Newandamune munyi?

1. Padibu batuela lukonko, bua tshinyi bidi bikengela kuidikija Yezu?

¹ Too ne lelu eu, bantu batu anu bakema bua mushindu uvua Yezu wandamuna nkonko ivuabu bamuela. Tuidikijayi Yezu padibu batuela petu nkonko mu buambi.​—1 Pet. 2:21.

2. Leja tshidi mua kutuambuluisha bua kuandamuna nkonko bimpe.

² Anji kuteleja: Yezu uvua wanji kukeba bua kumanya tshivua muntu umuelela lukonko. Imue misangu mbimpe kuanji kuela muntu tukonko tukuabu bua kumanya tshidiye muelele lukonko menemene. Tshilejilu, muntu udi mua kukuebeja ne: “Nutu nuitabuja Yezu anyi?” eku muikale usua kumanya tshitutu katuyi tuenzela fete wa Nowele. Paudi umanya bimpe dijinga dilelela dia muntu, apu udi mua kumueleshisha meji bimpe menemene.​—Luka 10:25-37.

3. Tshidi mua kutuambuluisha bua kuandamuna nkonko biakane ntshinyi?

³ Andamuna ne Dîyi dia Nzambi: Mbitambe buimpe kuandamuna nkonko ne Bible. (2 Tim. 3:16, 17; Eb. 4:12) Mukanda wa Comment raisonner ne kakanda ka “Mua kutuadija ne kutungunuka ne mayuki pa Bible” (kadi kabidi mu Bible wa Traduction du monde nouveau) bitu bitupepejila mua kuandamuna nkonko bimpe. Muntu yeye kayi umona Bible bu Mukanda wa Nzambi, umuleje ne budimu buonso malu adi Bible wamba. Umulombe akonkonone bikole mudi Bible muikale mukanda wa meji mapite. Wewe widikija Yezu, mandamuna ebe neikale ‘bu bimuma bia tshiamu tshia or mu tshitekelu tshia argent,’ mbuena kuamba ne: neikale makane, malenga ne neambuluishe bantu.​—Nsu. 25:11.

4. Ndîba kayi diudi mua kubenga kuandamuna lukonko?

⁴ Udi ne bua kuandamuna lukonko luonso anyi? Wewe kuyi mumanye bimpe diandamuna dia lukonko, kumvu bundu bua kuambila muntu ne: “Tshiena mumanye diandamuna to. Kadi ndi mua kuanji kuya kubala malu makuabu bua kulua kukuandamuna.” Kudipuekesha ne kuleja muntu dinanga mushindu eu nekumusake bua akuindile musangu udi ulonda. Kadi wewe mumone ne: muntu udi wela lukonko mmutukine, mmusue bua tubange kutandangana, widikije Yezu, kuakudi bia bungi to. (Luka 20:1-8) Bia muomumue kabidi, wewe mumone muntu udi kayi dijinga menemene ne kumanya bulelela ukeba kujula milandu, ukose muyuki ne bukalanga buonso; uye kukeba bantu badi basue kumanya bulelela.​—Mat. 7:6.

5. Ntshilejilu kayi tshimpe tshivua Yezu mushiye bua kuandamuna nkonko?

⁵ Yezu uvua mumanye bimpe ne: bua “kuamba malu malelela” ne kuandamuna nkonko ya aba badi basue bushuwa kupeta mandamuna, bidi bikengela kueyemena anu Yehowa. (Yone 18:37) Kuidikija Yezu patudi tuandamuna nkonko ya bantu badi badiakaje bua kupeta muoyo wa tshiendelele, ndiakalenga dinene be!​—Bien. 13:48.