Malu adibu baledile mu Mabeji a Tshisangilu tshia Nsombelu ne mudimu wetu wa buena Kristo
LUMINGU LUA DIA 4-10/6
BIUMA BIA MU DÎYI DIA NZAMBI | MÂKO 15-16
“Yezu wakakumbaja mêyi a buprofete”
mamanyisha a mu nwtsty bua Mâk 15:24, 29
kuabanyabu bilamba biende bia pa mutu: Muyuki udi mu Yne 19:23, 24 udi uleja malu makuabu adi Matayi, Mâko ne Luka kabayi baleje bu mudi bua ne: basalayi bena Lomo bavua bushuwa belele bilamba biende nshobo: tshia pa mutu ne tshia muinshi; basalayi abu bakabanya bilamba biende bia pa mutu “mu bitupa binayi, tshitupa tshimue bua musalayi yonso”; kabavua basue kuabanyangana tshilamba tshiende tshia muinshi to, ke bobu kutshielela nshobo, nshobo ayi yakakumbaja mêyi adi mu Mis 22:18 avua akula bua tshilamba tshia Masiya. Pa tshibidilu, bantu bavua bashipa benzavi bavua balama bilamba biabu, babavulabi ne bangata bintu bivuabu nabi kumpala kua kubashipabu, anu bua kubapuekesha milongo.
bakupa mitu: Misangu ya bungi bantu bavua bakupa mitu basakidila ne mêyi bua kupetula muntu anyi kumuseka. Bapitshi ba njila abu bakakumbaja mêyi a buprofete adi mu Mis 22:7 kabayi bamanye.
dimanyisha dia mu nwtsty bua Mâk 15:43
Jozefe: malu avua bafundi ba Evanjeliyo bafunde bua Jozefe avua mashilangane bilondeshile tshivua yonso wa kudibu. Matayi uvua mulambuishi wa bitadi wakafunda ne: Jozefe uvua “muntu mubanji”; Pavua Mâko mufundile bena Lomo wakamba ne: Jozefe uvua “muntu munene wa mu Tshipangu tshinene” uvua muindile Bukalenge bua Nzambi; Luka, munganga uvua umvuilangana, wakafunda ne: Jozefe uvua “muntu muimpe ne muakane” uvua kayi muitabe tshibawu tshivua bena mu Tshipangu tshinene bakosele Yezu; anu Yone nkayende ke uvua mufunde ne: Jozefe uvua “[muyidi] wa Yezu wa mu musokoko bualu uvua utshina bena Yuda.”—Mat 27:57-60; Mâk 15:43-46; Luk 23:50-53; Yne 19:38-42.
Dikeba bubanji bua mu Dîyi dia Nzambi
dimanyisha dia mu nwtsty bua Mâk 15:25
dîba disatu: Mmumue ne: bu dîba dia tshitema mu dinda. Bamue bantu badi bamba ne: kudi dishilangana pa malu adi mamba mu mvese eu ne adi mu Yone 19:14-16, udi wamba ne: “dîba dikavua bu pa dîba disambombo” pavua Pilato mufile Yezu bua bamushipe. Nansha mudi Bible kayi mumvuije menemene dishilangana edi, kudi amue malu atudi mua kutabalela bu mudi bua ne: Evanjeliyo eyi idi ipetangana mu kabujima padiyi yakula bua dîba divua malu menzeke mu dituku dia ndekelu dia muoyo wa Yezu pa buloba. Mikanda yonso inayi eyi idi yamba muvua bakuidi ne bakulu batuilangane patshiatshia ne pashishe baye ne Yezu kudi Pontio Pilato nguvena wa bena Lomo. (Mat 27:1, 2; Mâk 15:1; Luk 22:66–23:1; Yne 18:28) Matayi, Mâko, ne Luka badi balonda ne: pakavua Yezu ku mutshi, mîdima yakabuikila ditunga dijima kubangila “pa dîba disambombo, . . . too ne pa dîba dia tshitema.” (Mat 27:45, 46; Mâk 15:33, 34; Luk 23:44) Bualu bukuabu budi mua kuambuluisha bua kumanya dîba divuabu bashipe Yezu budi ne: bavua babala diela muena tshibawu mfimbu munkatshi mua malu avuabu benzela muntu bua kumushipa. Imue misangu bavua bela muntu mfimbu mibi imufikisha too ne ku difua. Bidi bimueneka ne: bavua bele Yezu mfimbu mibi, ke bualu kayi bivua bilomba bua muntu mukuabu amuambuishe mutshi wa makenga uvuaye muambule. (Luk 23:26; Yne 19:17) Bikalabi ne: bavua bangata diela muntu mfimbu bu bualu bua kumpala mu malu avuabu benza bua kumushipa, bidi bimueneka ne: kuvua mua kuikala kupite mutantshi bule kampanda kumpala kua kupopelabu Yezu ku mutshi. Bua kujadika bualu abu mvese wa Mat 27:26 ne wa Mâk 15:15 idi itela diela Yezu mfimbu ne dimushipa ku mutshi musangu umue. Nunku bantu bashilangane badi mua kufila mêba mashilangane bua dishipa dia Yezu bilondeshile tshikondo tshidibu bela meji ne: ke tshivua malu onso aa matuadije. Bidi biumvuika bua muvua Pilato mukeme pavuaye mumvue ne: Yezu uvua mufue ne lukasa pavuabu bamupopele pa mutshi. (Mâk 15:44) Bualu bukuabu, bafundi ba Bible bavua misangu ya bungi bakosolola dituku dia ku mêsu kutoke mu bitupa binayi, tshitupa tshionso tshikale ne mêba asatu anu muvuabu benza kabidi bua butuku. Kukosolola dituku mushindu au ke kuvua kuenza bua bakule bua dîba disatu, disambombo ne dia tshitema, baabala kubangila padi dîba dipatuka mu dîba isambombo wa mu dinda. (Mat 20:1-5; Yne 4:6; Bz 2:15; 3:1; 10:3, 9, 30) Bualu bukuabu kabidi, bantu kabavua ne mêba bua kumanya dîba dijalame to, ke bualu kayi pavuabu bakula bua dîba bavua batamba kuamba ne: “bu,” anu mutudi mua kubala mu Yne 19:14. (Mat 27:46; Luk 23:44; Yne 4:6; Bz 10:3, 9) Mu tshikoso: Mâko uvua mua kuikala muakule bua diela Yezu mfimbu ne dimupopela pa mutshi, pavua eku Yone muakule yeye anu bua dimupopela pa mutshi nkayadi. Bafundi bonso babidi abu bavua mua kuikala babandishe dîba divuabu batele adi anyi badipuekeshe bua bipetangane ne mêba asatu avua pabuipi ne dîba divua malu au menzeke, Yone uvua mutele muaku “bu” pavuaye wakula bua dîba divuaye yeye mumone malu au. Malu aa ke adi mua kuikala menze bua kuikale dishilangana dia mêba adibu batele mu miyuki eyi. Bua kujikija, bu muvua Yone mufunde mukanda wende bidimu makumi a bungi pashishe, ne mutele dîba dishilangane ne divua Mâko mutele, bidi bileja ne: kavua mutentule malu akavua Mâko mufunde to.
dimanyisha dia mu nwtsty bua Mâk 16:8
bualu bavua ne buôwa: Bilondeshile mikanda ya kale menemene mifunda ku tshianza idiku ya tshitupa tshia ndekelu tshia mukanda wa Mâko, Evanjeliyo eu udi ujika ne mêyi adi mu mvese wa 8. Bamue bantu badi bamba ne: mushindu udi mukanda eu ujika mu tshikoso udi uleja ne: ki mmuvuawu ne bua kuikala mujike mifundu ya kale to. Kadi bua mushindu udi Mâko mufunde mukanda eu, tshidibu bamba atshi ki ntshilelela to. Bualu bukuabu, bamanyi ba malu a mu Bible ba mu bidimu bia nkama isatu bu mudi Jérôme ne Eusèbe badi baleja ne: mukanda mulelela wa Mâko udi ujika ne mêyi a ne: “bualu bavua ne buôwa.”
Kudi mikanda ya bungi mifunda ku tshianza ya tshiena Greke ne nkudimuinu ya miakulu mikuabu idi ikumbaja nkomenu mule anyi muîpi panyima pa mvese 8. Nkomenu mule (udi ne mvese mikuabu 12) udi mu Codex Alexandrinus, Codex Ephraemi Syri rescriptus, ne Codex Bèze Cantabrigiensis, yonso ya mu bidimu bia 400 panyima pa Yezu. Nkomenu eu udi kabidi mu Vulgate wa mu Laten, mu nkudimuinu wa Cureton wa tshiena Sulia, ne mu Peshitta wa tshiena Sulia. Nansha nanku, nkomenu eu kena mu mikanda mifunda ku tshianza ya kale ya tshiena Greke ya mu bidimu bia 300 bu mudi Codex Sinaiticus ne Codex Vaticanus, ne mu mukanda wa Mâko mu tshiena Copte mufunda ku tshianza mu bidimu bia 400. Bia muomumue, mikanda ya kale ya Mâko mifunda ku tshianza mu tshiena Arménie ne mu tshiena Géorgie idi payi ijika ne mvese wa 8.
Mikanda mikuabu ya tshiena Greke ne nkudimuinu ya miakulu mikuabu yakaluabu kupatula pashishe idi ne nkomenu muîpi (muenza ne biambilu bikese patupu). Codex Regius wa mu bidimu bia 700 panyima pa Yezu udi nkomenu yonso ibidi eyi, mule ne muîpi, kadi yakula tshia kumpala bua nkomenu muîpi. Nkomenu eyi idi ne dimanyisha ku ntuadijilu didi dileja ne: bavua bitabe mvese eyi kudi bamanyi ba malu a mu Bible ba mu bidimu bia 700.
NKOMENU MUÎPI
Nkomenu muîpi udi panyima pa Mâk 16:8 kena mu mifundu idi mifundisha ku nyuma muimpe to. Mêyi aa adi amba ne:
Kadi bakalondela Petelo ne bavuaye nabu malu onso avuabu babambile bua kuenza mu tshikoso. Kunyima kua malu aa, Yezu nkayende wakabatuma kumbukila ku Est too ne ku Ouest bua kuamba mukenji wa tshijila wa lupandu lua tshiendelele udi kawuyi mua kunyanguka.
NKOMENU MULE
Nkomenu mule udi panyima pa Mâk 16:8 kena mu mifundu idi mifundisha ku nyuma muimpe to. Mêyi aa adi amba ne:
9 Pakabishibuaye ku lufu mu dinda dituku dia kumpala dia lumingu, wakanji kumuenekela Mariya wa ku Magadala uvuaye mumbushe bademon muanda mutekete. 10 Mariya wakaya kulondela bayidi bende bualu ebu pavuabu mu madilu badila. 11 Kadi pakumvuabu ne: uvua kabidi ne muoyo ne Mariya uvua mumumone, kabakitaba to. 12 Malu aa mamane kuenzeka, wakamuenekela babidi ba kudibu mu mushindu mukuabu pavuabu mu njila benda baya ku budimi; 13 bakalukila, kulondelabu bavua bashale bualu ebu. Nansha bobu kabakabitaba to. 14 Kadi pashishe wakalua kumuenekela bapostolo dikumi ne umue pavuabu basombe ku mêsa, kubambaye bua muvuabu bapange ditabuja ne muvuabu ne mioyo mipape, bualu kabavua bitabe bantu bavua bamumone pakavuaye mubishibue ku lufu. 15 Wakabambila ne: “Ndayi pa buloba bujima, nuyishe bantu bonso lumu luimpe. 16 Muntu udi witabuja ne ubatijibua, neasungidibue, kadi udi kayi witabuja nebamupishe. 17 Kabidi, bantu bitabuja nebikale ne bimanyinu ebi: Nebipate bademon mu dîna dianyi, nebakule mu miakulu mienyi, 18 nebakuate nyoka ne bianza biabu, bobu banue mulungu udi mua kushipa kawakubenzela bualu nansha bumue. Nebatentekele babedi bianza, bobu nebumvue bimpe.”
19 Pakajikija Mukalenge Yezu kubambila malu aa, wakambuibua mu diulu, kusombaye ku tshianza tshia balume tshia Nzambi. 20 Bobu kupatuka, kuyabu kuyisha miaba yonso. Mukalenge uvua wenza nabu mudimu, ujadika mukenji au ne bimanyinu bivua bienda nawu pamue.
Dibala dia Bible
LUMINGU LUA DIA 11-17/6
BIUMA BIA MU DÎYI DIA NZAMBI | LUKA 1
“Idikija budipuekeshi bua Mariya”
“Mona, meme mukaji mupika wa Yehowa!”
“Mona, meme mukaji mupika wa Yehowa!”
Dikeba bubanji bua mu Dîyi dia Nzambi
dimanyisha dia mu nwtsty bua Luk 1:69
lusengu lua lupandu: Anyi “mupandishi wa bukole.” Mu Bible nsengu ya nyama itu ileja bukole, ne ditshimuna. (1Sm 2:1; Mis 75:4, 5, 10; 148:14; mam.) Kabidi, mu Bible mbafuanyikije bakokeshi ne bamfumu nansha bimpe anyi babi ne nsengu, ditshimuna diabu mbadifuanyikije ne dipusa nyama mukua ne nsengu. (Dut 33:17; Dan 7:24; 8:2-10, 20-24) Mu mvese eu, tshiambilu tshia ne: “lusengu lua lupandu” tshidi tshileja mudi Masiya muntu udi ne bukole bua kupandisha bantu, ne mupandishi wa bukole.
dimanyisha dia mu nwtsty bua Luk 1:76
neudianjile kumpala kua Yehowa: Yone Mubatiji uvua ne bua ‘kudianjila kumpala kua Yehowa’ mu ngumvuilu wa ne: uvua ne bua kudianjidila Yezu, muntu uvua muleji-mpala wa Tatuende, ne wakalua mu dîna dia Tatuende.—Yne 5:43; 8:29; bala dimanyisha dia mu mvese eu didi diakula bua Yehowa.
Dibala dia Bible
LUMINGU LUA DIA 18-24/6
BIUMA BIA MU DÎYI DIA NZAMBI | LUKA 2-3
“Nuenu bansonga, nudi nuenda nukola mu nyuma anyi?”
dimanyisha dia mu nwtsty bua Luk 2:41
baledi bende bavua ne tshibidilu: Mikenji kayivua yanyishila bantu bakaji bua kubuela mu tshibilu tshia Pasaka to. Kadi Mariya uvua ne tshibidilu tshia kuya ne Jozefe ku Yelushalema bua kubuela mu tshibilu atshi. (Eks 23:17; 34:23) Bobu ne dîku diabu divua dienda didiunda bavua benza luendu lua kilometre mitue ku 300 tshidimu tshionso bua kuya ku Yelushalema ne kualukila.
mamanyisha a mu nwtsty bua Luk 2:46, 47
ubela nkonko: Anu muvuabi bikemesha bantu bavua bateleja Yezu, nkonko yende kayivua bu ya muana udi ukeba kumanya malu patupu to. (Luk 2:47) Muaku wa mu tshiena Greke udibu bakudimune ne: wela . . . nkonko” udi mua kuleja kabidi nkonko itubu bela muntu ku tshilumbuluidi, anyi nkonko ya dituisha nayi muntu. (Mat 27:11; Mâk 14:60, 61; 15:2, 4; Bz 5:27) Bamanyi ba malu a kale badi bamba ne: bamue bamfumu ba bitendelelu bavua batambe kumanyika bavua ne tshibidilu tshia kushala ku ntempelo panyima pa bibilu, balongeshangana mu lutanda lunene lua ku ntempelo aku. Bantu bavua basomba ku makasa abu, babateleja ne babela nkonko.
bavua anu bakema bikole: Muaba eu muaku wa pa muanda wa mu tshiena Greke udibu bakudimune ne: “kukema bikole” udi mua kuleja mudi muntu utungunuka ne kukema.
dimanyisha dia mu nwtsty bua Luk 2:51, 52
wakatungunuka ne kubakokela: Anyi “uvua anu ubakokela; wakashala anu ubatumikila.” Muaku wa pa muanda wa mu tshiena Greke udi uleja bualu budi muntu utungunuka ne kuenza eu udi uleja ne: pakavua Yezu mumane kukemesha balongeshi abu ku ntempelo bua dimanya diende dia Dîyi dia Nzambi, wakaya kuabu, kukokelaye baledi bende ne budipuekeshi buonso. Ditumikila adi divua ne mushinga kupita dia muana mukuabu kayi yonso eu, divua dileja muvuaye mukumbaje mikenji ya Mose mu kalu ne kalu konso. —Eks 20:12; Gal 4:4.
Dikeba bubanji bua mu Dîyi dia Nzambi
mamanyisha a mu nwtsty bua Luk 2:14
ne ditalala dikale pa buloba munkatshi mua bantu badiye muanyishe: Mbakudimune tshiambilu etshi mu imue mikanda mifunda ku tshianza ne: “ne ditalala dikale pa buloba, ne muoyo mulenga kudi bantu,” mushindu eu ke udibu batshikudimune kabidi mu nkudimuinu mikuabu ya Bible. Kadi mushindu udi Nkudimuinu wa bulongolodi bupiabupia mukudimune tshiambilu etshi udi upetangana bikole ne mikanda mifunda ku tshianza. Mêyi avua banjelu bambe aa kaena akula bua muvua Nzambi mua kuanyisha bantu bonso nansha bobu benze malu mushindu kayi to. Kadi avua atangila bantu bavuaye ne bua kuanyisha bua muvuabu ne bua kumuleja ditabuja dilelela ne kulua bayidi ba Muanende.—Bala dimanyisha didi ditangila bantu badiye muanyishe mu mvese eu.
bantu badiye muanyishe: Tshiambilu tshia ne: “bantu badiye muanyishe” etshi ntshifumine ku muaku eudokia wa mu tshiena Greke. Badi mua kukudimuna kabidi muaku eu ne: “dianyisha; anyi disankisha.” Mbatele muaku wa pa muanda eudokeo udi mufuanangane nawu mu Mat 3:17; Mâk 1:11; ne mu Luk 3:22 mudi Nzambi wakula ne Muanende diakamue padiye ubatijibua (bala mamanyisha a mu nwtsty bua Mat 3:17, ne Mâk 1:11). Muaku eu udi upatula lungenyi lua, “kuanyisha; kusanka bua muntu anyi bua tshintu kampanda.” Mu diumvuangana ne ngumvuilu eu, tshiambilu tshia ne: “bantu badiye wanyisha” (anthropois eudokias) tshidi tshileja bantu badi Nzambi wanyisha ne wenzela malu ne muoyo mulenga, ne badi mua kutshikudimuna kabidi ne: “bantu badi bamusankisha.” Nunku mêyi a banjelu au avua atangila muoyo mulenga wa Nzambi, ki nkudi bantu bonso mu tshibungi to, kadi kudi bantu badi bamusankisha bua mudibu bamuleja ditabuja dilelela ne balua bayidi ba Muanende. Nansha mudi muaku eudokia wa mu tshiena Greke eu mua kumvuija muoyo mulenga wa bantu mu imue miaba, (Lom 10:1; Flp 1:15), batu badi batamba kuwutela bua kuleja muoyo mulenga wa Nzambi, tshidi tshimusankisha anyi malu adiye wanyisha (Mat 11:26; Luk 10:21; Ef 1:5, 9; Flp 2:13; 2Ts 1:11). Mu Bible wa Septante mbatele muaku eu udi umvuija “muoyo muimpe” wa Nzambi mu Mis 51:18 [50:20, LXX].
Uvua mumanye anyi?
Nnganyi uvua tatuende wa Josefe?
Dibala dia Bible
LUMINGU LUA DIA 25/6–1/7
BIUMA BIA MU DÎYI DIA NZAMBI | LUKA 4-5
“Kandamena mateta anu bu Yezu”
Udi ne bua kuikala muntu wa mushindu kayi?
Udi ne bua kuikala muntu wa mushindu kayi?
bindidimbi bia mu nwtsty
Tshibumba tshia pa mutu tshia ntempelo
Satana uvua mua kuikala muimanyike Yezu “pa tshibumba [anyi “musonga”] tshia pa mutu pa ntempelo” ne kumuambilaye bua kudiela panshi, kadi katuena bamanye muaba musunguluke uvua Yezu muimane to. Bu mudi muaku “ntempelo” udibu batele muaba eu mua kuleja lupangu lujima lua ntempelo, Yezu uvua mua kuikala muimane ku 1) ditumba dia ku sud lua ku est dia ntempelo. Pamuapa uvua mua kuikala muimane ku ditumba dikuabu dia lupangu lua ntempelo. Muntu yeye mukuluke miaba ayi uvua mua kufua Yehowa yeye kayi mumuambuluishe.
Udi ne bua kuikala muntu wa mushindu kayi?
Dikeba bubanji bua mu Dîyi dia Nzambi
dimanyisha dia mu nwtsty bua Luk 4:17
muvungu wa muprofete Yeshaya: Muvungu wa ku Mbuu mufue wa Yeshaya mmuenza ne tutupa 17 tua biseba bia nyama tulamakaja tudi tuenza muvungu wa metre matue ku 7 ne tshitupa muikale ne milongo 54. Muvungu uvuabu babadisha bantu ku nsunagoga mu Nazaleta uvua mua kuikala bule bua muomumue. Mu bidimu lukama bia kumpala kawuvua mukosolola mu nshapita ne mvese to, nunku Yezu uvua ne bua kuikala mukebe mvese uvuaye ujinga kubala. Kadi bu muvuaye mupete muaba uvuabu bafunde mêyi a buprofete au, bidi bileja ne: uvua muibidilangane bikole ne Dîyi dia Nzambi.
dimanyisha dia mu nwtsty bua Luk 4:25
bua bidimu bisatu ne ngondo isambombo: Bilondeshile 1Bk 18:1, Eliya uvua mumanyishe ne: munanga uvua ne bua kujika “mu tshidimu tshisatu.” Kadi bamue bantu badi bela meji ne: tshivua Yezu muambe tshidi tshibengangana ne tshidi mu Bakalenge wa kumpala. Pabi muyuki udi mu Mifundu ya tshiena Ebelu kawena uleja ne: munanga uvua muenza bidimu bishadile ku bisatu to. Mu bulelela tshiambilu tshia ne: “mu tshidimu tshisatu” tshidi tshitangila tshikondo tshivua Eliya mumanyishe Ahaba dituadija dia munanga au. (1Bk 17:1) Bidi bimueneka ne: pavua Eliya mumanyishe dilua dia munanga au bakavua mu mushipu, pa tshibidilu mushipu uvua wenza ngondo mipite pa isambombo, kadi musangu au wakanenga bikole, kutungunukawu. Kabidi, munanga au kauvua mujike musangu umue pavua Eliya muye kabidi kudi Ahaba, “mu tshidimu tshisatu,” kadi wakimana anu panyima pa diteta dia kapia diakalua kuenzeka ku mukuna wa Kâmele. (1Bk 18:18-45) Nunku mêyi a Yezu adibu batele muaba eu ne mêyi a muomumue avua bana babu bamuambe adi apetangana bimpe ne dilondangana dia bikondo didibu batele mu 1Bk 18:1.
Dibala dia Bible