Udi uyisha mu Galela ne ulongesha bapostolo

Yezu mmuyishe bikole kukavua bidimu bibidi. Etshi tshivuaku tshikondo tshia kukepesha mudimu ne kuikisha anyi? Tòo, Yezu wakavudija mudimu wende wa diyisha pavuaye “unyunguluka mu bimenga bionso ne mu misoko [bia mu Galela], ulongesha mu nsunagoga yabu, uyisha lumu luimpe lua Bukalenge, wondopa mabedi a mishindu yonso ne matekete a mishindu yonso.” (Matayi 9:35) Malu avuaye umona adi amujadikila ne: bidi bikengela kuvudija mudimu wa diyisha. Kadi mmunyi muakumbajaye bualu ebu?

Pavua Yezu mu luendu elu, udi umona bantu badi dijinga ne kuondopibua ne kukoleshibua mu nyuma. Badi bu mikoko idi kayiyi ne mulami, mitatshishibue ne milekelela. Wakabumvuila luse ne kuambila bayidi bende ne: “Eyowa, bia kunowa bidi bia bungi, kadi bena mudimu mbakese. Nunku, lombayi Mfumu wa dinowa bua atume bena mudimu mu dinowa diende.”​—Matayi 9:37, 38.

Yezu mmumanye tshikala mua kuambuluisha. Wakabikila bapostolo 12 ne kubabanyaye babidi babidi, wenza tusumbu tusambombo tua bayishi. Pashishe udi ubambila malu matoke a kuenza aa: “Kanuyi mu njila wa bisamba, kanubuedi mu tshimenga tshia bena Samalea nansha tshimue, kadi tungunukayi ne kuya kudi mikoko mijimine ya nzubu wa Isalele. Panudi nuya, nuyishe, nuamba ne: ‘Bukalenge bua mu diulu mbusemene pabuipi.’”​—Matayi 10:5-7.

Bukalenge buvuabu ne bua kuyisha ebu mbuvua Yezu mutele mu disambila dia tshilejilu. ‘Bukalenge mbusemene pabuipi’ mu ngumvuilu wa ne: Yezu Kristo, Mukalenge udi Nzambi musungule, uvua muaba au. Kadi ntshinyi tshialeja ne: bayidi bende bavua bushuwa baleji mpala ba mbulamatadi wa Bukalenge ebu? Yezu udi ubapesha bukole bua kuondopa bantu bavua basama, too ne bua kubisha bafue, benza bionso ebi kabayi bafutshisha tshintu. Kadi mmunyi muakumbaja bapostolo majinga a bena mu mêku abu, bu mudi dia tshiakudia tshiabu tshia ku dituku ne ku dituku?

Yezu wakambila bayidi bende bua kubenga kudilongoluela bintu bua luendu lua kuyisha luvuabu benza elu. Kabavua ne bua kuambula or, arjan, anyi tshiamu tshia mitaku mu tubuta tuabu to. Kabavua nansha dijinga ne tshibombi tshia biakudia bua luendu anyi kuambula bilamba bia muinshi bikuabu anyi sandala to. Bua tshinyi? Yezu wakabajadikila ne: “Muena mudimu mmukumbanyine biakudia biende.” (Matayi 10:10) Bantu bavua banyisha mukenji wabu bavuabu bapeta nebakumbajile bayidi aba majinga abu manene. Yezu udi wamba ne: “Muaba wonso unudi nubuela mu nzubu, nushalamu too ne panumbuka muaba au.”​—Mâko 6:10.

Yezu wakaleja kabidi malu a kuenza bua mushindu wa kuambila bantu mukenji wa Bukalenge, wamba ne: “Panudi nubuela mu nzubu, nuele bena nzubu muoyo. Bikala nzubu mukumbane, ditalala dinudi numujingila diluamu; kadi bikalayi kayi mukumbane, ditalala dienu dipingane kunudi. Muaba wonso udi muntu kayi unuakidila anyi kayi uteleja mêyi enu, panudi nupatuka mu nzubu au anyi mu tshimenga atshi, nututule lupuishi ku makasa enu.”​—Matayi 10:12-14.

Bivua mene mua kuenzeka ne: tshimenga tshijima anyi musoko mujima ubenge mukenji wabu. Ntshinyi tshivua mua kufikila bena muaba eu? Yezu wakaleja dilumbuluisha dikole dikalaku bua tshienzedi etshi. Wakumvuija ne: “Bulelela ndi nnuambila ne: mu Dituku dia Dilumbuluisha, dinyoka dia buloba bua Sodoma ne Amola nedikale dipepele menemene kupita dia tshimenga atshi.”​—Matayi 10:15.