Uyishe ne site wa jw.org

Site wetu wa Enternete ntshintu tshinene tshidi mua kutuambuluisha bua kumuangalaja lumu luimpe “too ne ku ntengu ya buloba.” (Bien. 1:8) Bantu ba bungi kabatu bamanye mua kudibuelela nkayabu mu site wa jw.org to. Kadi badi mua kumanya anu padi mumanyishi kampanda ubaleja.

Mutangidi wa tshijengu kampanda uvua muambule filme wa Bua tshinyi kulonga Bible? mu site wetu ne mumuele mu telefone wende ne uvua umuleja bantu misangu yonso ivua mpunga umueneka. Tshilejilu patuye uyisha ku nzubu ne ku nzubu, utu wamba ne: “Ndi ngenda ntangila bantu bua minite mikese bua kubambuluisha bua bapete mandamuna a nkonko ya mushinga isatu eyi: Bua tshinyi makenga adi pa buloba bungi nunku? Mmunyi muajikija Nzambi makenga aa? Ntshinyi tshitudi mua kuenza bua kuatantamena lelu? Kafilme ka minite mikese aka kadi kandamuna nkonko eyi.” Pashishe umuelelaku, ushala mutangile bua kumona tshidi muntu au wenza. Filme eu utu ukoka ntema ya bantu bikole, bifikisha ba bungi ku dishala anu batangile mu telefone too ne padi filme ujika. Pashishe mutangidi wa tshijengu eu utu wamba ne: “Udi mufume ku diumvua mudibu bambe ne: udi mua kulomba bua kulonga Bible ku Enternete. Kadi bu mundi meme muaba eu, ndi mua kukuleja lukasa mutubi bienzeka anu mpindieu.” Padi muntu witaba, utu umuleja mututu tulonga Bible ne bantu ku diambuluisha dia broshire wa Lumu luimpe. Muntu yeye kayi ne dîba, batu bumvuangana nende bua kuluaye kumuleja musangu udi ulonda. Patuye uya mu restoran bua kuikisha, utu wambila muntu udi musombe ku luseke luende mêyi a muomumue yeye mumane kutuadija nende ne tumiyuki tuimpe. Utuku uyisha pebe ne site wa jw.org anyi?