Tshiena-bualu tshiatuambuluisha bua kuyisha
1. Tshiena-bualu tshia “Muntu uyukila ne Ntemu wa Yehowa” tshidi ne bipatshila kayi binene bibidi?
1 Mu imue nimero ya Tshibumba tshia Nsentedi tshia bantu bonso mutu tshiena-bualu tshia ne: “Muntu uyukila ne Ntemu wa Yehowa.” Tshiena-bualu etshi tshidi ne bipatshila binene bibidi ebi: 1) Kulongesha bantu malu a mu Bible mu mushindu udi ubasankisha. 2) Kutuleja mutudi mua kueleshisha bantu meji bua tshiena-bualu kampanda ne bukalanga buonso. (1 Pet. 3:15) Tudi mua kuenza tshinyi bua kuyisha bimpe ne tshiena-bualu etshi?
2. Leja mutudi mua kuyisha ne tshiena-bualu etshi.
2 Uyishe natshi: Udi mua kulama mu tshibuta tshiebe tshia buambi bimue bibejibeji bia Tshibumba tshia Nsentedi bidi ne tshiena-bualu etshi. Padi muntu utudi tuyisha bua musangu wa kumpala, anyi ukavua muanyishe bulelela peshi mulongi wa Bible wela lukonko anyi ujula milandu bua bualu bukadibu bakuile mu tshimue tshia ku bibejibeji abi, umupeshe tshibejibeji tshidi ne tshiena-bualu atshi, pashishe umulombe bua nubuyukile nende. Wewe kuyi ne tshibejibeji tshidi ne tshiena-bualu etshi, udi mua kutshiangatshila mu site wetu wa jw.org.
3. Leja mutudi mua kuyukila tshiena-bualu etshi ne muntu.
3 Tudi mua kuyukila tshiena-bualu etshi ne muntu mushindu kayi? Bamue batu balomba udibu bayukila nende bua kubala ne dîyi dikole mêyi a muntu, kadi bobu babala mêyi a Ntemu. Kuyukila ne muntu ku diambuluisha dia Tshibumba tshia Nsentedi mushindu eu kudi kupatula bipeta bimpe bualu kudi kuambuluisha muntu bua kukonkononaye malongesha etu kayi ujula milandu.—Dut. 32:2.
4. Leja mutudi mua kudilongesha nkayetu ne tshiena-bualu etshi.
4 Udilongeshe, ulongeshe ne bakuabu: Paudi ubala tshiena-bualu etshi, utabalele mvese, bilejilu ne mushindu udibu beleshisha muntu meji. Utangile mushindu udibu bumvuije malu. Pashishe, ukebe bua kuenza bia muomumue paudi uyisha. (Nsu. 1:5; 9:9) Muanetu wa bakaji kampanda wakamba ne: “Kubala tshiena-bualu etshi kudi bu kulonga malu ku diambuluisha dia mpanda-njila ‘mupiluke bikole,’ mmumue ne: utu anu mumanye diandamuna dimpe dia kupesha muntu.”
5. Leja mutudi mua kuambuluisha balongi ba Bible bua kudilongolola bua kuyisha.
5 Udi kabidi mua kuenza mudimu ne biena-bualu ebi bua kuambuluisha balongi ba Bible bua kudilongololabu bua mudimu wa buambi. Nubale nende malu adimu, wambile mulongi wa Bible angate muaba wa mumanyishi. Kuenza nunku kudi mua kuambuluisha balongi ba Bible bua kumanyabu mua kumvuija bantu malu adibu balonga ne bukalanga. (Kolos. 4:6) Bulelela, tshiena-bualu etshi ngumue wa ku mishindu idi Yehowa utuambuluisha bua kuyisha ne ‘muetu muonso.’—2 Tim. 4:5.