Utu ujingulula ngikadilu ya Nzambi idi kayiyi imueneka anyi?

Pautu utangila tshilongo tshia dikala dimpe, mitoto mu diulu, anyi tshibila tshia mâyi, utuku umona ne: kudi muntu udi mubifuke anyi? Bifukibua bidi bitunyunguluke bidi bituleja ngikadilu ya Yehowa idi kayiyi imueneka. (Lom 1:20) Patudi tutangila bintu bidi bimueneka ne ntema ne tuelangana meji abi, tudi tufika ku dijingulula mudi Nzambi ne bukole, ne dinanga, ne meji, ne buakane, tumona kabidi mudiye tshipapayi.—Mis 104:24.

Mbintu kayi bidi Yehowa mufuke biutu wewe umona dituku dionso? Nansha wewe mu tshimenga, udi anu mua kumona nyunyi anyi mitshi. Kutangila bintu bidi Yehowa mufuke ne ntema kudi kutuambuluisha bua kutûyisha malu adi matutonde, kuimanyina pa adi ne mushinga, ne kukolesha ditabuja mu bukole budi nabu Yehowa bua kututabalela bua kashidi. (Mat 6:25-32) Biwikala ne bana, bambuluisha bua bamone ngikadilu minene ya Yehowa. Patudi tukolesha dianyisha dietu bua bifukibua bidi bitunyunguluke, nebituambuluishe bua kusemena pabuipi menemene ne Mufuki.—Mis 8:3, 4.

NUTANGILE FILME WA BINTU BIA DIKEMA BIDI NZAMBI MUFUKE BIDI BIAMBA BUTUMBI BUENDE: BUTOKE NE MEKALA, PASHISHE NUANDAMUNE NKONKO IDI ILONDA EYI:

• Tshitu tshienza bua tuikale tumona mekala ntshinyi?

• Ntshinyi tshitu tshienza bua tshintu tshikale tshishintuluka mekala bilondeshile nseke idi bantu batshitangidila?

• Tshitu tshienza bua tumone mekala mashilashilangane mu diulu ntshinyi?

• Mmekala kayi a pa buawu autu umona ku bifukibua bidi muaba uudi musombele?

• Bua tshinyi mbimpe tuetu kukeba dîba dia kubandila bifukibua ne lubatshi?