Usanke bua mudimu mukole uudi wenza
1. Tshidi mua kukepesha tshisumi tshietu mu buambi ntshinyi?
1 Bakafuka muntu bua ‘kusanka mu midimu yende.’ (Muam. 2:24) Kadi patudi katuyi tupatula bipeta bimpe mu buambi, diteketa mu mikolo didi mua kujimija disanka dietu ne kukepesha tshisumi tshietu. Tshidi mua kutuambuluisha bua kubenga kujimija disanka edi ntshinyi?
2. Nansha bantu kabayi bitaba, bua tshinyi tudi ne bua kuikala ne mmuenenu muimpe?
2 Ikala ne mmuenenu muimpe: Vuluka ne: nansha muvua bantu bakese bitabe malongesha a Yezu, uvua muenze mudimu wende bimpe. (Yone 17:4) Mu mufuanu wa mukunyi wa maminu, Yezu wakamba ne: mioyo ya bantu ba bungi kayivua mua kuitaba mukenji wa Bukalenge uvua mufuanangane ne maminu to. (Mat. 13:3-8, 18-22) Kadi, tuetu tuditatshisha bikole, netukumbaje malu a bungi.
3. Nansha batuteleja anu kudi bantu bakese, mmunyi mutudi mua kupatula bipeta bimpe?
3 Mutudi tukuama mamuma a bungi: Bilondeshile mufuanu wa Yezu, bantu badi bitaba lumu luimpe badi bapatula bipeta bimpe. (Mat. 13:23) Padi kamutshi ka blé katoloka ne kakola, lutete ludiku kapatula ki nkamutshi kakese ka blé to, kadi ndiminu dipiadipia. Nanku bimuma bidi bena Kristo bapatula kabiena anu nangananga bayidi bapiabapia to, kadi mmaminu mavule atudi tukuna patudi tuakula bua Bukalenge. Bualu ebu budi butufikisha ku dimona bimpe mudimu wetu, bitupetesha disanka nansha bantu bobu kabayi batuteleja. Tudi tuambuluisha bua dîna dia Yehowa ditumbe. (Yesh. 43:10-12; Mat. 6:9) Tudi tusanka bua diakalenga ditudi nadi dia kuikala benzejanganyi ba mudimu ne Nzambi. (1 Kol. 3:9) “Mamuma a mishiku” a nunku adi asankisha Yehowa.—Eb. 13:15, 16.
4. Mudimu wetu udi mua kupatula bipeta kayi bitudi katuyi bamanye?
4 Bualu bukuabu, mudimu wetu mukole udi mua kuikala ne bipeta bitudi katuyi tumona. Mbimueneke ne: bamue bantu bavua Yezu muyishe bakalua bayidi bende pakavuaye mumane kuya mu diulu. Bia muomumue, maminu a Bukalenge adi mua kutoloka ne kukola mu muoyo wa muntu panyima pa matuku a bungi; udi mua kulua muena Kristo katuyi bamanye. Mudimu wetu wa buambi udi utupetesha malu mimpe a bungi. Nunku, tutungunukayi ne “kukuama mamuma a bungi” bua kuleja ne: tudi bayidi ba Yezu.—Yone 15:8.