Nshapita wa 39
Mukalenge-Muluanganyi udi utshimuna ku Armagedon
Tshikena-kumona tshia 13—Buakabuluibua 19:11-21
Tshiena-bualu: Yezu udi ulombola biluilu bia mu diulu bua kubutula bulongolodi bua malu bua Satana
Tshikondo tshia dikumbana: Kunyima kua dibutudibua dia Babilone Munene
1. Armagedon ntshinyi, ne mmuanda kayi udi ufikishaku?
ARMAGEDON—mmuaku udi ukuatshisha ba bungi buôwa! Kadi, bua banangi ba buakane, udi umanyisha dituku ditamba kuindila dikala Yehowa ne bua kukumbaja dilumbuluisha diende pa matunga. Ki mmvita ya muntu to, kadi “mvita ya dituku dinene dia Nzambi Wa-Bukole-Buonso”—dituku dia kudisombuela kuende pa baludiki ba pa buloba. (Buakabuluibua 16:14, 16; Yehezekele 25:17) Dikenga dinene nedikale dimane kutuadija ne dibutuka dia Babilone Munene. Pashishe, musakibue kudi Satana, nyama wa luonji wa dikala dikunze pamue ne nsengu yende dikumi nebaluishe tshisamba tshia Yehowa. Diabolo, ne tshiji tshikole kupita kumpala tshikuatshila bulongolodi peshi mukaji wa Nzambi, mmuangate dipangadika dia kutumika ne aba bakadingaye bua kuluisha ne kujimija bashadile ba ku dimiinu diende. (Buakabuluibua 12:17) Ke wende mushindu wa ndekelu udiye nawu!
2. Gog wa ku Magog nnganyi, ne mmunyi mudi Yehowa umusaka bua kubunda tshisamba Tshiende?
2 Dibundibua edi dia tshiji tshikole kudi Diabolo ndiumvuija mu mushindu wa dikema mu Yehezekele nshapita wa 38. Muomu amu, Satana mupuekesha mulongo udi ubikidibuamu ku dîna dia “Gog wa ku ditunga dia Magog.” Mu ngakuilu wa mu tshimfuanyi, Yehowa udi wela ndobo mu bibanga bia Gog ne umupatula, yeye ne biluilu biende bionso bua bele mvita. Mmunyi mudiye wenza bualu ebu? Mpa kusaka Satana ku diangata Bantemu Bende bu tshisamba tshibule dikubibua, “tshisangisha pamue ne bantu bapatuke mu bena matunga kabukabu, tshisamba tshikunguiji tshia mabanji ne bintu, aba badi basombele munkatshi mua buloba.” Bualu buabu ke budi mu tshialu mu mianda idi ipitakana pa buloba, bualu anu buobo ke bakabenga kutendelela nyama wa luonji ne tshimfuanyi tshiende. Gog udi ne mukupa pa kumona bukole buabo ne dilubuluka diabo dia mu nyuma. Nenku, Satana ne biluilu biende bivulavulayi, pamue ne nyama wa luonji udi upatuka mu mbuu ne nsengu yende dikumi, badi bapatuka mabumba mabumba bua kubutula. Kadi, bishilangane ne Babilone Munene, tshisamba tshikezuke tshia Nzambi tshidi tshikubibua kudi Nzambi.—Yehezekele 38:1, 4, 11, 12, 15; Buakabuluibua 13:1.
3. Mmunyi mudi Yehowa wipata biluilu bia Gog?
3 Mmunyi muatuisha Yehowa Gog ne musumbasumba wende binu panshi? Telejayi! “‘Nemmubikidile muele mu rejon wanyi wonso wa mikuna,’ ke mudi Mfumu Mutambe bunene Yehowa wamba. ‘Muele wa muntu yonso neutape muanabo.’” Nansha bingoma bia masashi anyi bia nikleere kabiakuambuluisha nansha kakese mu mvita eyi, bualu Yehowa udi wamba ne: “Meme nkayanyi nemmulumbuluishe ku disama dia tshiambu dishipianganyi ne ku mashi; nemmulokeshile, yeye ne biluilu biende ne bantu kabukabu bikala nende, mvula wa mienji mikole ne mabue manene a mvula, kapia ne sufre. Bushuwa, nendidiundishe ne nenditumbishishe, ne nendimanyishe ku mêsu kua matunga mavule; ne nebamanye bushuwa ne: meme ndi Yehowa.”—Yehezekele 38:21-23; 39:11; fuanyikija ne Yoshua 10:8-14; Balumbuluishi 7:19-22; 2 Kulondolola 20:15, 22-24; Yobo 38:22, 23.
Eu udi ubikidibua “Muena lulamatu ne Mulelela”
4. Mmushindu kayi udi Yone umvuija tshimuenekelu tshia Yezu Kristo mumane kudiakaja bua mvita?
4 Yehowa udi ubikila muele. Nnganyi udi utumika ne muele eu? Tupinganayi mu mukanda wa Buakabuluibua mutuapeta diandamuna mu tshikena-kumona tshikuabu tshia dikema. Diulu didi diunzuluka ku mêsu kua Yone bua disokolola bualu kampanda bua dikema—Yezu Kristo yeye muine mmudiakaje bua mvita! Yone udi utuambila ne: “Ne meme kumona diulu diunzulula, ne, monayi! kabalu katoke. Ne eu uvua mukabande pa mutu udi ubikidibua ne: Muena lulamatu ne Mulelela, ne udi ulumbuluisha ne uluangana mvita mu buakane. Mêsu ende adi bu ludimi lua kapia, ne pa mutu wende padi bikata bia lumu bivule.”—Buakabuluibua 19:11, 12a.
5, 6. Ntshinyi tshidi tshilejibue mu tshimfuanyi kudi (a) “kabalu katoke”? (b) dîna “Muena lulamatu ne Mulelela”? (c) mêsu bu “ludimi lua kapia”? (d) “bikata bia lumu bivule”?
5 Anu bu mu tshikena-kumona tshitukadi bapite tshivua tshileja bena tubalu banayi, “kabalu katoke” aka ntshimanyinu tshikumbanyine tshia mvita miakane. (Buakabuluibua 6:2) Ne nnganyi wa ku bana ba Nzambi udi muakane kupita Muluanganyi eu wa bukole? Bu mudiye ubikidibua ne: “Wa lulamatu ne Mulelela,” udi’anu “Ntemu wa lulamatu ne mulelela,” Yezu Kristo. (Buakabuluibua 3:14) Udi uluangana mvita eyi bua kukumbaja malumbuluisha makane a Yehowa. Nenku, udi utumika bu Mulumbuluishi muteka kudi Yehowa, bu “Nzambi wa bukole.” (Yeshayi 9:6) Mêsu ende adi bu “ludimi lua kapia,” adi akuatshisha buôwa, mmatangile ku dibutuka ditshilualua dia baluishi bende.
6 Bikata bia lumu bidi ku mutu wa Mukalenge-Muluanganyi eu. Nyama wa luonji uvua Yone mumone upatuka mu mbuu uvua ne bifulu bia bumfumu dikumi, bivua bileja dikokesha diende dia buloba bua tshitupa tshîpi. (Buakabuluibua 13:1) Kadi, Yezu udi yeye ne “bikata bia lumu bivule.” Bumfumu buende bua butumbi kabuena kufuanyikija, bualu yeye udi “Mukalenge wa badi bakokesha bu bakalenge ne Mfumu wa badi bakokesha bu bamfumu.”—1 Timote 6:15.
7. Yezu udi ne dîna kayi difunda?
7 Yone udi utungunuka ne kumvuija nunku: “Udi ne dîna difunda didi muntu nansha umue kayi mumanye, kadi, amu yeye nkayende.” (Buakabuluibua 19:12b) Bible ukadi mutele mêna a Muana wa Nzambi, bu mudi Yezu, Emanuele, Mikaele. Kadi, “dîna” edi dibubika ndimueneke ne: didi difunkuna muanzu wende ne midimu minene idiye ukumbaja mu dituku dia Mukalenge. (Fuanyikija ne Buakabuluibua 2:17.) Yeshayi, mu diakula diende bua Yezu bituadije mu 1914, udi wamba ne: “Nebamubikile mu dîna dia Mufidi wa mibelu wa dikema, Nzambi wa bukole, Tatu wa kashidi, Muana wa ditalala wa mukalenge.” (Yeshayi 9:6) Mupostolo Paulo wakasuikakaja dîna dia Yezu ku masanka ende a mudimu matambe bunene pakambaye ne: “Nzambi wakamubandisha [Yezu] pa muaba muzangame, ne kumupesha ku budisuile dîna didi ku mutu kua dîna dikuabu dionso, bua mu dîna dia Yezu binu bionso bitue panshi.”—Filipoi 2:9, 10.
8. Bua tshinyi anu Yezu nkayende ke udi mua kumanya dîna difunda, ne mbanganyi badiye wabanyangana nabo amue a ku masanka ende manene a mudimu?
8 Masanka manene a mudimu a Yezu ng’a pa buawu. Pa kumbusha Yehowa nkayende, anu Yezu ke udi mujingulule tshidi tshiumvuija kuikala ne muanzu mupite bunene. (Fuanyikija ne Matayi 11:27.) Pa nanku, ku bifukibua bionso bia Nzambi, anu Yezu nkayende ke udi mua kumanya mushinga mujima wa dîna edi. Nansha nanku, Yezu udi wabanyangana amue a ku masanka ende a mudimu ne mukajende. Ke bualu kayi udi wenza dilaya edi: “Mutshimunyi, . . . nemfunde pambidi pende . . . dîna dianyi adi dipiadipia”—Buakabuluibua 3:12.
9. Bidi bileja tshinyi (a) padi Yezu “muvuale tshilamba tshia pa mutu tshimiamina mashi”? (b) padi Yezu ubikidibua ne: “Dîyi dia Nzambi”?
9 Yone udi usakidila ne: “Ne mmuvuale tshilamba tshia pa mutu tshimiamina mashi, ne dîna didibo bamubikila didi Dîyi dia Nzambi.” (Buakabuluibua 19:13) Nga nganyi ‘mashi’ aa? Avua mua kuikala mashi akapongolola Yezu bua diakalenga dia bantu. (Buakabuluibua 1:5) Kadi, bilondeshile mvese idi kuulu ne kuinshi, adi amueneka bu asua kuleja mashi a bena lukuna bende, adi apongolodibua dîba didi malumbuluisha a Yehowa abakumbanyina. Ebi bidi bituvuluija tshikena-kumona tshishale tshivua tshitangila mvinyo wa pa buloba uvua munowa ne mudiatakaja mu tshikaminu tshinene tshia tshiji tshia Nzambi too ne pafikile mashi ku “mionji ya ku bibanga bia tubalu,”—bidi biumvuija ditshimuna dinene pa bena lukuna ba Nzambi. (Buakabuluibua 14:18-20) Bia muomumue, mashi mamiamina pa tshilamba tshia pa mutu tshidi Yezu muvuale adi ajadika ne: ditshimuna diende ndia nkomenu ne ndijima. (Fuanyikija ne Yeshayi 63:1-6.) Mpindieu, Yone udi wakula bua dîna dipesha Yezu. Bua musangu eu, ndîna didi dimanyike bikole—“Dîyi dia Nzambi”—bua kusunguluja Mukalenge-Muluanganyi eu bu Mutuadi-wa-dîyi dia Nzambi, Tshilobo muluidi wa bulelela.—Yone 1:1; Buakabuluibua 1:1.
Bena mvita pamue ne Yezu
10, 11. (a) Mmunyi mudi Yone uleja ne: Yezu kêna nkayende mu mvita? (b) Padi tubalu tuikale tutoke ne bena tubalu bavuale “bilamba bia lin mufinuke mutoke ne mukezuke” abi bidi biumvuija tshinyi? (c) Mbanganyi badi benza “biluilu” bia mu diulu?
10 Yezu kêna nkayende mu mvita eyi nansha. Yone udi utuambila ne: “Ne biluilu bivua mu diulu bivua bimulonda mu nyima pa tubalu tutoke, bivua bivuale bilamba bia lin mufinuke mutoke ne mukezuke.” (Buakabuluibua 19:14) Bu mudi tubalu “tutoke,” ebi bidi biumvuija ne: mmvita miakane. “Lin mufinuke” mmuakanyine bena tubalu ba Mukalenge, ne butoke buende ntshimanyinu tshia ngikadilu wa bukezuke ne wa buakane kumpala kua Yehowa. Mbanganyi badi benza “biluilu” ebi? Kabiyi mpata, mbienza ne banjelu bansantu. Ku ntuadijilu wa dituku dia Mukalenge, Mikaele ne banjelu bende bakipata Satana ne ba-demon bende mu diulu. (Buakabuluibua 12:7-9) Kabidi, “banjelu buonso” nebasadile Yezu udi musombe pa nkuasa wa bumfumu ne mutuadije kulumbuluisha matunga ne bantu ba pa buloba. (Matayi 25:31, 32) Bushuwa, mu mvita eyi ya nkomenu, muakumbajibua malumbuluisha a Nzambi mu mushindu wa kutuisha bionso ku ndekelu, Yezu neikale mutua mu nyima kudi banjelu bende.
11 Kadi, ki mbuobo nkayabo bikala badifile mu mvita eyi to. Mu mukenji wende mutumina tshisumbu tshia ku Tiatire, Yezu wakalaya ne: “Kudi eu udi utshimuna ne udi ulama bienzedi bianyi too ne ku nshikidilu, nemmupeshe bukokeshi pa matunga, ne neakokeshe bantu ne lukodi lua tshiamu, nunku, nebabozeke bu ngesu ya diima, anu bu mumvua panyi mubupete kudi Tatu wanyi.” (Buakabuluibua 2:26, 27) Kabiyi mpata, pakumbana tshikondo atshi, aba ba ku bana babo ne Yezu bikale bamane kuya mu diulu, nebalombole pabo bantu ne matunga ne lukodi lua tshiamu.
12. (a) Basadidi ba Nzambi pa buloba nebabuele pabo mu mvita ya Armagedon anyi? (b) Mmunyi mudi mvita ya Armagedon itangila tshisamba tshia Yehowa tshia pa buloba?
12 Kadi, basadidi ba Nzambi bikala apa pa buloba? Kasumba ka Yone kakakuditua mu mvita ya Armagedon nansha kakese; ke muikalabi kabidi bua benzejanganyi naku ba mudimu ba lulamatu, badi bafume mu matunga wonso ne bavue kupuila ku nzubu wa mu nyuma bua kutendelela Yehowa. Bantu aba bena ditalala mbamane kufula miele yabo ya mvita bayivuije tushola tua kukosa natu bilongo. (Yeshayi 2:2-4) Pabi, mvita eyi idi ibatangila kumpala kua bakuabu buonso! Anu bu mutukadi babimone, tshisamba tshia Yehowa tshidi tshimueneka bu tshibule dikubibua ke tshidibo baluisha ne lukinu kudi Gog ne musumba wende wonso. Muanda eu newikale bu kashiba kela bua Mukalenge-Muluanganyi wa Yehowa, mutua mu nyima kudi biluilu bia mu diulu, bua kubundula mvita ya dibutula matunga, kakuyi kushala dianyi. (Yehezekele 39:6, 7, 11; fuanyikija ne Danyele 11:44-12:1.) Bu babandidi, basadidi ba Nzambi bikala pa buloba nebatume ntema mikole ku mvita eyi. Armagedon neumvuije lupandu luabo, nebikale ne muoyo wa kashidi pa kuikala bantemu bakamona ne mêsu abo mvita minene ya dibingisha Yehowa.
13. Mmunyi mutudi bamanye se: Bantemu ba Yehowa kabatu batombokela mbulamatadi kayi wonso?
13 Ebi bidi biumvuija ne: Bantemu ba Yehowa batu batombokela mbulamatadi yonso anyi? Nansha kakese! Badi batumikila mubelu eu wa mupostolo Paulo: “Anyima yonso akokele bamfumu badi ku mutu.” Mbajingulule ne: mu bule bua tshikondo tshidi bulongolodi ebu ne bua kunenga, ‘bamfumu aba badi ku mutu’ nebikaleku ku dilekelela dia Nzambi bua kufila bulongame kampanda munkatshi mua bukua-bantu. Pa nanku, Bantemu ba Yehowa badi balambula bitadi, batumikila mikenji, balonda mêyi-maludiki a buendeshi mashinyi, belesha mêna ku mikanda kabukabu ya mbulamatadi ne bikuabu. (Lomo 13:1, 6, 7) Kabidi, badi balonda mêyi-maludiki a mu Bible pa kuikala bena bululame ne bambi ba bulelela; baleja dinanga bua bantu nabo; benji ba mêku adi ne buobumue munda muawu ne a nsombelu mulenga; balongeshi ba babo bana mua kuikala bena-muabo ba nsombelu wa tshitembu. Mushindu’eu badi bapingaja, ki ng’anu “bintu bia Kezare kudi Kezare, kadi, bia Nzambi kudi Nzambi.” (Luka 20:25; 1 Petelo 2:13-17) Bu mudi Dîyi dia Nzambi dijadika ne: mbulamatadi ya mu bulongolodi ebu idiku bua tshitupa tshîpi, Bantemu ba Yehowa badi badilongolola mpindieu bua nsombelu wa masanka a bushuwa, bua kuikala ne muoyo mulelela mu bukokeshi bua Bukalenge bua Kristo. (1 Timote 6:17-19) Nansha mudibo kabayi balombibue bua kutonkola makokeshi a mu bulongolodi ebu, Bantemu badi batshina ne kanemu malu adi Dîyi difunda ku spiritu wa Nzambi, Bible Munsantu, diamba pa bidi bitangila dilumbuluisha dikadi Yehowa pa kukumbaja ku Armagedon.—Yeshayi 26:20, 21; Ebelu 12:28, 29.
Batangile ku mvita ya ndekelu!
14. “Muele wa nkanza mule musakisha” udi upatuka mukana mua Yezu udi tshimfuanyi tshia tshinyi?
14 Yezu udi ujikija ditshimuna diende ne bukokeshi kayi? Yone udi utumanyisha ne: “Ne mukana muende mudi mupatuka muele wa nkanza mule musakisha bua kututa nawu matunga, ne neaalombole ne lukodi lua tshiamu.” (Buakabuluibua 19:15a) “Muele wa nkanza mule musakisha” udi uleja bukokeshi bupesha Yezu kudi Nzambi, bukokeshi budi bumupesha bukenji bua kutuma dîyi dia kushipa aba buonso badi babenga kutua Bukalenge bua Nzambi nyama ku mikolo. (Buakabuluibua 1:16; 2:16) Tshimfuanyi etshi tshia dikema tshidi mu diumvuangana ne mêyi aa a Yeshayi: “Yeye [Yehowa] wakaditua ku divuija mukana muanyi bu muele wa nkanza musakisha. Wakansokoka mu dileji dia tshianza tshiende. Ku kakese ku kakese wakamvuija muketa musongoloke.” (Yeshayi 49:2) Apa, Yeshayi uvua tshimfuanyi tshia Yezu, udi umanyisha malumbuluisha a Yehowa ne wakumbaja, amu bu ku diambuluisha dia muketa muludika bimpe.
15. Tshikondo atshi, nnganyi wikala mumane kusokolodibua ne kulumbuluishibua, ne pa nanku, ntshinyi tshikala tshimane kutuadija?
15 Dîba adi, Yezu neikale mumane kukumbaja miaku eyi ya mupostolo Paulo: “Ne pashishe mupetudi wa mikenji neasokolodibue, yeye wavua kujimijibua kudi Mukalenge Yezu ku spiritu wa mukana muende ne kumubutula ku dimanyishibua dia dikalaku diende.” Eyowa, dikalaku dia Yezu (mu tshiena-Greke: pa·rou·siʹa) diakamanyishibua patoke biangatshile ku 1914 pakatandudibua ne kulumbuluishibua muntu udi upetula mikenji, peshi bamfumu ba bukua-buena-nkristo. Dikalaku edi nedimanyishibue patoke mu mushindu wa dikema pikala nsengu dikumi ya nyama wa luonji wa dikala dikunze mikumbaje dilumbuluisha edi ne mibutule bukua-buena-nkristo, pamue ne bishadile bia Babilone Munene. (2 Tesalonike 2:1-3, 8) Ebi nebikale ntuadijilu wa dikenga dinene! Pashishe, Yezu neatangije ntema yende ku bishadile bia mu bulongolodi bua Satana, mu diumvuangana ne mulayi udi wamba ne: “Neikale ne bua kututa buloba ne lukodi lua mukana muende; ne ku spiritu wa mishiku yende neashipe muntu mubi.”—Yeshayi 11:4.
16. Mmunyi mudi mêyi a mu Misambu ne a mu Yelemiya umvuija mudimu wakumbajibua kudi Mukalenge-Muluanganyi muteka kudi Yehowa?
16 Mukalenge-Muluanganyi, bu mutekibue wa Yehowa, neasunguluje aba bapanduka ne aba bafua. Mu diakula diende mu mulayi kudi Muana wa Nzambi eu, Yehowa udi wamba ne: “Neubaboze [baludiki ba pa buloba] ne dikombo dia tshiamu, anu bu dibungu dia mufumbi neubazaze tupese.” Ne Yelemiya udi wambila bamfumu aba banyanguke ba mbulamatadi ne bantu babo ne: “Elayi mikunda, nuenu balami ba mikoko, elayi mbila! Bungulukayi mu buloba, nuenu banene ba tshisumbu tshia mikoko, bualu matuku enu akumbanyi bua kukoshibua muminu ne bua kutangalajibua kuenu, ne nenupone bu tshivuadi tshilengele!” Kadi, nansha bikala baludiki aba badileje bimpe mushindu kayi wonso ku mêsu kua bukua-bantu babi, mukumu umuepele wa dikombo edi dia tshiamu dia Bukalenge newubasunsule tupese, anu bu mutubo bazaza dibungu dilengele. Nebienzeke anu bu muakabimanyisha Davidi mu mulayi pa bidi bitangila Mukalenge Yezu ne: “Lukodi lua bukole buebe, Yehowa nealutume biangatshile ku Siyona, wamba ne: ‘Ndaku ukokesha munkatsni mua bena lukuna bebe.’ Yehowa yeye nkayende, ku dia balume diebe, neasunsule bushuwa bakalenge mu dituku dia tshiji tshiende. Neakumbaje dilumbuluisha munkatshi mua matunga; neakebeshe diuwula dia mushiki wa bitalu.”—Misambu 2:9, 12; 83:17, 18; 110:1, 2, 5, 6; Yelemiya 25:34.
17. (a) Mmunyi mudi Yone umvuija mudimu wa dibutula udi Mukalenge-Muluanganyi ukumbaja? (b) Tela imue milayi idi ileja ne: dituku dia tshiji tshia Nzambi nedikale tshipupu tshinene bua matunga.
17 Mukalenge-Muluanganyi eu wa bukole udi umueneka tshiakabidi mu muanda udi wenzeka pashishe mu tshikena-kumona: “Udi udiatakaja kabidi tshikaminu tshia mvinyo wa tshiji tshikole tshia Nzambi Wa-Bukole-Buonso.” (Buakabuluibua 19:15b) Mu tshikena-kumona tshishale, Yone ukavua mumone didiatakajibua dia “tshikaminu tshia tshiji tshia Nzambi.” (Buakabuluibua 14:18-20) Yeshayi pende udi wakula bua tshikaminu tshia kushipa natshi, ne baprofete bakuabu badi bakula bua mushindu wikala dituku dia tshiji tshia Nzambi ne bua kukebela matunga tshipupu tshipite bunene.—Yeshayi 24:1-6; 63:1-4; Yelemiya 25:30-33; Danyele 2:44; Sefanya 3:8; Zekaya 14:3, 12, 13; Buakabuluibua 6:15-17.
18. Muprofete Yoele udi usokolola tshinyi pa bidi bitangila dilumbuluisha dia matunga wonso kudi Yehowa?
18 Muprofete Yoele udi usuikakaja tshikaminu tshia mvinyo ku dilua dia Yehowa bua “kulumbuluisha matunga wonso adi ku mpenge.” Ne kabiyi mpata, Yehowa ke udi utumina Nzuji tshindondi wende Yezu ne kudi biluilu bia mu diulu dîyi dia ne: “Elayi muele musakisha wa kunowa nawu, bualu biakunowa biapi. Luayi, puekayi, bualu tshikaminu tshia mvinyo tshiuwudi tente. Milondo ikadi isapalala; bualu bubi buabu buatambi kuvulangana. Misumba, misumba idi mu tshibanda tshia dipangadika, bualu dituku dia Yehowa didi pabuipi mu tshibanda tshia dipangadika. Dîba ne ngondo biobi bine nebifikuluke bushuwa, ne mitoto mene kayakufila kabidi bukenke buayi. Biangatshile ku Siyona, Yehowa yeye nkayende neakungule, ne biangatshile ku Yeruzaleme dîyi diende nediumvuike. Bushuwa, diulu ne buloba nebizakale; kadi Yehowa neikale tshinyemenu bua tshisamba tshiende ne lumbu bua bana ba Izalele. Ne nuenu tshisamba, nenumanye ne: Ndi Yehowa, Nzambi wenu.”—Yoele 3:12-17.
19. (a) Mmushindu kayi wapeta lukonko lua mu 1 Petelo 4:17 diandamuna dialu? (b) Ndîna kayi didi difunda pa tshilamba tshia pa mutu tshia Yezu, ne bua tshinyi nedimueneke dikumbanyine?
19 Nebikale bushuwa dituku dia dilumbuluisha, bua matunga ne bantu bena bupidia, kadi ndituku dia disungidibua bua aba buonso bavua bavuije Yehowa ne Mukalenge-Muluanganyi wende tshinyemenu tshiabu! (2 Tesalonike 1:6-9) Dilumbuluisha diakatuadijila ku nzubu wa Nzambi mu 1918, nedikale difike ku nkomenu wadi, ne nedituale diandamuna ku lukonko luela mu 1 Petelo 4:17: “Nshikidilu neikale tshinyi bua aba badi kabayi batumikila lumu luimpe lua Nzambi?” Mutshimunyi wa butumbi neikale mudiatakaje tshikaminu tshia mvinyo too ne ku ndekelu, uleja patoke mudiye Muntu munene udi Yone wakula bualu buende ne: “Ne pa tshilamba tshiende tshia pa mutu, eyowa, pa tshibelu tshiende, udi ne dîna difunda: Mukalenge wa bakalenge ne Mfumu wa bamfumu.” (Buakabuluibua 19:16) Wadileji patoke mudiye muena bukole mupite ne kule muludiki kayi yonso pa buloba, kupita mukalenge peshi mfumu kayi yonso. Bukokeshi ne bunene biende bidi bikemesha. Wakaditua mu mvita pa kabalu “bua kuluila bulelela ne budipuekeshi ne buakane,” ne watshimunyi bua kashidi! (Musambu wa 45:4) Pa tshilamba tshiende tshimiamina mashi mbafundepu dîna dimupesha kudi Mukalenge Munene Yehowa, udi mumupeshe bukenji bua kusombuela dîna diende!
Didia dinene dia Dilolo dia Nzambi
20. Mmushindu kayi udi Yone umvuija “didia dinene dia dilolo dia Nzambi,” ne ebi bidi bivuluija mulayi kayi wa kale mufuanangane ne eu?
20 Mu tshikena-kumona tshia Yehezekele, kunyima kua dibutudibua dia misumba ya Gog, nyunyu ne nyama ya luonji bidi bibikidibua mu difesto kampanda! Bidi bijimija bitalu bidi bikuate muendi pa buloba bujima pa kudia misunyi ya bena lukuna ba Yehowa. (Yehezekele 39:11, 17-20) Miaku ya Yone idi ilonda eyi idi ituvuluija menemene mulayi eu wa kale: “Meme kumona kabidi muanjelu muimane mu dîba, ne wakela lubila ne dîyi dikole ne wambila nyunyu yonso idi ibuuka mu diulu ne: ‘Vuayi kuneku, disangishayi bua didia dinene dia dilolo dia Nzambi, bua kudia misunyi ya bakalenge ne misunyi ya tumanda tua basalayi ne misunyi ya bilobo ne misunyi ya tubalu ne ya aba badi basombe pa nyima patu, ne misunyi ya buonso, ya bantu badikadile ne ya bapika, bakese ne banene.’”—Buakabuluibua 19:17, 18.
21. Ntshinyi tshidi tshileja kudi (a) kuimana kudi muanjelu “muimane mu dîba”? (b) dilekelela dia bitalu panshi? (c) liste wa mêna a bitalu bidi bilekela panshi? (d) miaku eyi “didia dinene dia dilolo dia Nzambi”?
21 Muanjelu “mmuimane mu dîba,” muaba muimpe wa kuelela dîyi bua kukoka ntema ya nyunyu. Udi uyibikila bua kudilongololayi bua kudiukutshisha ne misunyi ya aba badi ne bua kushipibua kudi Mukalenge-Muluanganyi ne biluilu bia mu diulu. Dilekela dia bitalu pa buloba didi dileja ne: bantu aba nebafue mu bundu bunene. Anu bu Yezabele wa ku kale, kabakujiikibua mu lukita lua lumu to. (2 Bakalenge 9:36, 37) Mulongo wa mêna a bena bitalu bikala bilekelela pa buloba udi uleja bualabale bua kabutu: bakalenge, tumanda tua basalayi, bilobo, bantu badikadile ne bapika. Kakuena udi ushala. Kakuakushala muntu nansha umue ku bena mu bulongolodi ebu bantomboji badi baluisha Yehowa. Kunyima kua bionso ebi, mbuu musaluke wa bantu bena bimvundu ne balubakanyi neikale mujimine. (Buakabuluibua 21:1) Edi didi “didia dinene dia Nzambi, didia diende dia dilolo,” bualu Yehowa ke udi ubikila nyunyu ku difesto edi.
22. Mmushindu kayi udi Yone umvuija mu mêyi makese mvita ya nkomenu?
22 Yone udi umvuija mvita eyi ya kashikija mu mêyi makese aa: “Ne meme kumona nyama wa luonji ne bakalenge ba pa buloba ne biluilu biabo, basangishibue bua kuluisha eu uvua musombe pa kabalu ne tshiluilu tshiende. Ne nyama wa luonji wakakuatshibua, yeye ne muprofete wa dishima uvua wenza bimanyinu kumpala kuende bivuaye upambuisha nabi aba bavua bapeta tshimanyinu tshia nyama wa luonji ne aba badi batendelela tshimfuanyi tshiende. Batshikale ne muoyo, bakakupibua buonso babidi mu dijiba dia kapia kavua kalaluka ne sufre. Kadi bashadile bakashipibua ne muele mule wa nkanza wa eu uvua musombe pa kabalu, muele uvua upatuka mukana muende. Ne nyunyu yonso yakuukuta ne misunyi yabu.”—Buakabuluibua 19:19-21.
23. (a) Mmu ngumvuilu kayi mudi “mvita ya dituku dinene dia Nzambi Wa-Bukole-Buonso” yiluanganyibua ku “Armagedon”? (b) Ndidimuija kayi didi “bakalenge ba pa buloba” babenga kuangata ne mushinga, ne mbipeta kayi bidibo bapeta ku ngenzelu wabo eu?
23 Kunyima kua diupumuna lupanza luisambombo lua tshiji tshia Yehowa, Yone udi umanyisha muvua “bakalenge ba pa buloba bujima” basangishibue ku kampanye ka ba-demon bua “mvita ya dituku dinene dia Nzambi Wa-Bukole-Buonso.” Idi yenzeka ku Armagedon—udi kawuyi muaba muena-dîna, kadi nnsombelu wa pa buloba bujima wafikisha ku dikumbana dia dilumbuluisha dia Yehowa. (Buakabuluibua 16:12, 14, 16, Mukanda wa Nzambi) Mpindieu, Yone udi umona milongo ya bena mvita. Bimane kuaka, basangishibue bua kuluisha Nzambi, buonso buabu badi “bakalenge ba pa buloba ne biluilu biabo.” Ne mutshima mupape, bakabenga bua kukokela Mukalenge wa Yehowa. Yeye wakabadimuija ku mukenji mufunda ku spiritu wa Nzambi ne: “Tuayi muana mishiku bua Yeye [Yehowa] kavu kukuata tshiji tshikole ne kanuvu kujimina mu njila.” Bu mudibo kabayi bakokele bukokeshi bua Kristo, badi ne bua kufua.—Musambu 2:12.
24. (a) Ndilumbuluisha kayi didi dikumbajibua pa nyama wa luonji ne muprofete wa dishima, ne mmu ngumvuilu kayi “mutshidibo ne muoyo”? (b) Bua tshinyi “dijiba dia kapia” didi ne bua kuikala tshintu tshiangata mu tshimfuanyi?
24 Nyama wa luonji wa mitu muanda-mutekete, ne nsengu dikumi, udi upatuka mu mbuu udi tshimfuanyi tshia bulongolodi bua tshididi bua Satana udi ubuejibua mu nsombelu udibo bamupua muoyo kashidi, ne pamue nende muprofete wa dishima peshi bukokeshi bua muanda-mutekete bua pa buloba bujima. (Buakabuluibua 13:1, 11-13; 16:13) “Batshikale ne muoyo,” peshi batshitungunuka ne kutumika pa kuluisha tshiapamue tshisamba tshia Nzambi pa buloba, badi bedibua mu “dijiba dia kapia.” Ndijiba dia kapia diena-dîna anyi? Nansha kakese, anu bu mudi nyama wa luonji muine ne muprofete wa dishima kabiyi nyama miena-dîna. Kadi, ntshimfuanyi tshia kabutu kajima ne ka kashidi, muaba udibo baya, kakuyi dialukila. Muine emu ke muedibua pashishe lufu ne Hades, ne Diabolo yeye muine. (Buakabuluibua 20:10, 14) Bushuwa, dijiba edi kadiena diumvuija inferno wa makenga a kashidi bua bantu babi, bualu lungenyi luine lua muaba wa mushindu’eu ludi tshintu tshitambe kukinyibua kudi Yehowa.—Yelemiya 19:5; 32:35; 1 Yone 4:8, 16.
25. (a) Mbanganyi badi “bashipibue ku muele wa mvita mule wa nkanza wa eu udi musombe pa kabalu”? (b) “Bashipibue” nebabiishibue ku lufu anyi?
25 Bakuabu buonso bavua kabayi bena mu mbulamatadi kampanda kadi bavua banyanguke bikale tshitupa katshiyi mua kushintuluka tshia mu bulongolodi ebu bubipe mushindu wa muomumue, “bakashipibua ku muele mule wa nkanza wa eu udi musombe pa kabalu.” Yezu neamanyishe tshibawu tshibafundila tshia lufu. Bu mudibo kabayi bakule bua dijiba dia kapia pa bidi bibatangila, ebi bidi biumvuija se: nebabiishibue ku lufu anyi? Muaba nansha umue ki mbafunde ne: aba buonso bikala Nzuji wa Yehowa mushipe tshikondo atshi nebabiishibue ku lufu. Anu muvua Yezu mubiambe yeye nkayende, aba buonso badi kabayi “mikoko” badi baya “mu kapia ka kashidi kalongoluela Diabolo ne banjelu bende,” ke “kabutu ka kashidi.” (Matayi 25:33, 41, 46) Ke mudi “dituku dia dilumbuluisha ne dia dibutudibua dia bantu babi” ditua ku tshibungubungu.—2 Petelo 3:7; Nahuma 1:2, 7-9; Malaki 4:1.
26. Umvuija mu mêyi makese bipeta bia Armagedon.
26 Ke mushindu udi bulongolodi bua pa buloba bua Satana bujimina. “Diulu dia kale” anyi bukokeshi bua tshididi buajiminyi. “Buloba” anyi bulongolodi budi bumueneka ku mêsu bu butshidiku bua musangu mule bufuimba kudi Satana mu kupita kua siekele mivule, mbubutudibue buonso mpindieu. “Mbuu” anyi musumba munenanenayi wa bantu babi batombokedi ba Yehowa, katshienaku kabidi to. (Buakabuluibua 21:1; 2 Petelo 3:10) Kadi, Yehowa neenzele Satana muine tshinyi? Yone ukadi pa kutuambila mpindieu.