NSHAPITA WA 17

‘Nudibake pa ditabuja dienu ditambe tshijila’

‘Nudibake pa ditabuja dienu ditambe tshijila. Nudilame mu dinanga dia Nzambi.’—YUDA 20, 21.

1, 2. Mmudimu kayi wa dibaka utudi tuenza? Bua tshinyi kuwenza bimpe kudi ne mushinga wa bungi?

ELABI meji ne: udi wenza mudimu wa kuibaka ne muoyo mujima. Kukadi matuku a bungi audi wenza mudimu eu, kadi utshidiku anu wa bungi. Udi mupete ntatu ya bungi, kadi mudimu eu udi ukupetesha masanka a bungi. Bu muudi mumanye ne: wewe muenze mudimu eu bimpe neupete diakalenga mpindieu ne mu matuku atshilualua, kuena mua kuitaba nansha kakese bua kuulengulula anyi kuushila mu njila to. Bua tshinyi? Bualu udi udibaka wewe nkayebe.

² Muyidi Yuda udi wakula bua mudimu wa kuibaka utudi tudibaka tuetu nkayetu. Mu mvese idiye wambila bena Kristo bua ‘kudilama mu dinanga dia Nzambi,’ udi kabidi ubaleja mudibu mua kudilamamu wamba ne: ‘Nudibake pa ditabuja dienu ditambe tshijila.’ (Yuda 20, 21) Ngimue mishindu kayi itudi mua kudibaka, tuambe ne: kukolesha ditabuja dietu bua kushala mu dinanga dia Nzambi? Tuakulayi bua mishindu isatu itudi mua kukolesha ditabuja dietu.

TUKOLESHE DITABUJA DIETU MU MIKENJI YA YEHOWA

3-5. (a) Satana mmusue bua umone mikenji ya Yehowa bishi? (b) Mmushindu kayi utudi ne bua kumona mikenji ya Nzambi? Ntshinyi tshidiyi ituenzela patudi tuyimona mu mushindu muimpe? Fila tshilejilu.

³ Tshia kumpala, tudi ne bua kuikala ne ditabuja dikole mu mikenji ya Nzambi. Udi mulonge mikenji ya bungi ya Nzambi mu mukanda eu idi yakula bua tshidi tshimpe ne tshidi tshibi. Udi uyimona bishi? Satana mmusue bua uyimone mikole, mikale ikupangisha diakalenga anyi ikukengesha. Mayele ende aa ke avuaye mushime nawu Eva mu budimi bua Edene ne udi ushima nawu bantu too ne lelu. (Genese 3:1-6) Udiku mua kukushima pebe anyi? Mushindu uudi umona malu ke udi mua kufikisha Satana ku dikushima anyi dibenga kukushima.

⁴ Fuanyikijabi ne: udi wendakana muaba kampanda mulengeja bimpe, kadi paudi ufika muaba mukuabu, udi usangana bele tukanu tukanga njila bua bantu kabapitshi to. Paudi utangila diamuamua, udi umona bintu bimpe bitambe. Diakamue, udi mua kumona tukanu atu bu tudi tukupangisha malu mimpe. Kadi paudi utangila bimpe menemene, udi umona nyama wa ntambue wenda ubembela bantu bua kubakuata. Mpindieu udi umona ne: tukanu atu tudi tukulama ku njiwu. Kudiku nyama wa luonji udi ukeba kukukuata anyi? Dîyi dia Nzambi didi ditudimuija ne: ‘Nuikale bapole, nutabale; muena lukuna wenu Diabolo mene, udi wendakana bu nyama wa ntambue udi ukungula, ukeba bantu ba kudiaye.’—1 Petelo 5:8.

⁵ Satana udi bu nyama wa luonji lua bungi. Kadi bu mudi Yehowa kayi musue bua Satana atukuate, mmutuelele mikenji bua katukuatshiki mu “mateyi” ende to. (Efeso 6:11) Nunku, misangu yonso itudi tuela meji bua mikenji ya Nzambi, tudi ne bua kumona mudiyi ileja ne: Tatu wetu wa mu diulu mmutunange. Tuetu tuyimona mushindu eu, neyitulame ne neyitupeteshe disanka. Muyidi Yakobo wakamba ne: Muntu ‘udi utangilatangila mikenji miakane tshishiki ya budishikaminyi ne udi ushalamu, muntu eu neikale ne disanka mu kuenza kuende.’—Yakobo 1:25.

6. Mmushindu kayi muimpe utudi mua kukolesha ditabuja dietu mu mikenji ya Nzambi? Fila tshilejilu.

⁶ Tudi tukolesha ditabuja dietu bua Nzambi muedi wa mikenji ne bua mikenji yende patudi tuyitumikila. Tshilejilu, mu ‘mikenji ya Kristo’ mudi kabidi mukenji wa kulongesha bakuabu ‘malu onso akambaye.’ (Galatia 6:2; Matayo 28:19, 20) Bena Kristo badi kabidi batumikila mukenji wa Nzambi wa kudisangisha ne bena Kristo nabu bua kutendelela Nzambi ne kukoleshangana. (Ebelu 10:24, 25) Mu mikenji ya Nzambi mudi kabidi eu udi utulomba bua kuikala ne tshibidilu tshia kusambila Yehowa bikole ne kumuambila malu adi munda muetu. (Matayo 6:5-8; 1 Tesalonike 5:17) Tuetu tutumikila mikenji eyi, netumone mudiyi ituambuluisha. Diyitumikila neditupeteshe disanka ditudi katuyi mua kupeta muaba mukuabu pa buloba bubi ebu to. Paudi wela meji bua masanka audi mupete mu ditumikila mikenji ya Nzambi, ditabuja diebe bua mikenji eyi didi dikola.

7, 8. Ntshinyi tshidi Bible ujadikila bantu badi badiebeja bikalabu mua kutungunuka ne kutumikila mikenji ya Nzambi?

⁷ Bantu bakuabu badi bamona ne: bidi mua kubakolela bua kutungunuka ne kutumikila mikenji ya Nzambi. Badi batshina bua kulua kuenza bualu bubi kampanda. Wewe wela meji nanku, vuluka mêyi aa: ‘Yehowa Mupikudi webe, wa Tshijila wa Isalele udi wamba ne: Meme ndi Yehowa Nzambi webe, udi ukuyisha bua wewe wikale ne diakalengele, udi ukulombola mu njila uudi ne bualu bua kuendelamu. Aka! Bu wewe mumvue mikenji yanyi, ditalala diebe diakadi kuikala bu musulu, ne buakane buebe buakadi kuikala bu mavuala a mâyi manene!’ (Yeshaya 48:17, 18) Ukatuku muele meji mudi mêyi aa atukankamija anyi?

⁸ Yehowa udi utuvuluija ne: patudi tutumikila mikenji yende, tudi tupeta diakalenga. Udi utulaya ne: tuetu bamutumikile netupete malu abidi. Bua kumpala, ditalala dietu nedikale bu musulu udi ne mâyi a bungi matalala adi atungunuka anu ne kupueka. Buibidi, buakane buetu nebuikale bu mavuala a mâyi manene. Wewe muimane ku mpenga kua mâyi manene, neumone ne: mavuala kaatu ajika to, atu anu atungunuka ne kujuka. Yehowa udi wamba ne: buakane buebe nebuikale anu bu mavuala, kabuakujika to. Wewe udienzeja bua kushala anu mumulamate, kakuitaba bua ukuluke to. (Musambu 55:22) Malu adi Yehowa utulaya aa kaenaku akolesha ditabuja diebe kudiye ne akusaka bua kutumikila mikenji yende anyi?

‘TUYAYI TOO NE KU BUAKANE BUA TSHISHIKI’

9, 10. (a) Bua tshinyi muena Kristo yonso udi ne bua kushindama mu ditabuja? (b) Leja mudi kulonda malu a nyuma kupetesha disanka.

⁹ Bualu buibidi butudi ne bua kuenza mu mudimu wetu wa dibaka budi mu mêyi mafundisha kudi nyuma muimpe aa: ‘Tuyayi too ne ku buakane bua tshishiki.’ (Ebelu 6:1) Muena Kristo yonso udi ne bua kuya too ne ku buakane bua tshishiki, mbuena kuamba ne: kushindama mu ditabuja. Mbikole bua tuetu kulua bapuangane lelu, kadi muntu yonso udi mua kulua muena Kristo mushindame. Pashishe, bena Kristo badi bapeta disanka dia bungi padibu baya kumpala mu mudimu wa Yehowa. Bua tshinyi?

¹⁰ Muena Kristo mushindame ngeu udi umona malu bu mudi Yehowa uamona. (Yone 4:23) Paulo wakafunda ne: ‘Badi balonda malu a mubidi badi bateka meji abu ku malu a mubidi; badi balonda nyuma badi bateka meji abu ku malu a nyuma.’ (Lomo 8:5) Muntu udi ulonda malu a mubidi udi upeta disanka anu dikese bualu udi utangila anu malu ende yeye, kena umona kule to, ne ukeba anu kulua mubanji. Muntu udi ulonda malu a nyuma udi ne disanka dia bungi bualu mmutangile anu kudi Yehowa ‘Nzambi wa diakalenga’ anyi Nzambi wa disanka. (1 Timote 1:11, MMM) Muena Kristo mushindame utu musue kusankisha Yehowa ne udi ne disanka nansha padiye mu makenga. Bua tshinyi? Makenga adi atuambuluisha bua kuleja mudi Satana muena dishima, akolesha lulamatu luetu ne nunku, adi atuambuluisha bua kusankisha Tatu wetu wa mu diulu.—Nsumuinu 27:11; Yakobo 1:2, 3.

11, 12. (a) Ntshinyi tshivua Paulo muambe bua ‘meji’ a muena Kristo? Muaku ‘kuibidija’ udi umvuija tshinyi? (b) Ntshinyi tshitudi ne bua kuenza ne mubidi bua kukolakanawu?

¹¹ Bua kulua bena Kristo bashindame, tudi ne bua kulonga. Tangila tshidi mvese eu wamba: ‘Biakudia bikole bidi bua bantu bakole, bia bobu mene badi ne meji abu mibidila a kujingulula nawu tshidi tshimpe ne tshidi tshibi.’ (Ebelu 5:14) Padi Paulo wakula bua meji ‘mibidija,’ udi utela muaku wa mu tshiena Greke uvua bantu mua kuikala batela bikole mu manaya a dibidija mubidi mu ditunga Grèce ku kale. Mpindieu tumonayi malu adi kudibidija eku kulomba.

¹² Pakatulelabu, mubidi wetu kauvua muibidile bua kuenza malu kampanda to. Tshilejilu, muana mutoke katu mumanye mua kutuma bianza biende anyi mikolo kuonso kudiye musue to. Ke bualu kayi utu utuma bianza biende eku ne eku ne pamuapa udikuma dipi kayi mumanye. Kadi ku kakese ku kakese, mubidi wende udi wibidila. Udi utuadija kusomba, kukalaba, kuenda ne kunyema.a Kadi netuambe tshinyi bua muena dinaya dia dibidija mubidi? Patutu tumumona ukudimuka mu lupepele anyi wenza malu makuabu a kukema adi asankisha bantu, tudi tumona ne: mmuibidije mubidi wende bimpe. Kadi kena wenza malu aa ku mpukapuka to, utu wanji kudibidija bikole. Bible udi wamba ne: dikolesha dia mubidi anyi diwibidija edi didi ne “mushinga muimpe kakese.” Kadi kuibidija meji etu ne Dîyi dia Nzambi kudi ne mushinga wa bungi be!—1 Timote 4:8.

13. Mmushindu kayi utudi mua kuibidija meji etu?

¹³ Mu mukanda eu, tudi balongamu malu a bungi adi mua kukuambuluisha bua kuibidija meji ebe bua wewe kulua muena Kristo mushindame ne kushala mulamate Yehowa. Kumpala kua kuangata dipangadika nansha dia mushindu kayi, anji ela meji tshidi mikenji ya Nzambi yamba ne sambila. Diebeja ne: ‘Mmikenji kayi ya mu Bible idi yakula bua bualu buanyi ebu? Mmunyi mundi mua kuyitumikila? Ntshinyi tshidi mua kusankisha Tatu wanyi wa mu diulu?’ (Nsumuinu 3:5, 6; Yakobo 1:5) Misangu yonso iudi ukonkonona tshidi Bible wamba kumpala kua kuangata dipangadika, udi wibidija meji ebe bua kujingulula tshidi tshimpe ne tshidi tshibi. Didibidija edi nedikuambuluishe bua kulua muena Kristo mushindame ne kutungunuka ne kuya kumpala.

14. Ntshinyi tshitudi ne bua kunanga bikole bua tuetu kulua bena Kristo bashindame? Kadi ntshinyi tshitudi ne bua kudimukila?

¹⁴ Nansha tuetu bamane kulua bena Kristo bashindame, tudi ne bua kutungunuka ne kukolesha ditabuja dietu. Bua muntu kukolaye, udi ne bua kudia. Ke bualu kayi Paulo wakamba ne: ‘Biakudia bikole bidi bua bantu bakole.’ Bua wewe kukolesha ditabuja diebe, udi ne bua kulonga Dîyi dia Nzambi bikole. Udi uleja muudi ne meji paudi utumikila biudi ulonga, bualu Bible udi wamba ne: ‘Bintu bionso biudi mua kujinga kabiena mua kuelekejibua nawu.’ Nunku, tudi ne bua kunanga bikole malongesha mimpe adi Tatu wetu utupesha. (Nsumuinu 8:11; 1 Petelo 2:2) Kadi padi muntu upeta dimanya dia Nzambi ne meji ende, ki mbualu bua yeye kutuadija kuditambisha to. Tudi ne bua kudikonkonona dituku dionso, tshianana lutambishi anyi butekete bukuabu budi mua kutupita bukole. Paulo wakafunda ne: ‘Nuditete munda muenu ni nudi ne ditabuja; nudijadike bienu.’—2 Kolinto 13:5.

15. Bua tshinyi dinanga didi ne mushinga wa bungi bua tuetu kushindama mu ditabuja?

¹⁵ Tudi mua kujikija kuibaka nzubu, kadi tudi ne bua kutungunuka ne kuenza mudimu bua kumulama. Mbimpe kulama nzubu biakane, kumulongolola ne pamuapa kumudiundisha padibi bikengela. Ntshinyi tshitudi ne bua kuenza bua kulua bena Kristo bashindame ne kutungunuka ne kukolesha ditabuja dietu? Tshia kumpala, tudi ne bua kuikala ne dinanga. Tudi ne bua kutungunuka ne kunanga Yehowa bikole ne kunanga kabidi bena Kristo netu. Tuetu katuyi ne dinanga, dimanya dionso ditudi nadi ne bionso bitudi tuenza bidi tshianana, bidi anu bu mutoyi wa patupu. (1 Kolinto 13:1-3) Dinanga didi dituambuluisha bua kulua bena Kristo bashindame ne kutungunuka ne kukola mu ditabuja.

TEKA MEJI EBE KU MALU ADI YEHOWA MULAYE

16. Satana udi usaka bantu ku tshinyi? Kadi Yehowa mmutulaye tshinyi bua kutuambuluisha?

¹⁶ Tuakulayi mpindieu bua bualu bukuabu butudi ne bua kuenza mu mudimu wetu wa dibaka. Bua tuetu kulua bayidi bimpe ba Kristo, tudi ne bua kudimukila malu atudi tuelela meji. Satana ke mukokeshi wa buloba ebu; mmupiluke mu mishindu ya difikisha bantu ku diteketa ku muoyo ne ku diela meji ne: kabena ne mushinga to. (Efeso 2:2) Meji a mushindu eu adi mua kuenzela muena Kristo bibi anu bu mudi nzubu mua kupuka padi mitshi idibu bamuasa nayi ibola. Diakalenga, Yehowa udi utulaya malu mimpe bua kutuambuluisha.

17. Umvuija mudi Bible uleja mushinga udi nawu ditekemena.

¹⁷ Bible udi utela bintu bia mvita bishilangane bitudi ne bua kuvuala bua kuluangana ne Satana ne bulongolodi buende. Tshia mvita tshinene tshitudi ne bua kuvuala ntshifulu, tuambe ne: ‘ditekemena dia lupandu.’ (1 Tesalonike 5:8) Ku kale, musalayi yonso uvua mumanye ne: yeye muye ku mvita kayi ne tshifulu, kavua mua kupanduka to. Bifulu abi bivua bia tshiamu ne bavua balamika biseba munda. Bivua biambuluisha musalayi bua bintu bivuabu bamukuma ku mutu kabitambi kumusama to. Ditekemena didi dilama meji etu anu bu mutu tshifulu tshilama mutu wa musalayi.

18, 19. Yezu mmutushile tshilejilu kayi bua mushindu wa kulama ditekemena? Tudi mua kumuidikija bishi?

¹⁸ Yezu mmutushile tshilejilu tshitambe buimpe tshia mushindu wa kulama ditekemena. Ela meji bua malu avuaye mutantamene butuku bua muladilu wa lufu luende. Mulunda wende wakamutungila bua kupeta makuta. Mukuabu wakamuvila. Banga bakamunyema. Bena kuabu bakamubenga, kuambila basalayi bena Lomo bua kumukengesha bibi ne kumushipa. Tudi mua kuamba ne: Yezu uvua mupete makenga audi kuyi mua kupeta to. Ntshinyi tshivua tshimuambuluishe? Ebelu 12:2 udi wandamuna ne: ‘Bua disanka diakatekibua kumpala kuende, wakakankamana pakakengaye ku mutshi, wakalengulula bundu, ne wakushikama ku tshianza tshikole tshia nkuasa wa butumbi wa Nzambi.’ Nunku, Yezu uvua mutangile anu ‘disanka diakatekibua kumpala kuende.’

¹⁹ Ndisanka kayi divua kumpala kua Yezu? Uvua mumanye ne: yeye mutantamene ntatu, neatumbishe dîna dia tshijila dia Yehowa. Nealeje patoke mudi Satana muena dishima. Kakuvua bualu bukuabu buvua mua kusankisha Yezu bu ebu to. Uvua kabidi mumanye ne: Yehowa neamubeneshe bikole bua lulamatu luende ne kabidi mu katupa kakese, uvua ne bua kupetangana tshiakabidi ne Tatuende mu diulu. Yezu uvua muteke meji ende anu ku malu mimpe aa nansha pavuaye mu ntatu mikole. Ke tshitudi petu ne bua kuenza. Tudi petu ne disanka kumpala kuetu. Yehowa mmupeshe yonso wa kutudi diakalenga dia kutumbisha dîna diende dinene. Tudi petu tuleja mudi Satana muena dishima patudi tuitaba bua Yehowa ikale Mfumuetu, ne tudi tushala mu dinanga dia Tatu wetu udi mutunange nansha tuetu bapete ntatu ya mushindu kayi.

20. Ntshinyi tshidi mua kukuambuluisha bua kubenga kuteketa ku muoyo ne kutekemena anu malu adi Yehowa mutulaye?

²⁰ Yehowa mmusue kufuta batendeledi bende ba lulamatu ne udi ne muoyo kulu kulu bua kubafuta. (Yeshaya 30:18; Malaki 3:10) Udi ubapesha bidibu bamulomba ne disanka dionso. (Musambu 37:4) Nunku, tangija meji ebe anu ku malu adiye mutulaye. Kulekedi ngenyi mibi ya pa buloba ikutekesha ku muoyo to. Paudi umona ne: lungenyi lua pa buloba ebu ludi lukeba kubuela mu meji ebe, lomba Yehowa ne muoyo mujima bua upete “ditalala dia Nzambi didi ditamba dijingulula dionso dia bantu.” Ditalala dia kudi Nzambi edi nedilame muoyo webe ne meji ebe.—Filipoi 4:6, 7.

21, 22. (a) Bena mu ‘musumba munene’ wa bantu badi ne ditekemena dimpe kayi? (b) Mbualu kayi budi butamba kukusankisha wewe ku malu onso adi Yehowa mutulaye? Udi mudisuike bua kuenza tshinyi?

²¹ Malu adi Yehowa mutulaye atudi ne bua kuelela meji mmimpe a dikema! Biwikala muena mu ‘musumba munene’ wa bantu “badi bumuka mu dikenga dinene,” ela meji bua nsombelu uwikala nende mu matuku makese emu. (Buakabuluibua 7:9, 14) Pasuikabu Satana ne bademon bende, neupete ditalala dia katshia ne katshia. Nnganyi wa kutudi eku ukadi musombaku dimue dituku ku matshi talala, kakuyi ntatu mikebesha kudi Satana ne malu ende mabi? Kadi pikala Satana katshiyiku, Yezu ne bantu 144000 bakokesha nende mu diulu nebatuambuluishe bua kukudimuna buloba mparadizu. Netuikale ne disanka dia bungi bualu masama ne bulema kabiakuikalaku to; balela ne balunda betu bavua bafue nebabike ne netuikale ne nsombelu uvua Nzambi musue bua tuikale nende. Pikala bubi bujike mu mubidi wetu, netupete kabidi difutu ditambe bunene dia “budishikaminyi bua butumbi bua bana ba Nzambi” anu bu mudi Nzambi mutulaye mu Lomo 8:21.

²² Yehowa mmusue bua wikale ne budishikaminyi mu mushindu uudi kuyi muelele meji to. Kadi bua wewe kupeta budishikaminyi ebu, udi ne bua kumutumikila. Malu aa adi ne bua kukusaka bua kutumikila Yehowa dituku dionso diakafuka Nzambi edi. Nunku, enza muebe muonso bua kuibaka ditabuja diebe ditambe tshijila bua wewe kushala mu dinanga dia Nzambi bua kashidi ne tshiendelele.

[Mêyi adi kuinshi]

[Tshimfuanyi mu dibeji 201]

Mubidi wa muena manaya a dibidija mubidi udi ukola padiye uwibidija