Mukanda wa kudi Kasumbu Kaludiki

Bena mudimu netu basuibue:

Tudi ne disanka dia bungi bua kunufundila mukanda eu ku ntuadijilu kua tshidimu etshi tshia pa buatshi! Ku ndekelu kua tshidimu tshia 2014, Mukalenge wetu Yezu Kristo utudi banange neakumbaje bidimu lukama bidiye ukokesha munkatshi mua baluishi bende.​—Mus. 110:1, 2.

Ku ntuadijilu kua tshidimu tshia mudimu etshi, mu tshisangilu tshia ku tshidimu tshivua bena tshibambalu tshia Watch Tower Bible and Tract Society of Pennsylvania benze, bena mu Komite wa Bible wa Nkudimuinu wa bulongolodi bupiabupia bavua bapatule Bible wa mu Anglais udibu bakajulule bimpe bitambe bua bantu bonso. Yehowa uvua mukuate mudimu ne bana bende badiye mulela mu nyuma nkayabu bua kupatula Nkudimuinu wa bulongolodi bupiabupia wa kumpala. (Lomo 8:15, 16) Bualu ebu budi buvuija nkudimuinu eu wa pa buende, kuenaku umona ne: bidi nanku anyi?

Kukadi bidimu bia bungi, bena mu Komite wa difunda wa Kasumbu Kaludiki mbateke dikudimuna dia Bible pa muaba wa kumpala. Lelu eu, Nkudimuinu wa bulongolodi bupiabupia mujima anyi tshitupa tshiende udi mu miakulu 121. Tudi tunulomba bua nuleje Yehowa dianyisha ne muoyo mujima bua Bible unudi nende. Nubalayi Bible eu ne nuelangana meji bua malu anudi nubalamu dituku dionso. Nunku, nenusemene pabuipi ne Yehowa Nzambi muena Bible eu.​—Yak. 4:8.

Bidi bitusama ku muoyo bikole patudi tumvua mudi bana betu bananga batuilangana ne ntatu. Bushuwa, imue misangu bidi mua kukolela bana betu aba bua kusanka pamue ne bakuabu. Tshilejilu, mu matuku adi panshi aa, bena mu dîku kampanda dia mu Asie mbatuilangane ne nsombelu mukole pavua mamu wa mu dîku adi mutekete diakamue luseke. Bia dibungama, baminganga bapiluke kabavua bakokeshe bua kumuondopa to. Bidi bisama ku muoyo bua kumona mudi bayende wambula bujitu buende dituku dionso. Muanabu wa balume ne bana babu babidi ba bakaji badi bafila tshilejilu tshimpe tshia bena Kristo padibu bambuluisha baledi babu. Dîku dimpe edi ne nuenu buonso badi bantantamena ntatu mishilangane, nudi mua kupeta disanka didi difuma ku dintantamena matete bua ditabuja dienu. (Yak. 1:2-4) Yehowa udi ujadikila bela manyi bende ne mikoko mikuabu ne: nebikale ne disanka padibu bantantamena ntatu bualu neababeneshe ne dipa dia muoyo wa tshiendelele.​—Yak. 1:12.

Tshidimu tshishale, bantu 19 241 252 bavua babuele mu Tshivulukilu. Bidi bienza disanka bua kumona muvua bantu ba bungi bapeshe Yehowa ne Yezu Kristo lumu pavuabu babuele mu tshisangilu tshitambe bunene tshia ku tshidimu tshia bantu ba Nzambi! Mu tshikondo tshia Tshivulukilu, bantu ba bungi bavua batumbishe Yehowa bikole mu dienza mudimu wa bupanda-njila buambuluishi mu ngondo muisatu ne muinayi. Bivua bualu bua disanka! Kuvuaku ne disanka bua kumvua ne: bana betu bavua bangate bumpanda-njila buambuluishi mu tshikondo tshia dikumbula dia mutangidi wa tshijengu badi ne bua kubuela mu tshisangilu tshia bampanda-njila tshidiye ulombola, nansha dikumbula diende kadiyi dienzeke mu ngondo muisatu peshi muinayi anyi? Bana betu badi bashindame mu malu a Nzambi bavua bamone mudibi ne mushinga bua kudifila mu mudimu wa buambi ne mu midimu ya tshisumbu. Kuikala ne bia bungi bia kuenza kudi kutuambuluisha bua kushala bashindame ne katuyi tunyungishibua padi Diabolo ututeta bua kutukulula mu ditabuja ne kutumbusha mu lubilu luetu lua bena Kristo.​—1 Kol. 15:58.

Tudi ne disanka dia bungi bua kumona ne: mu tshidimu tshia mudimu tshishale, bantu 277 344 bavua badilambule ne batambule, badi pabu mpindieu mu njila wa muoyo pamue ne bana betu bakuabu pa buloba bujima! (Mat. 7:13, 14) Bana betu bapiabapia aba badi dijinga ne diambuluisha dietu bua “buwujibue tente ne ditabuja.” (Kolos. 2:7) Tungunukayi ne kukankamijangana umue ne mukuabu bua kunanukila too ne ku nshikidilu. (Mat. 24:13) “Kuakula ne mêyi a busambi kudi badi babungame, kuambuluisha badi batekete, kuikala ne lutulu kudi bantu bonso.” (1 Tes. 5:14) Nunku, yonso wa kutudi atungunuke ne “kusambila misangu yonso” wamba ne: “Bukalenge buebe bulue.”​—1 Tes. 5:17; Mat. 6:10.

Tudi tunulomba bua nubale Annuaire eu ne tudi tunujakila ne: tudi banange yonso wa kunudi nuenu badi Yehowa munange!

Bana benu,

Kasumbu Kaludiki ka Bantemu ba Yehowa