Tshidi tshitusaka bua kuyisha ntshinyi?

1. Ndiumvuangana kayi didi pankatshi pa dinanga ne mudimu wetu wa kuyisha?

¹ Kuyisha lumu luimpe lua Bukalenge bua Nzambi ke mudimu wa mushinga mukole utudi mua kuenza lelu. Nanku, patudi tuwenza tudi tuleja mutudi tutumikila mikenji minene ibidi eyi: kunanga Yehowa ne kunanga muntu netu. (Mâko 12:29-31) Dinanga ke didi ditusaka bua kuikala bambi ba lumu luimpe ba tshisumi.​—1 Yone 5:3.

2. Mmunyi mudi mudimu wetu wa kuyisha uleja mutudi banange Yehowa?

² Dinanga dietu bua Yehowa: Dinanga dietu bua Mulunda wetu munene Yehowa didi ditusaka bua kumuakuila. Kukadi bidimu bitue ku 6 000 bidi Satana ushiminyina Nzambi malu. (2 Kol. 4:3, 4). Nanku, bantu badi bitaba ne: Nzambi utu ukengesha bantu babi mu inferno wa kapia, utu busatu bunsantu, ne katu uditatshisha bua bantu. Ba bungi mbafike too ne ku diamba ne: katuku to. Tutu basue ne: bantu bamanye bimpe Tatu wetu wa mu diulu. Mudimu mukole utudi tuenza bua kuyisha bantu udi usankisha Yehowa bikole ne ubungamija Satana.​—Nsu. 27:11; Eb. 13:15, 16.

3. Bua tshinyi mudimu wetu wa kuyisha udi uleja mutudi banange bantu netu?

³ Dinanga dietu bua bantu netu: Dîba dionso ditudi tuyisha muntu kampanda, tudi tuleja ne: tudi bamunange. Mu matuku makole aa, bantu badi ne dijinga dikole dia kuteleja lumu luimpe. Bantu ba bungi badi bu bena Ninewe ba mu matuku a Yona bavua ‘kabayi mua kujingulula tshianza ne tshia balume ne tshia bakaji.’ (Yona 4:11) Mudimu wetu wa kuyisha udi ulongesha bantu mua kuikalabu ne nsombelu muimpe ne wa disanka. (Yesh. 48:17-19) Udi ubapesha ditekemena. (Lomo 15:4) Bobu bateleje ne batumikile bidibu balonga, ‘nebasungidibue.’​—Lomo 10:13, 14.

4. Ntshinyi tshikala Yehowa kayi mua kupua muoyo?

⁴ Bana bimpe batu baditatshisha bua kuleja baledi babu dinanga misangu yonso, ki nganu misangu kampanda to. Bia momumue, dinanga dikole ditudi nadi bua Yehowa ne bua bantu netu neditusake bua kutabalela mpunga yonso wa kuyisha, katuyi anu tulonda programe wetu to. Netuyishe katuyi tulekela. (Bien. 5:42) Yehowa kakupua dinanga dia mushindu eu muoyo to.​—Eb. 6:10.