Enza bua Tshivulukilu etshi tshikale tshikondo tshia disanka
1. Mmushindu kayi utudi mua kuvudija disanka dietu mu tshikondo tshia Tshivulukilu?
1 Udiku musue kuvudija disanka diebe mu ngondo 3, 4 ne 5 anyi? Umue mushindu wa kukumbaja bualu ebu, nkuenza bia bungi mu mudimu wa buambi ne koku mushindu kuangata bumpanda-njila buambuluishi. Mmunyi mudi kuenza nunku mua kuvudija disanka diebe?
2. Bua tshinyi kuvudija mudimu wetu wa buambi nekutupeteshe disanka dia bungi?
2 Vudija disanka diebe: Yehowa mutufuke bua tuikala ne disanka ne tuikala tudiumvua bimpe patudi tumutendelela ne tukumbaja dijinga ditudi nadi dia mu nyuma dia ku tshilelelu. (Mat. 5:3) Mmutufuke kabidi bua tupete disanka bua mutudi tupesha bakuabu bintu. (Bien. 20:35) Mudimu wa buambi udi utuambuluisha bua kuenza malu abidi aa: kutendelela Nzambi ne kuambuluisha bantu. Mu bulelela, kuvudija mudimu wetu kudi kutupetesha disanka dia bungi. Bualu bukuabu, tuetu tuyisha bikole netupete dimanya dia bungi. Patudi tupeta dimanya edi, tudi tupeta dikima ne katuyi tulubakana. Netupete mpunga ya bungi ya kuyisha bantu ne kutuadija kulonga nabu Bible. Bionso ebi bidi bivuija mudimu wetu wa buambi mudimu wa disanka dia bungi.
3. Bua tshinyi ngondo 3 ne 4 neyikale ngondo ya pa buayi bua kueza mudimu wa bumpanda-njila buambuluishi?
3 Ngondo 3 ne 4 neyikale ngondo ya pa buayi bua kuenza mudimu wa bumpanda-njila buambuluishi, bualu tudi mua kusungula bua kuenza mêba 30 anyi 50. Bualu bukuabu, kutuadijila mu Disambombo dia 22 ngondo 3 too ne ku Tshivulukilu tshituenza mu Dimue dia 14 ngondo 4, netuenze mudimu muimpe wa dibikila bantu bua kuluabu mu Tshivulukilu. Bena mu tshisumbu nebikale ne disanka dia bungi bua mudi ba bungi badifila mu mudimu ne ‘diapa dionso muinshi mua bujitu’ bua kujikija teritware wabu yonso mujima mu bule bua tshikondo tshikosa.—Sef. 3:9.
4. Tuetu basue kuangata bumpanda-njila buambuluishi, tshitudi ne bua kuenza ntshinyi?
4 Nudilongolole ku mpindieu: Biwikale kuena muanji kudilongolola, dikebela dîba dia kutangilula programe webe ne kumona malu audi mua kuakaja bua wewe kuvudija mudimu webe wa buambi mu ngondo umue anyi ya bungi. Usambile bua bualu abu. (Yak. 1:5) Uyukile ne bena mu dîku diebe anyi dienu nansha ne bena mu tshisumbu kabidi. (Nsu. 15:22) Neumone ne: nansha muudi mua kuikala ne lutatu bua disama anyi muikale ne midimu ya bungi, udi pebe mua kupeta disanka didi difumina ku dienza mudimu wa bumpanda-njila buambuluishi.
5. Tuetu bavudije mudimu wetu wa buambi mu tshikondo tshia Tshivulukilu etshi, netupete tshinyi?
5 Yehowa mmusue bua batendeledi bende bikale ne disanka. (Mus. 32:11) Patudi tudienzeja bua kuvudija mudimu wetu wa buambi mu tshikondo tshia Tshivulukilu etshi, tudi tupeta disanka dia bungi ne tudi tusankisha kabidi Tatu wetu wa mu diulu.—Nsu. 23:24; 27:11.