Nzambi mmusue bua tuikale ne ditalala ne disanka bua kashidi mu mparadizu pa buloba apa.

Kadi udi mua kudiebeja ne: ‘Bualu ebu nebuenzeke bulelela anyi?’ Bible udi wamba ne: Bukalenge bua Nzambi nebuenze bualu ebu. Ke bua tshinyi, Nzambi mmusue ne: tuetu bonso tumanye Bukalenge ebu ne malu adiye mulongolole bua kutuenzela.​—Misambu 37:11, 29; Yeshaya 9:7.

Nzambi mmusue ne: tuikale bimpe.

Anu bu mutu tatu muimpe musue ne: bana bende bikale ne disanka, Tatu wetu udi mu diulu mmusue ne: tuikale ne disanka bua kashidi. (Yeshaya 48:17, 18) Mmulaye ne: “muntu udi wenza disua dia Nzambi udi ushalaku kashidi.”​—1 Yone 2:17.

Nzambi mmusue ne: tuendele mu njila yende.

Bible udi wamba ne: Nzambi mmusue ‘kutulongesha njila yende’ bua tuetu ‘tuendele mu njila yende.’ (Yeshaya 2:2, 3) Mmulongolole “tshisamba bua dîna diende,” bua kumanyisha disua diende pa buloba bujima.​—Bienzedi 15:14.

Nzambi mmusue ne: tumutendelele mu buobumue.

Ntendelelu mulelela wa Yehowa udi usangisha bantu mu dinanga dilelela, kena ubatapulula to. (Yone 13:35) Batu balongesha lelu bantu miaba yonso bua kutendelela Nzambi mu buobumue mbanganyi? Wewe mubale mukanda eu, neupete diandamuna.

Utu mumanye Bantemu ba Yehowa bungi munyi? Bamue ba kutudi badi mua kuikala bena mutumba benu, bena mudimu nebe, balongi benu, anyi uvua mua kuikala muyikile nabu malu a Nzambi. Tudi banganyi menemene? Bua tshinyi tutu tuyisha bantu?

Tudi anu bu bantu bonso. Tudi bafume miaba mishilangane, bakole mishindu mishilangane. Bamue bavua mu nzambi mikuabu, bakuabu kabavua bitaba ne: Nzambi utuku to. Kadi kumpala kua kuluabu Bantemu, buonso buetu tuvua bakonkonone bimpe bimpe malu adi Bible wamba. (Bienzedi 17:11) Tuetu kuitaba malu au, ke muntu ne muntu kuangata dipangadika dia kutendelela Yehowa Nzambi.

Dilonga dietu dia Bible didi dituambuluisha. Tutu petu tupeta ntatu ne tuenza bilema anu bu bantu bonso. Kadi bu mututu tuluangana bua kutumikila mibelu ya mu Bible dituku dionso, nsombelu wetu mmulongoloke. (Misambu 128:1, 2) Ke bualu kayi tutu tuambila bantu bakuabu malu malenga atudi tulonga aa.

Tutu tulonda mêyi a Nzambi. Mêyi aa adi mu Bible. Adi atuambuluisha bua kudiumvua bimpe, kunemeka bakuabu, kuamba bulelela, kuikala ne bulenga ne ngikadilu mikuabu mimpe. Adi atuambuluisha bua kuikala ne makanda a mubidi ne kuenza malu adi ambuluisha bantu. Adi ambuluisha bena mu dîku bua bikale mu buobumue ne bua bikale ne bikadilu bilenga. Bu mutudi bashindike ne: “Nzambi kena ne kansungansunga,” tudi tuenza dîku didi pa buloba bujima, katuyi tusunguluja dikoba anyi tshisamba nansha ditunga. Nansha mutudi bu bantu bonso, tudi tuenza kasumbu ka bantu ba wabu mushindu.​—Bienzedi 4:13; 10:34, 35.

• Bantemu ba Yehowa mbafuanangane ne bantu bakuabu ku tshinyi?

• Bantemu badi bapeta bibidilu kayi padibu balonga Bible?

Bamue bantu batu bela meji ne: dîna dia Bantemu ba Yehowa ndîna dia tshitendelelu tshipiatshipia. Pabi, mbatuadije kubikila batendeledi ba Nzambi umuepele mulelela ne: “bantemu,” kukadi bidimu bipite pa 2 700. (Yeshaya 43:10-12) Bavua batubikila ne: Balongi ba Bible too ne mu 1931. Kadi bua tshinyi tuakangata dîna dia Bantemu ba Yehowa?

Didi dileja Nzambi utudi tutendelela. Yehowa ke dîna dia Nzambi. Dîna edi didi misangu binunu bia bungi mu mikanda ya kalekale. Mu Bible ya bungi, mbadiumbushe, bapingaje mêna a tshianana anyi mianzu bu mudi: Maweja, Mfumu anyi Mukalenge. Pabi, Nzambi mulelela wakambila Mose ne: dîna diende menemene ditu Yehowa. Kumuambilaye kabidi ne: “Edi ndîna dianyi bua kashidi.” (Ekesode 3:15) Dîna edi divua dimusunguluja ne nzambi yonso ya dishima. Tudi ne disanka dia bungi dia kubikidibua mu dîna dia tshijila edi.

Didi dileja mudimu utudi nawu. Bantu ba bungi ba kale, kutuadijila ku Abele, bavua bayisha bakuabu malu a Yehowa. Bantu bu mudi: Noa, Abalahama, Sala, Mose, Davidi ne bakuabu ba bungi bakalonda tshilejilu tshiende, kubuelabu pabu mu ‘tshisumbu tshinene tshia bantemu.’ (Ebelu 11:4–12:1) Tudi badisuike bua kumanyisha malu malelela adi atangila Nzambi, anu bu mudi muntu mua kuakuila mukuabu ku kabadi padiye kayi muenze bualu.

Tudi tuidikija Yezu. Badi babikila Yezu mu Bible ne: “ntemu wa lulamatu ne mulelela.” (Buakabuluibua 3:14) Yezu wakamba ne: uvua ‘mumanyishe dîna dia Nzambi’; kuambaye kabidi ne: uvua mutungunuke ne “kumanyisha bulelela.” (Yone 17:26; 18:37) Nunku, bayidi balelela ba Yezu badi babikidibua mu dîna dia Yehowa; badi kabidi bamanyisha dîna edi. Ke tshidi Bantemu ba Yehowa baditatshisha bua kuenza.

• Balongi ba Bible bakangata dîna dia Bantemu ba Yehowa bua tshinyi?

• Yehowa mmupete bantemu pa buloba katshia ku tshikondo kayi?

• Udi Ntemu wa Yehowa munene nnganyi?