Yone mmusue kumvuila malu mukana mua Yezu

Kukadi bu tshidimu tshijima tshivua Yone Mubatiji muenze mu buloko. Nansha nanku wakumvua bakula bua malu a kukema adi Yezu muenze. Ela meji mudi Yone umvua padi bayidi bende bamuambila ne: Yezu mmujule muana wa balume wa mukaji mukamba wa mu Naina ku lufu. Kadi Yone mmusue kumvuila diumvuija dia malu onso aa mukana mua Yezu. Nunku Yone wakabikidisha bayidi bende babidi. Bua kuenza tshinyi? Bua baye kuebeja Yezu ne: “Wewe ke yeye udi ulua anyi tuindile mukuabu?”​—Luka 7:19.

Lukonko elu ludiku lumueneka bu ludi kaluyi ne mutu anyi? Yone mmuntu uvua mudifile kudi Nzambi, pavuaye mubatize Yezu kukadi bidimu bitue ku bibidi, uvua mumone nyuma wa Nzambi upueka pa mutu pa Yezu ne mumvue Nzambi wakula umuanyisha. Kakuena bualu budi mua kutusaka bua kuela meji ne: ditabuja dia Yone nditekete to. Bu biobi nanku, Yezu kavua mua kutumbisha Yone bu mudiye wenza musangu eu to. Kadi bikalabi ne: Yone kena ne dielakana to, bua tshinyi wakela lukonko lua nunku bua Yezu?

Yone uvua pamuapa musue bua Yezu amujadikile nkayende ne: udi Masiya. Bualu ebu buvua mua kukolesha Yone bua lutatu luvuaye nalu mu buloko. Lukonko lua Yone ludi lumvuika bu ludi ne lungenyi lukuabu. Uvua mumanye bimpe milayi ya mu Bible idi ileja ne: Muela manyi wa Nzambi udi ne bua kuikala mukalenge ne musungidi. Kadi Yone uvua mu buloko kukavua ngondo ya bungi panyima pa yeye mumane kubatiza Yezu. Nunku Yone udi webeja bikalaku kudi mukuabu udi ulua, mmumue ne: mupinganyi wa Yezu washikija dikumbana dia malu onso avuabu balaye avua Masiya ne bua kukumbaja.

Pamutu pa Yezu kuambila bayidi ba Yone patupu ne: ‘Bulelela meme ke Yeye udi ulua,’ udi ubapesha tshijadiki tshia ne: Nzambi udi umuambuluisha padiye wondopa bantu ba bungi masama ne mabedi bia mishindu yonso. Pashishe wakambila bayidi abu ne: “Ndayi, nuambile Yone malu anudi numvua ne anudi numona: Bampofu badi mpindieu bamona, balema badi benda, bena nsudi badi balengejibua, bampudi matshi badi bumvua, bafue badi bajudibua, ne badi bambila bapele lumu luimpe.”​—Matayi 11:4, 5.

Lukonko lua Yone luakaleja muvuaye mutekemene ne: Yezu neenze malu a bungi kupita adiye wenza mpindieu, ne pamuapa neamupatule mu buloko. Kadi Yezu wakambila Yone bua katekemenyi malu makuabu pa kumbusha bishima bidiye wenza to.

Pavua bayidi ba Yone baye, Yezu wakajadikila musumba wa bantu ne: Yone kavua muprofete patupu to. Uvua ‘mutuadi wa mukenji’ wa Yehowa udibu bakuile mu mulayi udi mu Malaki 3:1. Udi kabidi muprofete Eliya, anu mukavuabu baleje mu Malaki 4:5, 6. Yezu wakumvuija ne: “Bulelela ndi nnuambila ne: munkatshi mua bantu badibu balele kudi bakaji kamuena muanji kujuka muntu munene kupita Yone Mubatiji to, kadi muntu udi mukese mu Bukalenge bua mu diulu mmunene kumupita yeye.”​—Matayi 11:11.

Pavua Yezu muambe ne: muntu udi mutambe bukese mu Bukalenge bua mu diulu mmunene kupita Yone, uvua uleja ne: Yone kakuikala mu Bukalenge bua mu diulu to. Yone wakalongoluela Yezu njila, kadi udi ufua kumpala kua Kristo kukangulaye njila wa kuya mu diulu. (Ebelu 10:19, 20) Nansha nanku Yone mmuprofete wa lulamatu wa Nzambi, ne neikale pa buloba mu bukokeshi bua Bukalenge bua Nzambi.