“Katuena tulekela nansha”

4:16-18

Fuanyikija mêku abidi masombele mu nzubu kampanda wa kale ukadi munyanguke. Dîku dimue didi dinyingalala bua mudi nzubu wenda anu unyanguka, kadi dikuabu diodi didi disanka bualu mu matuku makese nediye kusombela mu nzubu mupiamupia.

Bia muomumue, “bifukibua bionso bidi bitungunuka ne kutua mikemu popamue ne kukenga popamue too ne mpindieu,” kadi tuetu batendeledi ba Nzambi tudi ne ditekemena didi ditukolesha. (Lom 8:22) Tudi bamanye ne: makenga atudi nawu lelu, nansha akadi matusubishe munkatshi mua bidimu bungi tshianana, nga ‘tshitupa tshîpi ne mmapepele’ patudi tuafuanyikija ne masanka atuapeta mu bulongolodi bupiabupia. Tuetu batuishile mêsu pa masanka atuapeta mu Bukalenge bua Nzambi, netushale ne disanka katuyi tulekela nansha.