Didienzeja bua kulenga mitshima ya bateleji

PA KUMUSHA diyisha diudi uyisha bantu, udi ne bua kudienzeja bua kulenga mitshima yabu. Misangu ya bungi mu Bible, batu bakula bua muoyo anyi mutshima bu tshintu tshitu tshibengangana ne tshidi muntu umueneka ku mpala wende. Mutshima wa mu tshimfuanyi ke tshidi muntu munda: mudiye udiumvua munda, malu onso adiye wela meji, tshidiye welela meji ku malu au, ne mudi meji au amufikisha ku dienza malu kampanda. Mu mutshima wa mu tshimfuanyi eu ke mutubu bakuna katete ka dimiinu dia bulelela. (Mat. 13:19) Ditumikila Nzambi didi ne tshia kufumina mu mutshima.​—Nsu. 3:1; Lomo 6:17.

Nenku, bua biudi ulongesha kubuelabi mu mutshima wa muntu, wimanyine pa malu asatu aa: (1) Jingulula tshikadi tshilenge muoyo wa muntu. (2) Kolesha ngikadilu miakane bu mudi: dinanga ne ditshina Nzambi. (3) Lomba muntu bua akonkonone bidi munda muende bua yeye kusankisha Yehowa bikole menemene.

Manya mua kusunguluja mianda. Nsombelu idi mifikishe bantu ku dibenga kuitaba bulelela mmishilangane. Paudi ulonga Bible ne muntu, udi mua kujikijija meji mabi adi bantu batuelela ne kufila bijadiki bidi biumusha ngenyi mibi idiye nayi, anyi udi mua kujinga bua kufila patupu anu binga bijadiki. Udiebeje ne: ‘Mulongi eu mmumanyeku ne: bu mudiye muntu, udi ne majinga a malu a mu nyuma anyi? Mmalu kayi atuye witabuja? Mmalu kayi atuye kayi witabuja? Mmufike ku ditaba anyi dibenga malu aa bua tshinyi? Bidi bikengela kumuambuluisha bua kuitaba bua kuenza malu awalua bulelela kumulomba anyi?’

Kabitu anu bipepele bua kumanya tshidi bantu bitabila malu adibu bitaba aa to. Nsumuinu 20:5 udi wamba ne: ‘Meji adi muntu upangadija mu mutshima adi bu mâyi male, kadi mujinguludi wa mianda neaapatule.’ Dijingulula edi didi diambuluisha bua kumvua mianda idi kayiyi imueneka ne lukasa patoke. Didi dilomba kutangila bantu ne bintu ne lubatshi bimpe bimpe, ne kuikala ne dijinga dia kuambuluisha bakuabu.

Katutu tuyikila amu ne mukana to. Tshiena-bualu kampanda tshidi mua kushintulula dîyi anyi tshilunji tshia mpala wa muntu. Wewe muikale muledi, udi mumanye kakuyi mpata ne: padi bikadilu bia muana bishintuluka, bidi biumvuija ne: kudi tshintu tshipiatshipia kampanda tshidi tshienze ne: ashintuluke. Kupu bimanyinu ebi muoyo nansha. Bidi bileja tshidiye munda.

Nkonko misungula bimpe idi mua kukuambuluisha bua kumanya tshidi mu mutshima wa muntu. Udi mua kumuebeja ne: “Udi wela meji kayi bua . . . ?” “Ntshinganyi tshidi tshikuitabijija ne: . . . ?” “Newenze tshinyi bikala . . . ?” Kadi kulokeshi nkonko bu mvula nansha. Udi mua kutuadija nkonko ne budimu buonso ne: “Neumvue munyi bingakuebeja ne: . . . ?” Bua kumanya tshidi munda mua muntu mbikole be! Ke bualu kayi ki mbimpe kuya lubilu lubilu to. Misangu ya bungi bitu bikengela tshikondo kampanda kuanjitshi kupita kumpala kua muntu kutuadijaye kuitaba bua kukuambila malu a munda muende menemene. Kadi nansha nanku, bidi bikengela kuikala ne budimu bua muntu kamonyi bu ne: udi ukeba kubuelakana mu malu adi amutangila amu yeye nkayende to.​—1 Pet. 4:15.

Ikala ne busunguluji mu ditaba anyi dibenga bidibu bakuambila. Wavuluka ne: tshiudi ukeba, nkuteleja bantu bua kumanya malu a mu Bible audi mua kubakuatshisha nawu. Umushe ne lukasa lungenyi luonso lua kujinga bua kuleja muntu patoke bubi bua malu adiye wamba. Pamutu pa kuenza nanku, ikala ukeba tshidi tshisokome mu miaku yende ya mukana. Nenku neumanye mpindieu tshia kuenza. Padi mulongi umona ne: udi mumumvue bimpe, bumue neelangane meji a biudi umuambila.​—Nsu. 16:23.

Mu mushindu kampanda, udi mua kufika ku disaka muntu ku muntu ku dienza malu kampanda nansha wewe wakula kumpala kua bantu tshisumbu. Wewe utangila bantu, umona mudi mpala yabu yamba malu, ne wela nkonko ya bungambi, itubu bela kadi kabayi bindila diandamuna, bayela anu bua kuelesha bantu meji patupu, neumanye bumue tshidi bateleji bumvua bua biudi wamba. Biwikala mumanye bateleji bebe bimpe, kupu muoyo nsombelu yabu to. Paudi welangana meji ne bantu pa Dîyi dia Nzambi, ikala mumanye mutu bena tshisumbu pa tshibidilu.​—Gal. 6:18.

Kujula dinanga dia malu mimpe. Paudi umanya ndambu tshidi muntu witabila anyi kayi witabila malu kampanda, neupete mpindieu mushindu wa kuibakilapu. Tshilejilu, panyima pa dibika ku lufu, Yezu wakalenga mitshima ya bayidi bende ‘pakabajinguluilaye Mukanda wa Nzambi’ bilondeshile malu avua atshifuma ku dienzeka matuku au. (Luka 24:32) Wewe pebe udienzeje bua kupeta diumvuangana pankatshi pa malu adi muntu mumone, adiye uzukila, ne adiye umona mu Dîyi dia Nzambi. Mutshima wende neulengibue bimpe padiambilaye nkayende ne muoyo wonso ne: “Etshi ke BULELELA!”

Bantu baudi ulongesha nebakoleshe dinanga diabu dia Nzambi wewe muikale wimanyina pa buimpe, dinanga, bulenga budi kabuyi butuakanyine, ne pa buakane bua njila ya Yehowa. Bantu nebakebe bua kudia bulunda ne Nzambi biwangata dîba dia kubaleja ne: Nzambi udi umona ngikadilu milenga idibu nayi. Udi mua kuenza nunku pa kubala mvese bu mudi: Musambu 139:1-3, Luka 21:1-4, ne Yone 6:44 ne pa kubafikisha ku dimona bimpe mudi Yehowa munange bikole bia menemene basadidi bende ba lulamatu. (Lomo 8:38, 39) Umumvuije ne: Yehowa kêna umona anu mibi yetu nkayayi to, udi umona nsombelu wetu mujima: tshisumi tshietu bua ntendelelu mulelela, ne mutudi banange dîna diende. (2 Kul. 19:2, 3; Eb. 6:10) Nzambi udi uvuluka too ne tualu tua tukese tukese tudi tutangila mubidi wetu, ne neapingaje “bonso badi mu nkita ya tshivulukilu” ne muoyo mu mushindu wa dikema. (Yone 5:28, 29, NW; Luka 12:6, 7) Bu mudi bantu benza ku tshimfuanyi ne tshifuanyikiji tshia Nzambi, kuyikila nabu pa ngikadilu yende nekubalenge ku muoyo bikole.​—Gen. 1:27.

Mutshima wa muntu udi mua kulengibua biamulongeshabu mua kuikala umona bakuende anu bu mutu Yehowa ubamona. Bidi biumvuija ne: pikala Nzambi wetu mutusue, utu kabidi musue bakuetu bakuabu pabu, kayi utangila kudibu bafume, tshisamba tshiabu, anyi dikoba diabu. (Bien. 10:34, 35) Padi muntu ujingulula malu aa, neapete bishimikidi bikole bia mu Mifundu Minsantu bua kumbusha lukinu ne meji mabi adiye welela bakuabu mu mutshima wende. Nebimuambuluishe bua kuikala bimpe ne bakuende padiye eku wenda ulonga mua kuenza disua dia Nzambi.

Ambuluisha muntu kabidi bua kuikala utshina Nzambi mudibi bikengela. (Mus. 111:10; Buak. 14:6, 7) Kanemu kakole anyi ditshina Nzambi dia nunku didi disaka muntu bua kuenza malu avuaye kayi mua kukumbaja ku bukole buende yeye nkayende to. Kuakula pa malu a kukema a Yehowa ne bulenga buende budi kabuyi butuakanyine, kudi kufikisha muntu bua kutshina Nzambi bu mudibi.​—Mus. 66:5; Yel. 32:40.

Enza bua bantu bamanye ne: ngikadilu wabu udi ne bualu ku mêsu kua Yehowa. Utu umvua bibi anyi bimpe patudi tulonda anyi katuyi tulonda tshidiye utuambila. (Mus. 78:40-42) Leja bantu bua tshinyi nsombelu wabu nkayende udi mua kuandamuna ku tshilumbu tshidi Satana mujudile Nzambi.​—Nsu. 27:11.

Ambuluisha bantu bajingulule mudibi bibambuluisha padibu bakumbaja malu adi Nzambi ulomba. (Yesh. 48:17) Mushindu umue wa kubambuluisha nunku nkubaleja bubi bua ku mubidi anyi mu lungenyi budi bumueneka padi muntu ubenga meji a Nzambi, nansha bua tshitupa tshîpi patupu. Umvuija mudi mpekatu itulamuna, itusemeja kule ne Nzambi, ipangisha bakuabu mua kulongelabu bulelela kutudi, ne anyi mene idiata bukenji budi nabu bakuabu. (1 Tes. 4:6) Ubambuluishe bua kusanka bua mabenesha adibu nawu, bionso ebi anu bualu badi batumikila mikenji ya Nzambi. Ubambuluishe bua bikale ne dianyisha dia bungi bua mudi diendela mu njila miakane ya Yehowa dituepula ku malu mabi a bungi. Diakamue padi anu muntu witabuja mudi njila ya Nzambi mikale njila ya meji, neabenge ne muoyo mujima bualu buonso budi bubengangane ne njila eyi. (Mus. 119:104) Neamone ditumikila Nzambi bu mushindu wa kumuleja dinanga ne lulamatu, kadi ki mbu tshintu tshikole nansha.

Ambuluisha bakuabu bua badikonkonone. Bua kutungunuka ne dikola mu nyuma, bantu badi ne bua kumanya bimpe malu adi mu mitshima yabu. Umvuija mushindu udi Bible ubambuluisha bua kumanya tshidi mu mutshima.

Ubambuluishe bamone ne: Bible kêna anu mukanda wa mikenji ne mibelu ne miyuki ne milayi patupu to. Kadi udi kabidi uleja patoke meji a Nzambi. mu Yakobo 1:22-25, badi bafuanyikija Dîyi dia Nzambi ne lumuenu. Tshitudi tuenza bua tshidi Bible wamba ne bua mudi Yehowa ukumbaja malu adiye mulongolole, tshidi tshileja tshidi mutshima wetu. Nenku udi uleja mudi Nzambi “udi [ukonkonona] mitshima” utumona. (Nsu. 17:3) Kankamija bantu bua kulamabu bualu ebu mu mutu. Ubakankamije bua kuela meji ku malu adi Nzambi mufundishe mu Bible, ku malu adibu ne bua kulekela ne adibu ne bua kuenza bua kusankisha Yehowa. Ubambuluishe bua kuangata dibala dia Bible bu mushindu wa kumanya mudi Yehowa wangata ‘meji ne malu adi mutshima musue kuenza’ bua kumvuanganawu ne a Nzambi ne kushintuluka mu malu onso adi akengedibua.​—Eb. 4:12; Lomo 15:4.

Bamue balongi ba Bible badi mua kuikala ne dijinga dia kutumikila malu adibu balonga; kadi badi mua kutshina bua mudi bakuabu babamona. Badi mua kuikala baluangana ne imue nkuka ya mubidi mikole. Anyi badi mua kukeba bua kusadila Nzambi mushindu kampanda eku batungunuka ne bimue bilele bia bena panu. Ubaleje bubi bua kutua mu nsampu kutua mu kaleji, bubi bua dibenga kuikala ne dîyi dimue. (1 Bak. 18:21) Ubakankamije bua kusambila Nzambi bua kukonkonona ne kusukula kutokeshaye mutshima wabu.​—Mus. 26:2; 139:23, 24.

Ubaleje ne: Yehowa udi umona mudibu batata amu, ne Bible udi umvuija tshidi tshibenzekela etshi. (Lomo 7:22, 23) Ubambuluishe bua kuikala badimuke bua kabalekedi nkuka ya mutshima wabu udi kauyi mupuangane ibapita makanda.​—Nsu. 3:5, 6; 28:26; Yel. 17:9, 10.

Ulombe muntu yonso ikale ukonkonona kenzela kende ka malu. Longesha mulongi mua kudiebeja nkayende ne: ‘Bua tshinyi ndi musue kuenza bualu ebu? Nebuleje Yehowa ne: ndi nganyisha bulelela malu onso adiye mungenzele anyi?’ Umuambuluishe bua kushindikaye ne: kumvuangana bilenga ne Yehowa nkupite bintu bimpe bikuabu bionso kule ne kule.

Wambuluishe bateleji bua kumvua bimpe tshidi kukuatshila Yehowa mudimu ne “mutshima wonso” kumvuija. (Luka 10:27) Bidi biumvuija ne: majinga, meji a munda, ne tshidi tshibasaka bua kuenza malu bidi ne bua kuikala biumvuangana ne njila ya Yehowa. Nanku longesha bateleji mua kukonkonona ki ng’anu tshidibu benza nkayatshi to, kadi kabidi mudibu bumvua bua malu adi Nzambi ubalomba ne tshidi tshibasaka bua kumuenzela mudimu. (Mus. 37:4) Padi balongi bebe bajingulula nsombelu idibu ne bua kuakaja, ubakankamije bua kusambila Yehowa kumuambila ne: ‘Uvuije mutshima wanyi mutshima umue udi utshina dîna diebe.’​—Mus. 86:11.

Padi mulongi ne malanda mimpe ne Yehowa, neatumikile Nzambi ku ditabuja, ki ng’anu bualu wewe udi umusaka to. Neikale nkayende mpindieu ‘udienzeja muende muonso bua kujingulula bidi bisankisha Mfumu.’ (Ef. 5:10, MMV; Filip. 2:12) Ditumikila didi difumina ku muoyo dia nunku didi disankisha Yehowa bikole dia dikema.​—Nsu. 23:15.

Uvuluke ne: Yehowa ke udi ukonkonona anyi upima mitshima, ne se: amu yeye ke udi ukoka bantu kudiye. (Nsu. 21:2; Yone 6:44) Tshietu tshitudi tuenza nkuambuluisha bantu aba. (1 Kol. 3:9) Mbienze bu ne: ‘Nzambi udi usengelela [bantu] ne dîyi dietu.’ (2 Kol. 5:20; Bien. 16:14) Yehowa kêna wenzeja bantu ku makanda bua kuitaba bulelela to, kadi patudi tuenza mudimu ne Bible, Yehowa udi mua kuenza bua bantu bamone ne: malu adibu bamba adi mikale bushuwa mandamuna a nkonko anyi masambila abu. Dîba dionso diudi upeta mushindu wa kulongesha, ikala ne bualu ebu mu mutu, ne lomba Yehowa bua akuludike, ne akuambuluishe.​—1 Kul. 29:18, 19; Ef. 1:16-18.