Kalasa ka Mudimu wa Nzambi bua 2015 kadi katuambuluisha bua kulengeja ndongeshilu wetu
1 Mufundi wa misambu Davidi wakamba ne: ‘Mêyi a mukana muanyi ne meji andi ngela mu mutshima wanyi ikale mitabujibue ku mêsu kuebe, Yehowa, dibue dianyi ne mupikudi wanyi.’ (Mus. 19:14) Tudi petu basue bua mêyi etu asankishe Yehowa bualu tudi banange bikole diakalenga ditudi nadi dia kuakula bua bulelela mu tshisumbu ne mu buambi. Kalasa ka Mudimu wa Nzambi ngumue wa ku mishindu idi Yehowa utulongesha bua kuyisha. Kalasa aka kadi kenzeka lumingu luonso mu bisumbu bipite pa 111 000 pa buloba bujima. Nkambuluishe bana betu ba pa buloba bujima ba mu bisamba bionso bua kuluabu bakumbane bimpe menemene bua kuikala bamanyishi ba lumu luimpe, bamanye mua kulongesha bantu ne bulenga ne dikima ne babitabijija.—Bien. 19:8; Kolos. 4:6.
2 Programe wa Kalasa ka Mudimu wa Nzambi bua 2015 neikale ne biena-bualu biangatshila mu broshire wa Longa malu adi mu Dîyi dia Nzambi, mu Étude perspicace des Écritures ne mu Tshibumba tshia Nsentedi. Mbakajilule kabidi malu bua bungi bua minite ivuabu bakosele Malu manene ne Mudimu No. 1. Mbumvuije malu adibu bashintulule aa pamue ne malu a kulonda bua mushindu wa kuenza midimu ya mu kalasa aka mu bikoso bidi bilonda ebi.
3 Malu manene a mu dibala dia Bible: Bana betu badibu bapesha mudimu eu, badi ne bua kuwenza mu minite ibidi bua kuakulabu bua bualu bumue bua mushinga bua mu dibala dia Bible dia lumingu alu. Didilongolola diabu dimpe nedibambuluishe bua kuambila tshisumbu bualu budi ne mushinga mu minite idibu babakosele. Pashishe, badi ne bua kuikala bashiya minite isambombo bua bateleji kuakulabu pabu mu sekonde 30 anyi mikese bua malu adi mabasankishe mu dibala dia Bible dia lumingu alu. Bidi bikengela kudilongolola ne kuditatshisha bua kuamba malu adi ne mushinga mu sekonde 30, kuenza nanku kudi kutuambuluisha tuetu bine. Bidi biambuluisha kabidi bakuabu bua kupetabu dîba dia kuakula pabu bua malongesha avuabu bapete pavuabu benze makebulula.
4 Mudimu No. 1: Dibala dia Bible edi ndia kuenza mu minite isatu anyi mikese ne kadiakuikala ne malu a bungi to. Muanetu udibu bapesha mudimu eu udi ne bua kubalulula misangu ya bungi, ubala ne dîyi dikole ne utabalela bua kushindumuna miaku bimpe, ubala anu bu mutu bantu bakula matuku onso bua ngenyi idi mu bidiye ubala yumvuike bimpe. Bantu ba Yehowa bonso badi ne bua kudienzeja bua kubala bimpe bualu kubala kudi ne mushinga wa bungi mu ntendelelu wetu. Tutu tumvua disanka dia bungi patudi tumona bana betu balela babala bimpe. Tudi tuela baledi kalumbandi bua mudibu baditatshisha ne dinanga dionso bua kuambuluisha bana babu bua kuluabu babadi bimpe.
5 Mudimu No. 2: Nebawupeshe muanetu wa bakaji bua kuwenza mu minite itanu. Mulongi neangate anu tshiena-bualu tshiamupeshabu atshi. Tshiena-bualu atshi tshiotshi tshiangatshila mu broshire wa Longa malu adi mu Dîyi dia Nzambi, mbimpe atshienze mu mushindu kampanda wa diyisha anu mutu malu enzeka menemene mu buambi mu teritware wenu. Mudimu eu wowu wakula bua muntu kampanda wa mu Bible, muangatshila mu mukanda wa Étude perspicace, mulongi udi ne bua kukonkonona malu adi muinshi mua dîna dia muntu au, kusungula mvese miakanyine ya kubala ne kuleja mudi tshilejilu tshia muntu wa mu Bible au tshitulongesha. Udi mua kubuejamu kabidi mvese idi yumvuangana ne tshiena-bualu tshiende. Mutangidi wa kalasa neamusunguile mumuyukidishi.
6 Mudimu No. 3: Mudimu eu nebawupeshe muanetu wa balume anyi wa bakaji bua kuwenzaye mu minite itanu. Padibu bawupesha muanetu wa bakaji, neawenze anu mudibu bambe bua Mudimu No. 2. Padibu bawupesha muanetu wa balume, malu a mudimu eu wowu mangatshila mu mukanda wa Étude perspicace des Écritures, neawenze bu muyuki muenzela bateleji. Mulongi udi ne bua kumvuija tshiena-bualu atshi, kusungula mvese miakanyine ya kubala ne kuleja mudi tshilejilu tshia muntu wa mu Bible au tshitulongesha.
7 Bualu bupiabupia budi butangila mudimu No. 3 bua bana betu ba balume: Malu a mudimu eu wowu mangatshila mu broshire wa Longa malu adi mu Dîyi dia Nzambi, badi ne bua kuwenza bu dinaya dia bantu benza ntendelelu wa mu dîku anyi bu dia muntu uyisha. Misangu ya bungi mutangidi wa kalasa ke wikala ne bua kusunguila mulongi kadre ne muntu udibu ne bua kuenza nende mudimu. Muntu wenzaye nende dinaya udi ne bua kuikala muena mu dîku diabu anyi muanetu kampanda wa mu tshisumbu. Udi mua kubuejamu kabidi mvese idi ileja mêyi manene a mu Bible idi yumvuangana ne tshiena-bualu tshiende. Ku musangu ne ku mukuabu, badi mua kupesha mukulu mudimu eu bua kuwenzaye. Bakulu badi mua kudisunguila kadre ne muntu udibu ne bua kuwenza nende. Kakuyi mpata, kuenza nunku nekukankamije bena mu tshisumbu padibu bamona mudi bakulu baleja mushindu wa dimanya kulongesha padibu benza dinaya ne muena mu dîku diabu anyi ne muanetu mukuabu wa mu tshisumbu.
Itaba mibelu, uyitumikile bua uye kumpala
8 Mibelu: Padi mulongi yonso ujikija mudimu wende, mutangidi wa kalasa udi ne bua kumuela kalumbandi mu minite ibidi ne kumupesha mibelu idi ileja malu mimpe adiye muenze bilondeshile mukanda wa Kalasa ka Mudimu wa Nzambi kadi kakuambuluisha. Padi mutangidi wa kalasa ubikila mulongi bua kulua kuenza mudimu, kena ne bua kudianjila kumanyisha dilongesha dikalaye ne bua kuenzela mudimu wende to. Kadi padi mulongi ujikija mudimu wende, mutangidi wa kalasa udi ne bua kumuela kalumbandi ne muoyo mujima, umanyisha dilongesha divua mulongi wenda utumikila mu mudimu wende, pashishe aleje malu adi atusaka bua kuamba ne: mulongi mmukumbaje dilonga edi bimpe, aleje kabidi ne bulenga buonso bua tshinyi mbimpe bua mulongi atambe kutabalela dilonga adi bikole.
9 Dibeji dia mibelu dia mulongi didi mu mukanda wende wa Kalasa ka Mudimu mu dibeji dia 79 too ne dia 81. Padi mulongi ujikija kuenza mudimu wende, mutangidi wa kalasa neenze tumanyinu tuakanyine miaba idibu baleje mu mukanda wa mulongi ne neamuebeje pa nkayende bua kumanya ni uvua muenze mudimu wa kuenza udi mu dilongesha divuabu bamupeshe. Panyima pa bisangilu anyi tshikondo tshikuabu, mutangidi wa kalasa udi mua kuela kabidi mulongi kalumbandi ne kumupesha mibelu mikuabu idi mua kumuambuluisha. Kutabalela mulongi yonso mu kalasa aka, kudi ne bua kuikala mpunga wa kumuambuluisha bua kuya kumpala mu malu a Nzambi.—1 Tim. 4:15.
10 Padi mulongi upitshisha dîba, mutangidi wa kalasa anyi muanetu mukuabu udibu basungule udi ne bua kumuenza jeste, bu mudi kuela ka ngonga anyi kututa mu bianza anyi pa mêsa, bua kuleja ne bukalanga buonso ne: dîba dia mulongi ndijike. Padiye umvua nanku, amanye ne: dîba diende ndijike, ajikije tshiambilu tshidi mukana ne umbuke ku tshiakuidi.—Bala mukanda wa Kalasa ka mudimu, dib. 282, tshik. 4.
11 Tudi tulomba bana betu bonso badi bakumbaja ngikadilu milomba bua kudifundisha mu Kalasa ka Mudimu wa Nzambi. (Bala Mukanda wa Kalasa ka mudimu, dib. 282, tshik. 6.) Malu adi kalasa aka katulongesha adi ambuluisha bantu ba Yehowa bua kulongesha ne kuyisha lumu luimpe lua Bukalenge ne dishindika ne bunême ne dinanga. Kakuyi mpata, Yehowa udi usanka bikole bua mudi bantu bonso badi kalasa aka kambuluisha bamutumbisha.—Mus. 148:12, 13; Yesh. 50:4.