Ambuluisha bantu bua kuelabu meji
1. Mmushindu kayi wa kuyisha udi mutambe buimpe?
1 Ku bibidi ebi, tshidi tshimpe menemene mu buambi ntshiepi? Nkuenzeja muntu bua itabe malu atudi tuamba anyi nkumuelesha meji bua adipetele diandumuna dimpe? Paulo wakelesha bantu meji pavuaye uyisha mu Tesalonike; bua bualu ebu ‘bakuabu bakitabuja.’ (Bien. 17:2-4) Kuelesha bantu meji kudi kulomba tshinyi?
2. Leja mutudi mua kuidikija Paulo patudi tuyisha.
2 Manya mudi muntu udiumvua, ne malu adiye witabuja: Kueleshisha bantu meji kudi kulomba kumanya mudi bena mu teritware wenu badiumvua. Tshilejilu, Paulo wakatuadija muyuki wende ne bena Greke ku Aleopago ne malu avuabu bamanye ne avuabu bitaba. (Bien. 17:22-31) Wewe pebe paudi udilongolola bua kuyisha, uvuluke malu atu bantu bitaba ne atubu batuamba. (1 Kol. 9:19-22) Padi muntu ujula milandu, ukebe bualu bunudi mua kumvuangana nende, ushindamene pa bualu abu.
3. Leja mudi nkonko miela ne budimu ituambuluisha bua kuelesha bantu meji.
3 Ela nkonko ne budimu: Tshilejilu, bua kuleja muena luendu bua kumanyaye muaba udiye uya, mbimpe tumanye muaba udiye padiye utuebeja. Bia muomumue, bua kuambuluisha muntu bua kufika ku diandamuna dimpe, bidi bikengela tumanye malongesha adiye witaba. Yezu kumpala kua yeye kuelesha muntu meji, uvua wanji kumuela nkonko bua kumanya meji ende. Tshilejilu, pakamuebeja muntu mukuabu ne: ‘Nengenze tshinyi bua kupiana muoyo wa tshiendelele?,’ wakanji kukeba bua kumanya muvua muntu au wela meji. (Luka 10:25-28) Umue musangu pakafila Petelo diandamuna dibi, Yezu wakamuela nkonko mikuabu ne budimu bua kuelaye meji bimpe. (Mat. 17:24-26) Nunku, padi muntu utuela nkonko anyi wamba malu adi kaayi malelela, tudi mua kumuela nkonko bua kuelaye meji bimpe.
4. Bua tshinyi tudi ne bua kuditatshisha bua kuambuluisha bantu bua kuelabu meji?
4 Patudi tuambuluisha muntu bua kuela meji, tudi tuidikija Yezu (Mulongeshi Munene) ne bakuabu bambi ba lumu luimpe ba meji ba mu bidimu lukama bia kumpala. Patudi tuenza nanku, tudi tuambika muntu utudi tuyisha lumu, tumunemeka. (1 Pet. 3:15) Bidi mua kumusaka bua itabe bua tumupinganyine.