TUIKALAYI NE NSOMBELU WA BUENA KRISTO

Mmalu kayi audi mua kulongela kudi bena Kristo bapiluke?

Mu bisumbu bietu tudi ne bana betu ba balume ne ba bakaji badi benzele Yehowa mudimu kukadi bidimu bia bungi. Mushindu uvuabu beyemena Yehowa udi mua kutulongesha malu a bungi. Tudi mua kubebeja bua batulondele malu a bulongolodi bua Yehowa, ne mushindu uvua Yehowa mubambuluishe bua kutantamena ntatu mu mudimu wende. Tudi mua kubikila nansha umue wa kudibu mu ntendelelu wetu wa mu dîku bua atulondele malu au.

Biwikale muena Kristo ukadi ne bidimu bia bungi mu bulongolodi, ikala ulondela bansonga malu audi mupete mu mudimu wa Yehowa. Yakoba ne Jozefe bakalondela ndelanganyi yabu malu avua Yehowa mubenzele. (Gen 48:21, 22; 50:24, 25) Panyima pa bidimu, Yehowa wakambila bamfumu ba mêku bua bikale balondela bana babu bienzedi biende bia bukole. (Dut 4:9, 10; Mis 78:4-7) Matuku etu aa, baledi ne bena Kristo bakuabu badi mua kulondela bena Kristo nabu ba mu bipungu bidi bilua malu a kukema adi Yehowa muenze mu bulongolodi buende.

NUTANGILE FILME WA BAKALAMA BUOBUMUE NANSHA MUVUABU BAKANDIKE MUDIMU WABU, PASHISHE NUANDAMUNE NKONKO EYI:

Mmunyi muvua biro bia Betele bia mu Autriche biambuluishe bana betu mu matunga avuabu bakandike mudimu wetu?
Ntshinyi tshivua bana betu ba mu matunga au benze bua kulama ditabuja diabu dikole?
Ntshinyi tshivua tshienze bua bana betu ba mu Roumanie batapuluke ne bulongolodi bua Yehowa? Kadi mmunyi muakapinganabu kabidi mu buobumue?
Malu aa adi akolesha ditabuja diebe mushindu kayi?

Foto milamakaja: Foto ya mu filme wa ‘Bakalama buobumue nansha muvuabu bakandike mudimu wabu.’ 1. Karte kadi kaleja mu matunga muvuabu bakandike midimu yetu ku Mputu wa ku Est. 2. A Mashinyi a kale avuabu bapatula nawu mabeji. 3. Bana betu ba mu Roumanie belangana mu tshitupa. — Lomba bana betu bakadi bakulakaje bakulondele malu akolesha ditabuja diebe mudi Yehowa!