Bintu biabu bia pa mutu biakakumbaja bivua bipangike

MU TSHIDIMU tshia 49, Petelo, Yakobo ne Yone “bavua bamueneka bu makunji” bakapesha Paulo ne Bânaba mudimu kampanda. Bavua ne bua kuvuluka bena Kristo bavua bapele pavuabu bayisha mu bisamba bikuabu. (Gal. 2:9, 10) Mmushindu kayi wakakumbajabu mudimu eu?

Mikanda ivua Paulo mufunde idi ileja muvuaye utabalela bualu ebu. Tshilejilu, wakafundila bena Kristo ba mu Kolinto ne: “Bua disangishila bansantu bintu, nudi mua kulonda malu amvua muambile bena mu bisumbu bia mu Galatiya. Dituku dionso dia kumpala dia lumingu, muntu ne muntu ateke tshintu ku luseke bilondeshile mudiye mukokeshe bua kakuikadi disangisha dia bintu pandi mfika. Kadi pandi mfika, nentume bantu banudi nuanyisha mu mikanda yenu bua kuyabu ne dipa dienu dinudi bafile ne muoyo muimpe ku Yelushalema.”​—1 Kol. 16:1-3.

Paulo wakaleja mu mukanda wende muibidi uvuaye mutumine bena mu Kolinto tshivuabu basangishila bintu abi. Wakamba ne: “Bua dikumbanangana, bintu bienu bidi bipite pa mutu bikumbaje mpindieu bidibu bapangile.”​—2 Kol. 8:12-15.

Pavua Paulo mufundile bena Kristo ba ku Lomo mu tshidimu bu tshia 56 bikondo bietu ebi, bakavua bajikije disangisha dia bintu. Wakamba ne: “Nkadi pa kuya ku Yelushalema bua kukuatshilaku bansantu mudimu. Bualu bena ku Makedoniya ne ku Akaya bavua ne disanka dia kufila bintu biabu bu dipa kudi bapele badi munkatshi mua bansantu ba ku Yelushalema.” (Lomo 15:25, 26) Matuku makese pashishe, Paulo wakakumbaja mudimu wende bualu diakamue pakapinganaye ku Yelushalema ne kumukuatabu, wakambila nguvena wa bena Lomo Felika ne: “Ngakalua bua kupesha ba mu tshisamba tshietu bintu bia luse, ne bua kufila milambu.”​—Bien. 24:17.

Mêyi avua Paulo muambile bena mu Makedoniya adi aleja patoke lungenyi luvua bena Kristo ba mu bidimu lukama bia kumpala baleje. Wakaleja ne: ‘bakatulomba ne muoyo mujima bua bikale ne diakalenga dia kufila ne muoyo muimpe.’ Mupostolo wakalomba bena mu Kolinto bua kuidikijabu tshilejilu atshi. Wakamba ne: “Muntu ne muntu enze bu mudiye mupangadije mu muoyo wende, kenji ne kanyinganyinga anyi bu muenzeja ku bukole, bualu Nzambi mmunange muntu udi ufila ne disanka.” Tshivua tshisake bena mu tshisumbu bua kufilabu bintu biabu ntshinyi? Dijinga diabu kadivua anu dia “kupesha bansantu bidibu nabi dijinga, kadi mbua kuikala kabidi babanji mu mêyi a bungi a kuela nawu Nzambi tuasakidila.” (2 Kol. 8:4; 9:7, 12) Tudi petu mua kufila bintu bietu ne lungenyi lua nunku. Yehowa Nzambi neabeneshe lungenyi luimpe elu, ne dibenesha diende didi divuija muntu mubanji.​—Nsu. 10:22.

MUSHINDU UDI BAMUE BAFILA MAPA BUA MUDIMU WA PA BULOBA BUJIMA

Anu bu mu tshikondo tshia Paulo, bantu bavule lelu batu balama makuta bungi kampanda bua kuela mu tushete tua mapa a “Mudimu wa pa buloba bujima.” (1 Kol. 16:2) Ku ngondo yonso, bisumbu bitu bituma makuta aa ku biro bia Bantemu ba Yehowa bidi bitangila mudimu wa ditunga diabu. Nudi mua kutuma kabidi makuta aa buludiludi ku biro bia Bantemu ba Yehowa bidi bitangila mudimu mu ditunga dienu. Bua kumanya bulongolodi budi Bantemu ba Yehowa benza nabu mudimu mu ditunga dienu budi bumanyike kua mbulamatadi, suaku webeje Betele udi utangila midimu mu ditunga dienu. Udi mua kupeta adrese wa Betele eu ku Enternete mu site wa www.jw.org. Mapa anudi mua kutuma buludiludi ngowu aa:

DIFILA BINTU BITUDI NABI

• Nudi mua kufila makuta, bilengejilu bu mudi mpeta ne bikanu bia or peshi bintu bikuabu bia mushinga mukole.

• Nutume makuta anyi bintu ebi ne mukanda muipi udi uleja ne: nudi babitume bua kashidi.

DILAMISHA MAKUTA

• Muntu udi mua kufila bintu biende nansha makuta bua balue kumupingajila pikalaye nawu dijinga.

• Muntu udi mua kufunda mukanda udi uleja ne: bintu ebi mbia kupingaja.

MAPA MALONGOLOLA

Pa kumbusha mapa a makuta ne bintu bietu bia mushinga mukole, kudi mishindu mikuabu ya kufila bintu bua mudimu wa Bukalenge udi wenzeka pa buloba bujima. Mbaleje mishindu eyi kuinshi eku. Nansha wewe musungule mushindu kayi bua kufila mapa aa, suaku wanji kuebeja Betele udi utangila midimu ya mu ditunga dienu bua kumanya mishindu idiku idibu bakuata nayi mudimu mu ditunga dienu. Bu mutu mikenji ne bitadi bishintuluka, mbimpe kuebeja bantu badi bamanye bimpe malu a bitadi ne mikenji kumpala kua wewe kusungula mushindu muimpe wa kufila mapa.

Makuta a tshieya: Mmapa adi muntu mua kupesha bumue bua ku malongolodi budi Bantemu ba Yehowa benza nabu mudimu ne kuleja mudi bulongolodi ebu ne bukenji bua kuangata makuta ende a tshieya anyi a pansio.

Konte ya ku banke: Muntu udi mua kufundisha konte yende ya ku banke, mikanda ya makuta matekesha ku banke anyi konte yende ya makuta a pansio mu dîna dia bumue bua ku malongolodi budi Bantemu ba Yehowa benza nabu mudimu bilondeshile mikenji ya banke ya muaba udiye.

Bukenji bua kupeta bintu ne makuta masombesha: Muntu udi mua kupesha bumue bua ku malongolodi budi Bantemu ba Yehowa benza nabu mudimu bukenji bua kupeta bintu ne makuta masombesha anyi bukenji bua kuangata bua kashidi padiye ufua.

Mpangu ne nzubu: Muntu udi mua kufila lupangu anyi nzubu wende kudi bumue bua ku malongolodi budi Bantemu ba Yehowa benza nabu mudimu bua kashidi, kadi bikalaye musombele mu lupangu elu, udi mua kutungunuka ne kusombelamu too ne muafuaye.

Dipa dia kufuta ku tshidimu: Mmakuta anyi mikanda bidibu bapesha bumue bua ku malongolodi budi Bantemu ba Yehowa benza nabu mudimu, bumvuangana ne muntu udi ubifila anyi muntu udiye musungule bua kutuadija kupeta makuta bungi kampanda tshidimu tshionso patshidiye ne muoyo. Tshidimu tshidi muntu ufila dipa edi badi bamupuekeshila mushinga wa bitadi bituye ufuta.

Testama ne bintu bilamisha: Muntu udi mua kushila bumue bua ku malongolodi budi Bantemu ba Yehowa benza nabu mudimu bintu anyi makuta ende, peshi kubupa bukenji bua kuangata bintu bidiye mulamishe. Kuenza nunku kudi mua kukepeshisha mushinga wa bitadi.

Anu mudi tshiambilu “mapa malongolola” tshileja, mapa a mushindu eu atu alomba bua muntu adianjile kudilongolola. Bua kuambuluisha bantu badi bajinga kukuatshisha mudimu udi Bantemu ba Yehowa benza pa buloba bujima ne mapa malongolola, mbapatule kakanda ka mu Anglais ne mu tshiena Espagne kadi ne tshiena-bualu tshia ne: Charitable Planning to Benefit Kingdom Service Worldwide (Mapa malongolola bua kukuatshisha mudimu wa Bukalenge wa pa buloba bujima). Mbenze kakanda aka bua kuleja mishindu mishilashilangane idi bantu mua kufila mapa ne bintu bia bumpianyi mpindieu nansha padibu bafua. Malu adibu baleje mu kakanda aka kaena anu mua kuikala akutangila wewe bilondeshile bitadi ne mikenji idi mu ditunga dienu to. Nunku, paudi ubala kakanda aka, udi kabidi ne bua kuebeja bantu badi bamanye mikenji ne malu a bitadi bia mu ditunga dienu. Bantu ba bungi badi benze mudimu ne mishindu ya difila mapa eyi mbafike ku dikuatshisha mudimu wa Nzambi ne kuambuluisha mudimu wa pa buloba bujima, ne mbabakepeshile bungi bua makuta a bitadi avuabu bafuta. Bikala kakanda aka mu ditunga dienu, udi mua kukalombesha kudi sekretere wa mu tshisumbu tshienu.

Bua kumanya malu makuabu, udi mua kubikila biro bia mapa malongolola anyi kubifundila ku adrese udi kuinshi eku, peshi udi mua kubikila anyi kufundila Betele udi utangila mudimu mu ditunga dienu.