“Nunange tshisumbu tshijima tshia bana betu”

Bavua bafunde mêyi aa kukadi mpindieu bidimu bitue ku 2 000. (1 Pet. 2:17) Kadi tudi ne bua kuatumikila nangananga matuku etu aa. Mmunyi mutudi mua kunanga tshisumbu bunene nunku tshidi pa buloba bujima? Bu mutudi mu bulongolodi mudi bantu kabayi ne dinanga, mmushindu kayi utudi mua kujadika ne: dinanga dietu kadiena dikepela? (Mat. 24:12) Paudi umona filme wa Tshisumbu tshijima tshia bana betu (Toute la communauté des frères), utetaku kuandamuna nkonko idi ilonda eyi.

1) Mu bulelela, tuvua babuele mu tshisumbu tshia bana betu bena Kristo ba pa buloba bujima dîba kayi? 2) Tela midimu isatu itutu tuenza pamue ne bana betu bonso ba pa buloba bujima. 3) Mmushindu kayi udi bana betu baleja dipangadika diabu dia kuyisha a) mu tshipela tshia Alaska, b) mu bitudilu binene bia mazuwa a mâyi bia ku Mputu, ne c) mu mêtu manene a mu ditunga dia Pérou? 4) Bua tshinyi katuena ne bua kumona ne: kuyisha mmudimu anu bu midimu yonso eyi? 5) Fila bilejilu bia mushindu udi Bantemu ba Yehowa basambangane ne bakuatshishangane pavua a) bikumina bienzeke, b) mpepele mikole, ne c) mvita mijuke. 6) Mmalu kayi atudi mua kuenza tuetu bonso bua kuleja tshimanyinu tshinene tshia buena-muntu buetu bua bena Kristo? (Yone 13:35) 7) Kuenza mudimu wa dibaka Nzubu yetu ya Bukalenge kudi kupetesha masanka kayi? 8) Mmunyi muvua bana betu ba ku Mputu wa ku Est ne ba mu ditunga dia Russie bashale balamate Yehowa pavuabu bakandike midimu yetu mu matunga aa? 9) Mmushindu kayi udi Bantemu ba bungi badienzeja bikole menemene bua kubuela mu mpungilu? Bua tshinyi? 10) Mmunyi mudi filme eu mukoleshe dipangadika diebe a) bua kutendelela Yehowa mu bisangilu bietu mu buobumue ne bana betu, b) bua kuambuluisha bakuabu padibu mu ntatu, ne c) bua kuyisha ne muebe muonso dîba dionso diudi ne mushindu? 11) Ndîba kayi diudi mua kuenza mudimu ne filme eu mu buambi? Mushindu kayi?

Dinanga ditudi nadi bua Yehowa ke bualu bunene budi butusaka bua kuikala mu tshisumbu tshia bana betu. Nanku tudi basue bikole kulonga malu a Yehowa ne kualongesha bakuabu. Tudi banange kabidi bantu badi Yehowa munange. Patudi tubambuluisha padibu mu ntatu, katuena tuindila bua Nzambi atuele tuasakidila to. Kadi, tudi tumuela tuasakidila bualu tudi tumona ne: tshisumbu tshijima tshia bena Kristo netu ndipa dimpe menemene didi difumina kudiye. Bu mudi matuku a bulongolodi ebu (mudi bantu kabayi ne dinanga) mashale makese, nanku tutungunukayi ne kunanga tshisumbu tshijima tshia bana betu.