Uyishe ne site wetu wa Enternete: “Nkonko ya malu a mu Bible”

Tshitupa tshia “Malongesha a mu Bible” tshidi mu site wetu wa jw.org tshidi ne tshiena-bualu tshia ne: “Mandamuna a nkonko ya mu Bible.” Tuetu ne tshibidilu tshia kubala nkonko ikadibu bandamunamu, bidi mua kutuambuluisha bua kuandamuna nkonko ya malu a mu Bible ku diambuluisha dia site wetu. Tudi mua kuenza mudimu ne nkonko eyi bua kutuadija muyuki ne bantu patudi tuyisha. Tudi mua kusungula lukonko ludi lusankisha bantu ba mu teritware wetu, kuebeja muntu mmuenenu wende, kumuleja tshidi Bible wamba, tuenza mudimu ne ngenyi idi mu jw.org. Pashishe, tudi mua kumuambila anyi kumuleja muaba utudi bapetele diandamuna. Anyi tudi mua kulomba muntu bua abale musangu umue diandamuna mu site wetu. Mukaji wa mutangidi wa tshijengu kampanda uvua mupatule bipeta bimpe pavuaye wambila bantu ne: “Bantu ba bungi batu badiebeja ne: ‘Nzambi ke utu ukebesha makenga anyi?’ Udi musue kumanya diandamuna dia lukonko elu mu sekonde 51 tshianana anyi?” Pashishe utu umuelela mêyi makuata a diandamuna avuaye muambule mu site wetu, muele mu telefone wende. Bua kujikija, utu umuleja nshapita wa 11 mu mukanda wa Bible ulongesha bua kutuadija kulonga nende.