Bible uvua muambe ne: kunyima kua lufu lua Yezu, balongeshi ba dishima bavua ne bua kupatuka munkatshi mua bena Kristo ba kumpala bua kubueja malongesha a dishima. (Bienzedi 20:29, 30) Ke tshiakalua kuenzeka menemene! Bakasambakaja malongesha a Yezu ne a bitendelelu bia dishima, kuenzabu Buena-Kristo bua dishima. (2 Timote 4:3, 4) Kadi mmunyi mutudi mua kujadika lelu eu ne: tudi bamanye malongesha a mu Bible bimpe menemene?

Tshikondo tshia Yehowa kumanyisha bulelela tshiakalua. Yehowa uvua muambe ne: ‘tshikondo tshia ku nshikidilu, dimanya dilelela nedivulangane.’ (Danyele 12:4, NW) Mu tshidimu tshia 1870, kasumbu kampanda ka bantu bavua bakeba kumanya bulelela kakajingulula ne: malu a bungi avuabu balongesha mu bitendelelu kaavua mu Bible to. Ke bualu kayi bakatuadija kukeba bua kumvua malu anu bu muvuawu mu Bible. Yehowa wakabambuluisha bua kumvua malu au.

Bantu bavua basue kumanya Nzambi bakalonga Bible bimpe bimpe. Bavua balonga Bible ne muoyo umue. Bavua balonga Bible anu mushindu ututu petu tumulonga lelu. Tshilejilu, bavua bayikila tshiena-bualu tshimue ku tshimue. Pavuabu bapeta mvese uvuabu kabayi bumvua bimpe, bavua bakeba mvese mikuabu ivua yumvuija mvese au. Pavuabu bapeta diumvuija kampanda divua diumvuangana ne mvese mikuabu, bavua badifunda. Bu muvuabu balekela mvese nkayayi yumvuija mikuabu, bakamanya kabidi tshidi Bible wamba bua dîna dia Nzambi, Bukalenge buende, tshidiye musue kuenzela bantu ne buloba, tshidi bantu balua patubu bafua ne dibika dia ku lufu. Dilonga diabu diakabambuluisha bua kulekela bilele ne malongesha a dishima.​—Yone 8:31, 32.

Mu 1879, balongi ba Bible aba bakamona ne: dîba divua dikumbane dia kumanyisha bantu bakuabu malu aa. Ke bualu kayi bakabanga kupatula anu mu tshidimu atshi tshibejibeji tshia Tshibumba tshia Nsentedi tshidi tshimanyisha Bukalenge bua Yehowa tshitudi tupatula too ne lelu. Tudi tumanyisha bantu malu malelela aa lelu mu matunga 240, mu miakulu mipite pa 750. Katshia dimanya dilelela kaditu dianji kuvulangana nunku to!

• Pakafua Yezu, tshiakafikila malongesha malelela a mu Bible ntshinyi?

• Tshivua tshituambuluishe bua kumanya kabidi malongesha malelela a mu Bible ntshinyi?

Kumpala, tuetu Bantemu ba Yehowa tuvua tuenza mudimu ne Bible ya mishindu ya bungi, tuyipatula ne tuyabanya kabidi. Kadi bu mudi Nzambi musue bua muntu yonso apete “dimanya dijalame dia bulelela,” tuakalua kumona ne: bivua bikengela kupatula nkudimuinu wa Bible uvua mua kuambuluisha bantu bimpe menemene. (1 Timote 2:3, 4) Ke bualu kayi kubangila mu 1950, tuakatuadija kupatula bitupa bia Bible wetu wa Nkudimuinu wa bulongolodi bupiabupia. Bible eu mbamukudimune biakane mu miakulu mipite pa 130.

Bantu bavua dijinga ne Bible mupepele bua kumvua. Miakulu itu ishintuluka, kadi imue Bible ishala ne miaku ya kale idi bantu kabatshiyi bamanye. Bavua bangule kabidi imue mivungu ya kale ya kueyemena ivua ipetangana bikole ne bivua bafundi ba Bible nkayabu bafunde. Mivungu eyi mmiambuluishe bantu bua kumvua kabidi bimpe menemene malu avua mafunda mu Bible mu tshiena Ebelu, mu tshiena Alama ne mu tshiena Greke.

Bantu bavua dijinga ne Bible udi ne malu anu muvuawu mu Dîyi dia Nzambi. Bakudimunyi ba dîyi divua Nzambi mufundishe badi ne bua kudilonda anu muvuaye mudifundishe pamutu pa kushintululamu bimue bintu. Kadi pabi, mu Bible ya bungi lelu, kamuena dîna dia Nzambi to. Dîna dia Nzambi n’Yehowa.

Bantu bavua dijinga ne Bible uvua utumbisha eu udi mumufundishe. (2 Samuele 23:2) Mu Nkudimuinu wa bulongolodi bupiabupia mbapingaje dîna edi Yehowa miaba mitue ku 7 000 anu muvuadi mu mivungu ya Bible ya kale, bu eu udibu baleje mu tshimfuanyi tshidi kuinshi eku. (Misambu 83:18) Bible eu udi wenza disanka bua kumubala bualu udi uleja meji a Nzambi mu mushindu mupepele. Bua kumupatula, batu banji kukebulula malu bikole munkatshi mua bidimu bia bungi. Nansha nuenu ne Bible eu mu muakulu wenu anyi kanuyi nende, tudi tukulomba bua wikale ubala Bible uudi nende dituku dionso.​—Yoshua 1:8; Misambu 1:2, 3.

• Tuvua bapatule nkudimuinu mupiamupia wa Bible bua tshinyi?

• Tshitudi ne bua kuikala tuenza dituku dionso ntshinyi bua kumanya disua dia Nzambi?