‘Luaku, undonde meme’
1. Matuku adi kumpala eku netulonge mukanda kayi?
1 Mukanda wa Matayo, wa Mâko, wa Luka ne wa Yone idi ne malu a bungi a Yezu. Bu mudi bena Kristo ne tshia ‘kulonda bimpe mu makasa ende,’ tuikalayi tudilongolola bimpe, tuteya ntema bikole patuabanga kulonga mukanda wa ‘Luaku, undonde meme.’ Mu imue miakulu nebatuadije kuwulonga mu Dilonga dia Bible dia Tshisumbu lumingu lua dia 1 ngondo muisatu eu. (1 Pet. 2:21; Mâko 10:21) Netukebe mua kulonga bimpe bimpe malu a Yezu adi mua kutuambuluisha bua kuyisha bilenga.
2. Leja mudi ditantamana dia Yezu dituambuluisha.
2 Tshilejilu tshivua Yezu mushiye: Muntu katuku muanji kukubengela dimue dituku pauvua uyisha ku nzubu ne ku nzubu anyi? Padi malu a nunku atufikila, tudi tuvuluka diakamue mêyi a Yezu aa: ‘Biankengeshabu, nebanukengeshe kabidi.’ (Yone 15:20) Kadi diandamuna dibi dionso ki mmushindu wa kutukengesha to. Malu malenga avua mindile Yezu ke avua mamusake bua kutungunuka ne kuyisha nansha mu ntatu. Tuetu petu tutekayi muoyo wetu anu ku dituanyisha dia Yehowa ne difutu diatupaye. Nebituambuluishe bua ‘katupungidi, katuteketshi mu mitshima yetu.’ (Eb. 12:2, 3; Nsu. 27:11) Patudi tuyisha anu kuyisha, netumone mudi Yezu utukuatshisha.—Mat. 28:20.
3. Tudi mua kuenza tshinyi bua kuidikija Yezu mu kuyisha kuetu?
3 ‘Buakantuminabu mbualu ebu’: Yezu uvua muteke kuyisha malu a Bukalenge bua Nzambi muaba wa kumpala. (Luka 4:43) Uvua muditue ne disanka dionso mu diyisha. Uvua umona kuyisha bu mudimu wa kuenza ne mitalu yonso; ke bualu kayi uvua wenda ukeba mpunga wa kuyishila bantu. Bu mutudi bayidi ba Yezu, tshilejilu tshiende tshidi tshitufikisha ku tshinyi? Kudiku bantu batudi mua kuyisha patudi tuenda tuenza malu etu makuabu anyi? Dinanga dia buena dia Yezu ditusakaku bua kuyisha bikole!—2 Kol. 5:14.
4. Leja tshidi mua kutuambuluisha bua kuyisha bimpe.
4 ‘Kakuakadi muntu kale too ne katataka wakakula bu mudi muntu eu wakula’: Mushindu uvua Yezu uyisha uvua ukemesha bantu. (Yone 7:46; Mat. 7:28, 29) Kadi bua tshinyi uvua mushilangane ne bakuabu? Bualu uvua munange malu avuaye uyisha, uvua munange bantu bavuaye uyisha, ne uvua ne mishindu ya bungi ya kulongesha nayi. Tuetu tuidikija Mulongeshi Munene eu, netuikale tuyisha bimpe.—Luka 6:40.
5. Neudifundile kipatshila kayi panuatuadija kulonga mukanda wa ‘Luaku, undonde meme’?
5 Tudi bakule anu bua malu mimpe a Yezu makese tshianana. Mmalu kayi makuabu audi mua kulonga? Bua kumanya malu aa, udifundile kipatshila ka kuidikija ngakuilu ne ngenzelu wa malu wa Yezu, ukebe bua ‘kumanya mudi dinanga dia Kristo’ mu Dilonga dienu dia Bible dia Tshisumbu.—Ef. 3:19.