TUIKALAYI NE NSOMBELU WA BUENA KRISTO
Diaku bulunda ne bantu badi banange Yehowa
Bua tshinyi mbimpe kudia bulunda ne bantu badi banange Yehowa? Bualu bantu batudi tusomba nabu badi mua kutusaka ku dienza malu mimpe anyi mabi. (Nsu 13:20) Tshilejilu, mukalenge Yoasha wakenza “malu mimpe ku mêsu kua Yehowa” pavuaye mudie bulunda ne muakuidi munene Yehoyada. (2Ku 24:2) Kadi pakafua Yehoyada, Yoasha wakapeta balunda babi bakamufikisha ku dilekela Yehowa.—2Ku 24:17-19.
Mu bidimu lukama bia kumpala, mupostolo Paulo wakafuanyikija tshisumbu tshia bena Kristo ne “nzubu munene,” kufuanyikijaye kabidi bena mu tshisumbu ne “bintu bia tshikuku,” anyi bintu bia mu nzubu. Tudi tushala “tshintu tshia mudimu bua mudimu wa bunême” anu patudi tubenga kudia bulunda ne bantu badi benza malu adi kaayi asankisha Yehowa, nansha bobu bena mu dîku dietu anyi bena mu tshisumbu. (2Tm 2:20, 21) Nunku, tutungunukayi ne kudia bulunda ne bantu badi banange Yehowa, badi mua kutukankamija bua kumuenzela mudimu.
NUTANGILE FILME WA MANYA MUA KULEKELA BALUNDA BABI, PASHISHE NUANDAMUNE NKONKO EYI:
Mmunyi mutudi mua kudia bulunda ne bantu babi katuyi bamanye?
Ntshinyi tshivua tshiambuluishe bana betu basatu batudi bamone ne filme eu bua kukosabu malanda ne balunda babi bavuabu nabu?
Mmêyi manene kayi a mu Bible adi mua kukuambuluisha bua kusungula balunda bimpe?
Ndiku “tshintu tshia mudimu bua mudimu wa bunême” anyi?—2Tm 2:21