Mudi kasumbu kenu ka buambi kakuambuluisha
1. Tela malu mimpe a mu dilonga dia mukanda adi kabidi mu tusumbu tua buambi.
1 Kudiku malu mimpe a Dilonga dia Mukanda dia Tshisumbu autshidi ujinga anyi? Tusumbu tuvua ne bantu bakese, nanku bantu bavua badiumvua bimpe. Ke bualu kayi bivua bipepele bua kupeta balunda bimpe bavua bakolesha ditabuja dietu. (Nsu. 18:24) Mutangidi wa dilonga dia mukanda uvua mumanye bantu bonso bimpe, nenku uvua ukankamija muntu yonso. (Nsu. 27:23; 1 Pet. 5:2, 3) Nansha lelu, kudi mushindu wa kupeta malu mimpe aa mu kasumbu ketu ka buambi.
2. Bu mudi bena mu kasumbu ka buambi bakolesha ditabuja dietu, tudi mua kuenza tshinyi bua kukolesha nabu bulunda?
2 Enza bualu kampanda: Tusumbu tua mudimu wa buambi tutu ne bantu bungi bua muomumue ne bua bavua mu tusumbu tua dilonga dia mukanda. Patudi tuenza mudimu “pamue,” tudi tulua balunda banene. (Filip. 1:27) Ukadi muyishe ne bantu bungi kayi mu kasumbu kenu? Kuenaku mua ‘kukangula muoyo webe’ anyi? (2 Kol. 6:13) Imue misangu, tudi mua kubikila muntu wa mu kasumbu ketu bua kulua kubuela mu Ntendelelu wetu wa mu Dîku anyi bua kudia netu. Mu bimue bisumbu, tusumbu tua buambi ke tutu tulambila bangamba-malu bakumbudi. Nansha ngamba-malu kayi mulue bua kudia nabu, bena mu kasumbu batu basomba ne badia pamue dituku adi bua kukoleshangana.
3. Tela mishindu mikuabu idi mua kukupetesha dikankamija.
3 Nansha mudi tshisumbu tshienza bisangilu anu misangu ibidi ku lumingu, kabiena biumvuija ne: bakulu mbakepeshe dikankamija bantu to. Mbateke batangidi mu kasumbu konso bua kukolesha muntu yonso ne bua kulongesha bantu mua kuyisha bimpe. Pikala mutangidi wa kasumbu kenu kayi muanji kukulomba bua kuyisha nende, umulombe wewe bua nuyishe nende. Mutangidi wa mudimu utu kabidi uyisha ne kasumbu kampanda musangu umue ku ngondo mu Disambombo ne mu Dia lumingu. Mu bisumbu bidi ne bamanyishi bakese, udi mua kuyisha ne kasumbu konso misangu ibidi ku tshidimu. Patuye ulua mu kasumbu kenu, utu udienzeja bua kupatuka mu buambi anyi?
4. a) Batu balongolole bisangilu bia buambi mushindu kayi? b) Bua tshinyi mbimpe kufila nzubu wetu bua kuenza bisangilu ebi?
4 Misangu ya bungi bitu bimpe bua kasumbu konso kikale kenzela tshiaku tshisangilu waku muaba mu Disambombo. Kuenzela bisangilu bia buambi miaba mishilangane, kadi mu mêba asua kufuananganaku, nekuambuluishe bamanyishi bua kuyamu bipepele ne pamuapa kuya mu teritware bipepele. Nunku, badi mua kuabanya bamanyishi ne kubatuma mu teritware ne lukasa. Mbipepele bua mutangidi wa kasumbu kutabalela bena mu kende kasumbu bimpe. Kadi, kudi malu adi mua kuenza ne: basangishe tusumbu tubidi anyi tua bungi kaba kamue. Padi mpindieu tshisumbu tshijima tshidisangisha bua kuya mu buambi mu Disambombo dia kumpala dia ngondo, anyi tshidisangisha padi Dilonga dia Tshibumba tshia Nsentedi dijika, misangu ya bungi bitu bimpe bena mu kasumbu ne kasumbu basombe pamue bua mutangidi wa kasumbu kabu apete mushindu wa kubabanya mu minite mikese idibu bamupesha kumpala kua bobu kuenza disambila.—Tangila kazubu ka “Udiku mua kufila nzubu webe anyi?”
5. Nansha mutudi katuyi kabidi tuenza dilonga dia mukanda, tudi mua kutekemena malu kayi mimpe?
5 Nansha mutudi katuyi tuenza kabidi Dilonga dia Mukanda dia Tshisumbu, Yehowa udi utungunuka ne kutupesha tshintu tshionso tshitudi natshi dijinga bua tuetu kuenza disua diende. (Eb. 13:20, 21) Bu mudi Yehowa ututabalela, katuena tupangila kantu nansha kamue. (Mus. 23:1) Tudi tupeta malu malenga a bungi mu kasumbu ketu ka buambi. Tuetu bikale ba kumpala bua kuela tshidia ne ‘tukuna bia bungi,’ ‘netupole bia bungi.’—2 Kol. 9:6.
[Kazubu mu dibeji 6]
Udiku mua kufila nzubu webe anyi?
Bimue bisumbu bitu bisangisha tusumbu tua buambi kaba kamue mu Disambombo bualu kabatu ne nzubu wa kuenzelabu tshisangilu tshia buambi to. Bu mudi bisangilu bia buambi bikale bumue bua ku malu atu tshisumbu tshienza, kuteka tshisangilu etshi ku nzubu kuetu ndiakalenga dinene be! Kuenaku mua kufila nzubu webe anyi? Kutshinyi anu bualu nzubu webe ki mmuimpe to! Bakulu nebatangile muaba udiye ne makuabu malu a buena avuabu batangila kumpala kua kusungula muaba wa kuteka dilonga dia mukanda. Wewe musue, udi mua kuleja mutangidi wa kasumbu kenu.