvua mubanange bualu bavua bamuambuluishe bua kumanya malu adi atangila Yehowa ne Yezu ne a mushindu wikala bantu mua kupeta muoyo wa tshiendelele. Biakamusankisha bikole bua muvuaye mupeshe Paulo ne Luka biakudia ne muaba wa kulala. Nunku difila dia Ludia adi diakamusankisha bualu uvua menemene ne dijinga dia kufila. Ebu mbualu butudi ne bua kuikala tuvuluka. Muntu kampanda udi mua kutuambila ku bukole ne: tudi ne bua kufila tshintu kampanda. Kadi bua kuamba bulelela, bituikala katuyi ne muoyo wa kufila to, difila dietu kadiakutusankisha to.

Tshilejilu wewe muikale ne bombo webe uudi musue kudia. Mpindieu meme mukuambile ne: upesheku pende muana mukuabu, neusanke bua kumupesha anyi?​— Kadi mpindieu biobi bienzeke ne: udi ne bombo webe au pashishe upetangana ne mulunda webe uutu munange bikole. Lungenyi luolu lukuvuile wewe nkayebe bua kupeshaku pende mulunda webe au, kabiakukusankishaku anyi?​—

Imue misangu tudi banange muntu kampanda bikole menemene ne basue kumupesha tshintu tshitudi natshi tshionso tshijima katuyi tulama nansha kantu buetu tuetu. Bu mutudi tuenda tunanga Nzambi bikole, ke meji atudi ne bua kuikala nau kudiye.

Mulongeshi Munene uvua mumanye mukaji mukuabu mupele uvua ne meji au. Wakamumona ku ntempelo ku Yelushalema. Uvua anu ne tukuta tubidi patupu; ke tuende tuonso tuvuaye natu. Kadi wakela tukuta atu tuonso tubidi mu mushete wa mapa mulongolola bua midimu ya ntempelo. Kakuvua muntu mumuenzeje bua kutuela to. Bantu ba bungi bavua muaba au kabavua mene nansha bamanye tshivuaye muenze to. Wakenza nanku bualu uvua muanyishe ne kabidi bualu uvua munange Yehowa bikole menemene. Biakamuenza disanka bua muvuaye mufile.​—Luka 21:1-4.

Kudi mishindu ya bungi ya kufila. Udiku mua kuvuluka mikuabu anyi?​— Tuetu tufila bualu tudi menemene basue kufila, netuikale ne disanka. Ke bua tshinyi Mulongeshi Munene udi utuambila ne: ‘Nupe bantu bintu.’ (Luka 6:38) Tuetu tupeshangana bintu, netuikale tusankisha bantu bakuabu. Ne tuetu bine netuikale ne disanka dia bungi kupita bonso!