Yisha ‘bantu ba mishindu yonso’
1. Bambi ba lumu luimpe bimpe mbafuanangane ne bansenda ku tshinyi?
1 Nsenda wa biamu udi ne meji utu ne biamu bia bungi, mmumanye dîba ne mushindu wa kuenza mudimu ne tshiamu tshionso. Tuetu petu tudi ne biamu bia mudimu bia bungi bia kuyisha nabi. Tshilejilu, bu mudi broshire yetu ne biena-bualu bia bungi, idi ituambuluisha bua kuyisha ‘bantu ba mishindu yonso.’ (1 Kol. 9:22, NW) Mbatele imue ya kudiyi mu tshisakidila; mbaleje bantu ba kuyipesha ne mushindu wa kubapeshayi.
2. Ndîba kayi ditudi mua kufila broshire mu buambi?
2 Dîba dia kufila broshire: Nsenda utu wenza mudimu ne tshiamu paditshi mua kumuambuluisha. Tuetu petu tudi mua kufila broshire patudi tumona ne: udi mua kuambuluisha muntu, pamutu pa kumufila anu bualu mbambe ne: tumufile ngondo au. Tuangate tshilejilu: Tudi tuyisha muntu utu kayi witaba Bible anyi Yezu to. Kadi mbatulombe ngondo au bua kufila mukanda wa Bible ulongesha. Tudi mua kuenza tshinyi? Tudi mua kuanji kumupesha broshire udi mumukumbanyine; tuetu bamane kukolesha dijinga diende, apu tudi mua kumupesha mukanda eu.
3. Bua tshinyi tudi ne bua kumanya mua kuenza mudimu bimpe ne biamu bitudi nabi?
3 Bible udi utumbisha bantu badi benza mudimu ne lungenyi. (Nsu. 22:29) Kakuyi mpata, kakuena mudimu utudi mua kufuanyikija lelu ne ‘mudimu wa tshijila wa lumu luimpe’ to. (Lomo 15:16, NW) Bua kuikala ‘muena mudimu udi kayi ne bua kufua bundu,’ tuditatshishayi bua kuenza mudimu bimpe ne biamu bitudi nabi.—2 Tim. 2:15.