Uyukile ne bantu mu mushindu muimpe
1. Mushindu uvua bena Kristo ba kumpala bayisha udi mua kutulongesha tshinyi?
1 Bena kristo ba kumpala bavua bayisha bantu ba miaba ne bitendelelu bikuabu lumu luimpe. (Kolos. 1:23) Nansha muvuabu bakula anu bua Bukalenge bua Nzambi, bavua bayisha bilondeshile bantu bavuabu bayukila nabu. Tshilejilu, bena Yuda bavua banemeka bikole Dîyi dia Nzambi; ke bualu kayi pakayikila Petelo nabu, wakanji kutela mêyi a muprofete Yoele. (Bien. 2:14-17) Tangila mpindieu muvua Paulo muyukile ne bena Greke bilondeshile Bienzedi 17:22-31. Mu imue miaba lelu, bantu batu banemeka Dîyi dia Nzambi; nanku mu miaba ayi, tudi mua kuyisha ne Bible ku nzubu ne ku nzubu kakuyi lutatu to. Kadi, mbimpe tuikale ne budimu bua bungi patudi tuyikila ne bantu badi kabayi bitaba Bible, badi kabayi batendelela anyi badi mu bitendelelu bidi kabiyi bia bena Kristo.
2. Mmunyi mutudi mua kufila mikanda yetu bua kuambuluisha bantu badi bitaba Bible ne aba badi kabayi bamuitaba?
2 Ufile mikanda yetu bimpe: Mikanda ya kufila mu buambi mu tshidimu tshipiatshipia tshia mudimu etshi neyikale ishintuluka panyima pa ngondo ibidi yonso: netuikale tutamba kufila bibejibeji, trakte ne broshire. Nunku, nansha bantu ba bungi ba mu teritware wetu bobu kabayi banyisha Bible, tudi mua kuyikila nabu bualu budi bubasankisha. Nansha tuetu katuyi babadile anyi batelele muntu mvese diakamue patudi tupetangana nende bua musangu wa kumpala, yeye muleje dijinga tudi mua kumupinganyina ne kipatshila ka kumuambuluisha bua kuitabujaye Mufuki ne Dîyi diende. Kadi tuetu tuyisha muaba udi bantu bitaba Bible, tudi mua kuenza mudimu ne mikanda yetu ne kuyikila ne bantu bilondeshile malu adimu. Kadi bua mukanda wa Bible ulongesha, broshire wa Teleja Nzambi anyi wa Teleja Nzambi bua upete muoyo wa tshiendelele tudi mua kuyifila dîba dionso didibi bikengedibua nansha bobu kabayi bambe bua kuyifila mu ngondo au. Tshidi ne mushinga nkuyikila ne muntu mu mushindu udi mua kumusaka bua kuitabujaye Yehowa.
3. Mioyo ya bantu ba mu teritware wetu mmifuanangane ne buloba mu mushindu kayi?
3 Sekuna buloba: Mutshima wa muntu udi anu bu buloba menemene. (Luka 8:15) Imue miaba, bitu bikengela kusekuna buloba bikole bua ntete ya malongesha a mu Bible kuelayi miji ne kukolayi. Bena kristo ba kumpala bakapatula bipeta bimpe pavuabu bakune mu maloba a mishindu yonso; bualu ebu buakabapetesha disanka dia bungi. (Bien. 13:48, 52) Tuetu tutabalela mutudi tuyukila ne bantu, netupatule petu bipeta bimpe.