Mbavudije mishindu ya kutumbisha Yehowa
1. Mbualu kayi bupiabupia budibu balongolole buatuambuluisha bua ‘kusakidila Yehowa bikole’?
1 Mu ngondo 3 wa tshidimu etshi, bavua balongolole mushindu mupiamupia wa bamanyishi kupetabu mpunga wa kulua bampanda-njila bambuluishi badi bafila mêba 30 bua ngondo 3 ne 4 ne bua ngondo udi tshisumbu ne dikumbula dia mutangidi wa tshijengu dia tshibidilu. Bikala dikumbula dia mutangidi wa tshijengu dituadija ku ndekelu kua ngondo umue, dijika ku ntuadijilu kua mukuabu, bamanyishi badi balomba bua kuenza mêba 30 badi mua kusungula ngondo umue udibu basue kuikala bampanda-njila bambuluishi. Bampanda-njila bambuluishi bonso badi mua kubuela mu tshisangilu tshienza mutangidi wa tshijengu ne bampanda-njila ba pa tshibidilu ne ba pa buabu too ne ku ndekelu kuatshi. Nanku, tuetu katuyi mua kuenza mêba 50, tudi anu mua ‘kusakidila Yehowa bikole’ pa kuenza mudimu wa bumpanda-njila buambuluishi bua mêba 30 misangu mitue ku inayi ku tshidimu.—Mus. 109:30; 119:171.
2. Aba bikala bampanda-njila bambuluishi mu lumingu lua pa bualu nebapete masanka kayi?
2 Mu lumingu lua pa bualu: Mpindieu bantu ba bungi nebikale ne mushindu wa kulua bampanda-njila bambuluishi mu dikumbula dia mutangidi wa tshijengu, ne nebikale ne disanka dia kukankamijangana nende padibu bayisha nende. (Lomo 1:11, 12) Pamuapa bampanda-njila bambuluishi ba bungi badi mua kulomba dikisha ku mudimu dituku dimue dia munkatshi mua lumingu bua kuyishabu ne mutangidi wa tshijengu. Aba badi kabayi mua kuangata dikisha badi mua kulomba mutangidi wa tshijengu bua bayishe nende mu Disambombo anyi mu Dia lumingu. Bidi mua kukolesha bampanda-njila bambuluishi bikole padibu babuela mu tshisangilu ne bampanda-njila ba pa tshibidilu ne ba pa buabu.
3. Bua tshinyi tshikondo tshia Tshivulukilu ntshikondo tshimpe tshia kuangata bumpanda-njila buambuluishi?
3 Mu ngondo 3 ne 4: Bamanyishi bavua bangate mudimu wa bumpanda-njila buambuluishi mu tshikondo tshia Tshivulukilu bua kufila mêba 30 bua ngondo umue (bu muvuabu balongolole kumpala) badi mpindieu mua kufila ‘mulambu wa kutumbisha’ nawu Nzambi bua ngondo ibidi. (Eb. 13:15) Ngondo 3 ne 4 nngondo mitambe buimpe itudi mua kuvudija mudimu wetu, nngondo ya kuikala bampanda-njila bambuluishi. Tshidimu tshionso, mu ngondo eyi tutu tuabanya mabeji a dibikila nawu bantu mu Tshivulukilu. Bualu bukuabu: bu muikala bamanyishi ba bungi mua kuyisha bikole mu tshikondo tshia Tshivulukilu, tudi mua kuyisha ne bamanyishi bavule. Padi Tshivulukilu tshipita, netukoleshe dijinga dia bantu bavua babuelamu ne netubambuluishe bua bikale ne disanka dia kulua kuteleja muyuki wa pa buawu. Muoyo webe neukusakaku bua kuikala mpanda-njila muambuluishi mu ngondo ibidi eyi anyi?—Luka 6:45.