‘TUNGUNUKA NE KUKEBA’ BUA KUMVUA

Cameron: Jon, ndi ne disanka dia bungi bua mushindu utudi tuyukila nebe malu a mu Bible.a Patuvua bayukile nebe musangu mushale, uvua mujule lukonko bua Bukalenge bua Nzambi. Uvua muebeje bua kumanya bua tshinyi Bantemu ba Yehowa badi bitaba ne: Bukalenge bua Nzambi mbutuadije kukokesha mu 1914.

Jon: Eyowa, mvua mubale mukanda wenu mukuabu ne bavua bambamu ne: Bukalenge bua Nzambi mbutuadije kukokesha mu 1914. Bivua binkemeshe bikole bualu nutu nuamba ne: malongesha enu onso mmimanyine mu Bible.

Cameron: Bidi nanku.

Jon: Mvua mukebe mu Bible wanyi, kadi tshivua mupete mvese nansha umue uvua wakula bua 1914 to. Nunku, meme kuya kukeba tshidimu tshia 1914 mu Bible ku Enternete, tshivua anu mupete to.

Cameron: Jon, ndi nkuela tuasakidila bua malu abidi audi muenze. Tshia kumpala, udi muanji kubala Bible yonso mujima. Bidi bimueneka ne: udi munange Dîyi dia Nzambi.

Jon: Mmuomu. Kakuena tshindi munange bu Dîyi dia Nzambi.

Cameron: Bidi nanku. Tshibidi, ndi nkuela kalumbandi bua muudi ukeba Bible bua kupeta mandamuna a nkonko yebe. Uvua muenze tshidi Bible utulomba bua kuenza: ‘kutungunuka ne kukeba’ bua kumvua malu bimpe.b Mbimpe bua muudi wenza madikolela a mushindu eu.

Jon: Tuasakidila. Ndi musue kutungunuka ne kulonga. Bushuwa, mvua muenze makebulula ne mupete amue malu adi atangila tshidimu tshia 1914 mu mukanda utudi tulonga eu. Badi bakulamu bua tshilota tshia mukalenge mukuabu, tshia mutshi munene uvuabu bakose ne pashishe mulue kukola anyi malu a mushindu au.

Cameron: Aang, udi wakula bua mulayi wa buprofete udi mu Danyele nshapita 4. Udi wakula bua tshilota tshivua Nebukadenesâ Mukalenge wa Babilona mulote.

Jon: Eyowa, ntshiotshi atshi. Ndi mubale mêyi a buprofete aa misangu ne misangu. Kadi mu bulelela, tshivua anu mupete muaba udibu bakula bua Bukalenge bua Nzambi anyi bua tshidimu tshia 1914 to.

Cameron: Mu bulelela Jon, nansha muprofete Danyele kavua mumvue pende bimpe tshivuaye mufunde ku diambuluisha dia nyuma muimpe to.

Jon: Bushuwa anyi?

Cameron: Eyowa. Umvua tshidiye wamba mu Danyele 12:8: ‘Ngakumvua mêyi aa, kadi tshiakaajingulula nansha.’

Jon: Bimpe be! Tshiena nkayanyi to.

Cameron: Bulelela budi ne: Danyele kavua mujingulule to, bualu tshikondo tshia Nzambi kujinguluila bantu malu a milayi ya mu mukanda wa Danyele katshivua tshianji kukumbana. Mpindieu mu tshikondo tshietu etshi, tudi mua kumvua malu au bimpe menemene.

Jon: Bua tshinyi udi wamba nanku?

Cameron: Tangila tshidi mvese udi ulonda wamba. Danyele 12:9 udi wamba ne: ‘Mêyi aa adi masokoka ne adi mateka tshimanyishilu too ne palua tshikondo tshia ku nshikidilu.’ Nunku bavua ne bua kulua kumvua mêyi a buprofete aa pashishe, mu ‘matuku a ku nshikidilu.’ Patuayukila bualu ebu mu dilonga dietu dia Bible, neumone ne: bijadiki bionso bidi bileja ne: tudi mu matuku a ku nshikidilu.c

Jon: Kadi udiku mua kungumvuija mêyi a buprofete a mu Danyele anyi?

Cameron: Ndi mua kukumvuija.

TSHILOTA TSHIA NEBUKADENESÂ

Cameron: Bua kutuadija, ndi musue kukumvuija mu tshikoso tshivua Mukalenge Nebukadenesâ mumone mu tshilota tshiende. Pashishe, tudi mua kuakula bua tshiditshi tshiumvuija.

Jon: Mbimpe.

Cameron: Mu tshilota etshi, Nebukadenesâ wakamona mutshi munene muye too ne mu diulu. Pashishe kumvuaye mutumibue wa Nzambi utuma dîyi bua bakose mutshi au. Kadi Nzambi wakamba bua bashiye tshikuku ne miji yatshi mu buloba. Panyima pa ‘bikondo muanda mutekete’ mutshi au uvua ne bua kukola kabidi.d Mêyi a buprofete aa avua kumpala akumbanyina Mukalenge Nebukadenesâ yeye nkayende. Nansha muvua mukalenge eu munene anu bu mutshi uvua muye too ne mu diulu, bavua bamukose bua ‘bikondo muanda mutekete.’ Udi muvuluke tshivua tshienzeke anyi?

Jon: Tòo, tshiena muvuluke to.

Cameron: Kakuena bualu to. Bible udi uleja ne: Nebukadenesâ wakajimija lungenyi bua bikondo muanda mutekete. Mu tshikondo atshi, kavua mukumbane bua kukokesha bu mukalenge to. Kadi ku ndekelu kua bikondo muanda mutekete, Nebukadenesâ wakapetulula lungenyi luende kutuadijaye kukokesha kabidi.e

Jon: Ndi mukulonde bimpe. Tshilumbu tshia Bukalenge bua Nzambi ne tshidimu tshia 1914 tshidi penyi mu bualu ebu?

Cameron: Mu tshikoso, ndi nkuleja mudi mêyi a buprofete aa akumbana mu mishindu ibidi. Dikumbana dia kumpala divua dienzeke pavuabu bimanyike bukokeshi bua Mukalenge Nebukadenesâ. Dikumbana dibidi didi ditangila dimanyika dia bukokeshi bua Nzambi. Nunku, dikumbana dibidi edi ke didi dipetangana ne Bukalenge bua Nzambi.

Jon: Mmunyi muudi mumanye ne: mêyi a buprofete aa adi ne dikumbana dibidi didi ditangila Bukalenge bua Nzambi?

Cameron: Tshia kumpala, mu mulayi muine mudi bualu budi bujadika muanda eu. Bilondeshile Danyele 4:17, mêyi a buprofete avua aleja ne: ‘bua bonso badi ne muoyo bamanye ne: Mutambe Bunene wa mu diulu udi ukokesha bukalenge bua bantu, udi ubupesha muntu yonso udiye musue.’ Udiku mumvue tshiambilu tshia ne: ‘bukalenge bua bantu’ anyi?

Jon: Eyowa, tshidi tshiamba ne: ‘Mutambe Bunene wa mu diulu udi ukokesha bukalenge bua bantu.’

Cameron: Mmuomu. Udi wela meji ne: ‘Mutambe Bunene’ au nganyi?

Jon: Ndi ngela meji ne: badi bakula bua Nzambi.

Cameron: Bidi nanku. Nunku bualu ebu budi butuleja ne: mulayi eu kawena anu ukumbanyina Nebukadenesâ nkayende to. Udi utangila kabidi ‘bukalenge bua bantu’ mmumue ne: bukokeshi bua Nzambi pa bantu. Bualu ebu budi bumvuika bimpe patudi tukonkonona bimpe mulayi eu.

Jon: Udi musue kuamba tshinyi?

TSHIENA-BUALU TSHINENE TSHIA MUKANDA WA DANYELE

Cameron: Misangu ne misangu mukanda wa Danyele wa mu Bible udi wakula bua tshiena-bualu kampanda tshinene. Udi wakula bua dijadikibua dia Bukalenge bua Nzambi budi ku bukokeshi bua muanende Yezu. Tshilejilu, tuanji kukonkonona kabidi imue nshapita. Udiku mua kubala Danyele 2:44?

Jon: Eyo. Udi wamba ne: ‘Mu matuku a bakalenge aba Nzambi wa mu diulu neajadike bukalenge bukuabu budi kabuyi bubutudibua tshiendelele. Bukokeshi buabu kabuena bupianyibua kudi bantu bakuabu, kadi nebutshibule makalenge aa onso bitupa bitupa, nebuabutule, ne buobu nebujalame tshiendelele.’

Cameron: Tuasakidila. Udi wela meji ne: mvese eu udiku wakula bua Bukalenge bua Nzambi anyi?

Jon: Hmm. Tshiena anu mujadike to.

Cameron: Mona ne: udi wamba ne: Bukalenge ebu ‘nebujalame tshiendelele.’ Ke mudibi bua Bukalenge bua Nzambi, kadi kabiena mua kuenzeka nanku bua bukalenge bua bantu to, ki mmuomu?

Jon: Mmuomu.

Cameron: Mona mulayi mukuabu mu mukanda wa Danyele udi wakula bua Bukalenge bua Nzambi. Mmulayi udi mu Danyele 7:13, 14. Mulayi eu udi wakula bua mukokeshi wa matuku atshilualua wamba ne: ‘Bakamupa bukokeshi, butumbi ne bukalenge, bua bantu bonso, ba bisamba bionso ne ba miakulu yonso bamukuatshile mudimu. Bukokeshi buende budi bukokeshi bua tshiendelele, budi kabuyi mua kujimina, bukalenge buende mbukalenge budi kabuyi mua kubutudibua.’ Kudiku bualu kampanda budibu bambe mu mulayi eu buudi mumanye anyi?

Jon: Mbakulamu bua bukalenge.

Cameron: Mmuomu. Ki mbua bukalenge kayi buonso ebu to. Mona ne: mulayi eu udi wamba ne: Bukalenge ebu nebuikale ne bukokeshi pa mutu pa ‘bantu bonso, bisamba bionso ne miakulu yonso.’ Mu mêyi makuabu, Bukalenge ebu nebukokeshe buloba bujima.

Jon: Tshivua mumanye ne: diumvuija dia mvese eu ditu mushindu eu, kadi udi muambilamu. Ke tshidiye wamba.

Cameron: Tangila kabidi tshidi mulayi eu wamba: ‘Bukokeshi buende budi bukokeshi bua tshiendelele, budi kabuyi mua kujimina, bukalenge buende mbukalenge budi kabuyi mua kubutudibua.’ Kuenaku umona ne: mêyi a mu mulayi eu adi apetangana ne utudi babale mu Danyele 2:44 anyi?

Jon: Eyo, bidi nanku.

Cameron: Tuanji kukonkonona mu tshikoso malu onso atudi tufuma ku diyukila. Mulayi udi mu Danyele nshapita 4 uvua muleje ne: bantu nebamanye ne: ‘Mutambe Bunene udi ukokesha mu bukalenge bua bantu.’ Mêyi aa adi aleja patoke ne: mulayi eu udi ne dikumbana dikuabu dinene kumbusha didi ditangila Nebukadenesâ. Tuvua bamone mu mukanda wa Danyele milayi idi itangila dijadikibua dia Bukalenge bua Nzambi budi ku bukokeshi bua Muanende. Udi umona bishi, katuenaku mua kuamba ne: mulayi udi mu Danyele nshapita 4 udi wakula kabidi bua Bukalenge bua Nzambi anyi?

Jon: Bidi mua kuikala nanku. Kadi tshiena muanji kumona mudibi bipetangana ne tshidimu tshia 1914 to.

‘ASHALE NUNKU BIKONDO MUANDA MUTEKETE’

Cameron: Tuanji kupingana ku tshilumbu tshia Mukalenge Nebukadenesâ. Mu dikumbana dia kumpala dia mulayi eu bavua bamufuanyikije ne mutshi. Bavua bimanyike bukokeshi buende pavuabu bakose mutshi ne baulekele bikondo muanda mutekete, bualu ebu buvua buenzeke pavuaye mujimije lungenyi luende bua tshikondo kampanda. Bikondo muanda mutekete ebi bivua bifike ku ndekelu kuabi pavua Nebukadenesâ mupetulule lungenyi ne mutuadije kukokesha. Mu dikumbana dibidi dia mulayi eu, bavua ne bua kuimanyika bukokeshi bua Nzambi bua tshikondo kampanda, kadi ki mbua ne: Nzambi uvua muenze tshilema kampanda to.

Jon: Udi musue kuamba tshinyi?

Cameron: Mu bikondo bivuabu bafunda Bible, bavua bamba bua bakalenge ba mu Isalele bavua bakokesha mu Yelushalema ne: bavua basombe “mu nkuasa wa bukalenge wa Yehowa.”f Bavua baleji mpala ba Nzambi mu dikokesha dia bantu bende. Nunku bukokeshi bua bakalenge aba buvua bushuwa buleja bukokeshi bua Nzambi. Kadi mu kupita kua matuku, ba bungi ba ku bakalenge aba bakabenga kutumikila Nzambi ne bantu bavuabu balombola bakalonda tshilejilu tshiabu tshibi. Bua dibenga kutumikila dia bena Isalele edi, Nzambi wakanyisha bua babakuate ku bupika kudi bena Babilona mu 607 K.B.B. Katshia ku tshikondo atshi, mukalenge nansha umue kavua uleja mpala wa Yehowa mu Yelushalema to. Mu mushindu eu, ke muvuabu bimanyike bukokeshi bua Nzambi. Udiku mumvue malu aa?

Jon: Eyowa.

Cameron: Nunku 607 K.B.B. tshivua tshileja ntuadijilu wa bidimu muanda mutekete anyi tshikondo tshivuabu ne bua kuimanyika bukokeshi bua Nzambi. Ku ndekelu kua bikondo muanda mutekete, Nzambi uvua ne bua kuteka mukokeshi mupiamupia bua kuleja mpala Wende, mukokeshi eu uvua ne bua kuikala mu diulu. Tshikondo atshi ke tshivua milayi mikuabu itudi babale mu Danyele ne bua kukumbana. Nunku lukonko elu ludi lujuka: Ndîba kayi divua bikondo muanda mutekete bifike ku ndekelu? Tuetu bandamune lukonko elu, netumanye dîba divua Bukalenge bua Nzambi butuadije kukokesha.

Jon: Ndi mumvue. Nganji kuteta, bikondo muanda mutekete mbijike mu 1914.

Cameron: Menemene! Udi mumvue bimpe.

Jon: Kadi ntshinyi tshidi tshitujadikila bualu ebu?

Cameron: Bimpe, pavua Yezu wenza mudimu wende wa diyisha pa buloba, wakaleja ne: bikondo muanda mutekete ebi kabivua bianji kufika ku ndekelu kuabi to.g Nunku, bivua ne bua kunenga bikole. Bikondo muanda mutekete ebi biakatuadija bidimu nkama kumpala kua Yezu kulua pa buloba ne bivua bitungunuke too ne mu tshikondo kampanda yeye mumane kupingana mu diulu. Vuluka kabidi ne: diumvuija dia milayi idi mu Danyele divua mua kumvuika bimpe anu mu ‘matuku a ku nshikidilu.’h Bualu bua dikema, ku ndekelu kua bidimu bia 1800, balongi ba Bible ba tshisumi bavua batuadije kukonkonona bimpe bimpe bualu ebu ne milayi mikuabu. Bakatuadija kujingulula ne: bikondo muanda mutekete ebi bivua ne bua kujika mu 1914. Malu a bungi avua menzeke pa buloba mu tshikondo atshi akajadika ne: Bukalenge bua Nzambi buakatuadija bushuwa kukokesha mu diulu mu 1914. Tshivua tshidimu tshivua bulongolodi ebu bubuele mu matuku abu a ndekelu anyi a ku nshikidilu. Ndi mumanye ne: malu aa adi akuelesha meji bikole . . .

Jon: Eyowa. Ndi ne bua kuya kubala kabidi malu aa bua kuumvua bimpe.

Cameron: Kuditatshishi bikole to. Nansha meme bivua bingangate matuku bua kumvua mulayi eu bimpe ne dikumbana diawu. Kadi ndi ngela meji ne: diyukidilangana dietu ndikuambuluishe bua umona ne: malongesha a Bantemu ba Yehowa adi atangila Bukalenge bua Nzambi, mmangatshila mu Bible.

Jon: Mu bulelela, bitu anu binkemesha bua mushindu unutu nuenza mudimu ne Bible bua kumvuija malu anudi nuitabuja.

Cameron: Ndi mumone ne: udi pebe ne dijinga dia muomumue. Anu mumvua muambe, malu aa adi mua kukueleshisha meji bualu nga bungi. Pamuapa utshidi anu ne nkonko ya kuela. Tshilejilu, tudi bamone ne: bikondo muanda mutekete bidi bitangila Bukalenge bua Nzambi ne bivua bituadije mu 607 K.B.B. Kadi, mmunyi mutudi bafike ku dimanya ne: bikondo muanda mutekete ebi bivua bifike ku ndekelu kuabi mu 1914?i

Jon: Ke lukonko lumvua musue kukuela alu.

Cameron: Bible nkayende udi utuambuluisha bua kumanya bimpe bule bua bikondo muanda mutekete. Udi musue tulua kuyukila bualu ebu musangu udi ulonda anyi?j

Jon: Bimpe.

DIAMBULULA MU TSHIKOSO TSHILOTA TSHIA NEBUKADENESÂ

Cameron: Ndi ne disanka dia kumonangana kabidi nebe, Jon. Ntu nganyisha bikole programe wetu wa dilonga dia Bible wa lumingu luonso.a Bishi katshia washale?

Jon: Ndi bimpe.

Cameron: Ndi ne disanka bua muudi bimpe. Musangu mushale pamvua muaba eu, tuvua bayukile bua kumanya bua tshinyi Bantemu ba Yehowa badi bamba ne: Bukalenge bua Nzambi mbutuadije kukokesha mu 1914.b Anu bu mutuvua bayukile, tuvua bapete tshijadiki tshinene mu mulayi udi mu Danyele nshapita 4 mu Bible. Utshidi muvuluke tshivuabu bakulamu anyi?

Jon: Bavua bakula bua tshilota tshia mutshi munene tshivua mukalenge Nebukadenesâ mulote.

Cameron: Anu muudi muambe amu. Mu tshilota etshi, Nebukadenesâ uvua mumone mutshi munene uvua muye too ne mu diulu. Yeye kumvua mutumibue wa Nzambi utuma dîyi bua bakose mutshi, kadi bashiye tshikuku ne miji yatshi mu buloba. Panyima pa ‘bikondo muanda mutekete’ mutshi au uvua ne bua kukola kabidi.c Tuvua kabidi bayukile bua muvua mulayi eu mua kukumbana misangu ibidi. Utshidi muvuluke dikumbana diawu dia kumpala anyi?

Jon: Mbualu buvua bukumbanyine Nebukadenesâ yeye nkayende, ki mmuomu anyi? Uvua mujimije lungenyi munkatshi mua bidimu muanda mutekete.

Cameron: Mmuomu. Nebukadenesâ uvua mujimije lungenyi bua tshikondo kampanda, nunku bavua bimanyike bukokeshi buende. Kadi mu dikumbana diawu dinene, bukokeshi bua Nzambi buvua buimane mu mushindu kampanda bua lupolo lua bikondo muanda mutekete. Anu bu mutuvua bamone, bikondo muanda mutekete bivua bituadije pavuabu babutule Yelushalema mu 607 K.B.B. Mu tshikondo atshi, kakuvua mukalenge nansha umue pa buloba uvua uleja mpala wa Yehowa Nzambi mu dikokesha bantu bende. Kadi ku ndekelu kua bikondo muanda mutekete, Nzambi uvua ne bua kuteka Mukokeshi mupiamupia wa mu diulu pa bantu bende. Mu mêyi makuabu, ndekelu wa bikondo muanda mutekete uvua ne bua kuleja ntuadijilu wa bukokeshi bua Bukalenge bua Nzambi mu diulu. Tukavua bayukile dîba divua bikondo muanda mutekete bituadije. Nunku tuetu bamanye bule buvua bikondo ebi mua kunenga, netumanye dîba divua Bukalenge bua Nzambi butuadije kukokesha. Udi munteleje anyi?

Jon: Eyowa, diambulula edi ndingambuluishe bua kuvuluka malu aa.

Cameron: Bimpe. Mpindieu tukonkonone bule bua bikondo ebi muanda mutekete. Nkadi mujikije dibala dia tshiena-bualu etshi bua kuvuluka malu manene adimu. Nengenze muanyi muonso bua kukumvuija malu aa anu mudibi bikengela.

Jon: Bimpe.

BIKONDO MUANDA MUTEKETE BIJIKA: MATUKU A KU NSHIKIDILU ATUADIJA

Cameron: Mu dikumbana dia kumpala dia mulayi udi utangila Nebukadenesâ, bikondo muanda mutekete bivua bidimu muanda mutekete bietu biena dîna ebi. Kadi mu dikumbana diawu dinene didi ditangila Bukalenge bua Nzambi, bikondo muanda mutekete bidi ne bua kunenga bikole kupita bidimu muanda mutekete biena dîna.

Jon: Bua tshinyi udi wamba nanku?

Cameron: Vuluka ne: bikondo muanda mutekete bivua bituadije pavuabu babutule Yelushalema mu 607 K.B.B. Tuetu batuadije kubala kumbukila ku tshidimu etshi, bidimu muanda mutekete biena dîna ebi bidi mua kutufikisha mu 600 K.B.B. Kadi kakuvua bualu nansha bumue buvua buenzeke mu tshikondo atshi buvua butangila tshidimu tshia bukokeshi bua Nzambi. Bualu bukuabu, anu bu mutuvua bamone musangu mukuabu, bidimu bia bungi kumpala patshivua Yezu pa buloba, wakaleja ne: bikondo muanda mutekete kabivua bianji kufika ku ndekelu to.

Jon: Eyowa, ngavuluki mpindieu.

Cameron: Nunku, pamutu pa bikondo ebi muanda mutekete kuikalabi biena dîna, bidi biangata lupolo lule lua tshikondo kampanda.

Jon: Bule kayi?

Cameron: Mukanda wa Buakabuluibua wa mu Bible udi upetangana bikole ne mukanda wa Danyele, udi utuambuluisha bua kumanya lupolo lujalame lua bikondo muanda mutekete. Udi uleja lupolo lua bikondo bisatu ne tshitupa bu lupolo lua matuku 1 260.d Nunku, bikondo muanda mutekete mmumue ne: bikondo bisatu ne tshitupa misangu ibidi bidi bienza matuku 2 520. Udi undonda bimpe anyi?

Jon: Eyowa, ndi nkulonda. Kadi tshiena mumone mudi bualu ebu buleja ne: Bukalenge bua Nzambi mbutuadije kukokesha mu 1914 to.

Cameron: Bimpe, tuanji kumona mudi malu aa umvuangana. Imue misangu mu milayi ya mu Bible, dituku dimue didi dileja tshidimu tshijima.e Tuetu balonde dîyi dia ne: dituku dimue didi bu tshidimu tshijima, bikondo muanda mutekete nebikale bidimu 2 520. Tuetu batuadije kubala bidimu 2 520 ebi kubangila mu tshidimu tshia 607 K.B.B., bidi bitufikisha mu tshidimu tshia 1914.f Ke mutudi tufika mu tshidimu tshia 1914 tshivua bikondo muanda mutekete bifike ku ndekelu, ne Yezu kutuadija kukokesha bu Mukalenge wa Bukalenge bua Nzambi. Mu mushindu wa pa buawu, katshia mu tshidimu tshia 1914, malu manene avua menzeke pa buloba, malu akavua Bible mumanyishe ne: avua ne bua kuenzeka mu matuku a ku nshikidilu.

Jon: Mmalu a mushindu kayi?

Cameron: Tukonkonone tshivua Yezu muambe tshidi mu Matayi 24:7. Pa bidi bitangila tshikondo tshivuaye ne bua kutuadija kukokesha mu diulu, Yezu wakamba ne: “Tshisamba netshiluishe tshisamba tshikuabu, bukalenge nebuluishe bukalenge bukuabu, nekuikale biyole bia nzala, bikumina nebienzeke bilondangane ku muaba ne ku muaba.” Mona ne: Yezu uvua mudianjile kumanyisha bua biyole bia nzala ne bua bikumina mu tshikondo atshi. Buloba buetu ebu bukadi butuilangane ne malu a bungi a mushindu eu mu bikondo bia kale, ki mmuomu anyi?

Jon: Mmuomu.

Cameron: Mu mvese eu, Yezu uvua kabidi mumanyishe bua mvita ivua ne bua kuenzeka mu tshikondo tshidiye Mukalenge wa Bukalenge bua Nzambi. Mukanda wa Buakabuluibua kauvua muakule bua mvita ivua mua kuenzeka muaba umue kadi bua mvita ivua ne bua kuenzeka pa buloba bujima mu matuku a ku nshikidilu.g Udiku mumanye dîba divua mvita ya kumpala ya buloba bujima mienzeke anyi?

Jon: Ivua mienzeke mu tshidimu tshia 1914, tshidimu tshiudi muleje ne: ke tshidi Yezu mutuadije kukokesha! Tshivua mumanye ne: bidi bipetangana mushindu eu to.

Cameron: Patudi tusangisha ngenyi yonso eyi mmumue ne: mulayi udi wakula bua bikondo muanda mutekete pamue ne milayi mikuabu ya mu Bible idi yakula bua matuku a ku nshikidilu, bidi biumvuika bimpe menemene. Bantemu ba Yehowa mbatuishibue ne: Yezu uvua mutuadije kukokesha bu Mukalenge wa Bukalenge bua Nzambi mu tshidimu tshia 1914, ne matuku a ku nshikidilu avua matuadije mu tshidimu atshi.h

Jon: Ndi nditatshisha bua kumvua malu onso aa.

Cameron: Bidi biumvuika bimpe menemene. Anu bu mumvua mudianjile kukuleja, bivua bingangate panyi matuku a bungi bua kumvua bimpe bualu ebu. Kadi ndi mutekemene ne: muyuki wetu mmukuambuluishe bua kumona ne: nansha mudi Bible kayi utela tshidimu tshia 1914, malu adi Bantemu ba Yehowa bitabuja pa bidi bitangila tshidimu etshi mmimanyine mu Bible.

Jon: Eyowa, ndi ne disanka dia bungi bualu bualu buonso buudi wamba, udi ubujadika ne Bible. Bimueneka ne: ki ngenyi yebe to. Ndi mumone bua tshinyi bualu ebu buvua bukole bua kubumvua. Bua tshinyi Nzambi kavua mua kutuambila diakamue mu Bible ne: Yezu uvua ne bua kutuadija kukokesha mu diulu mu tshidimu tshia 1914?

Cameron: Ndukonko luimpe lutambe, Jon. Mu bulelela, kudi malu a bungi adi Bible kayi mumvuije patoke. Nunku bua tshinyi Nzambi uvua mufundishe Bible mu mushindu wa ne: bantu bikala badienzeja bua kumumvua bimpe? Pamuapa tudi mua kuyukila bualu ebu musangu udi ulonda.

Jon: Tuetu benze nanku mbimpe.