“Kanudisangishi ne bantu badi kabayi bena kuitabuja”

ANU bu muudi umona muaba eu, kamelo ne ngombe kabiena mua kudima pamue bikumbanangana to. Mutshi wa tshikokedi (utu muenza bua nyama ibidi ya bunene bumue ne bukole bua mumue) udi mubisuikakaje pamue udi ukengesha nyama eyi yonso ibidi bikole. Nzambi wakambila bena Isalele pa bidi bitangila nyama idi yenza mudimu eu ne: “Kanusuiki ngombe ne mpunda ku mutshi wa tshikokedi umue.” (Dutelonome 22:10) Bidi kabidi bia muomumue bua ngombe ne kamelo.

Bua kuamba bimpe, tshidime kêna mua kuenzela nyama yende tshintu tshibi tshia mushindu eu to. Kadi yeye kayi ne ngombe ibidi, udi mua kusuikakaja nyama ibidi idiye nayi. Bidi bimueka se: ke tshidi tshidime wa mu bidimu bia 1800 udi mu tshindidimbi etshi muenze. Bua dishilangana ku bunene ne bukole, nyama udi ne bukole bushadile udi utata bua kuenda pamue ne udi ne makanda a bungi, ne udi ne bukole bua bungi udi utata padiye ukoka nyama udi mukese.

Mupostolo Paulo wakangata tshilejilu tshia disuika nyama idi mishilangane pamue bua kutulongesha bualu kampanda bua mushinga. Wakafunda ne: “Kanudisangishi ne bantu badi kabayi bena kuitabuja: bualu bua didisanga dia nanku kadiena dinukumbanyina. Bualu bua, tshiakane tshidi mua kumvuangana ne tshibi munyi? Dinkenka didi mua kudisanga ne midima munyi?” (2 Kolinto 6:14, Muanda Mulenga Lelu) Mmunyi mudi muena Kristo mua kudisangisha mushindu udi kauyi mukumbanyine?

Umue mushindu ng’wa diselangana ne muntu udi kayi muena Kristo. Dibaka dia nunku ki ndimpe bua buonso buabu nansha, bualu kabakuikala bumvuangana pa malu a nshindamenu to.

Pakabanjija Yehowa dibaka dia nzanzanza, wakapesha mukaji mudimu wa ‘mukuatshishi.’ (Genese 2:18) Bia muomumue kabidi, ku butuangaji bua muprofete Malaki, Nzambi wakabikila mukaji ne: ‘Muenzejanganyi nebe wa mudimu.’ (Malaki 2:14, NW) Mufuki wetu mmusue ne: bantu badi baselangane bikale ne bipatshila bia mu nyuma bia muomumue, bikale bambuishangana majitu ne bapeta masanka a mushindu umue.

Padi muena Kristo usela ‘anu mu mukalenge,’ udi uleja mudiye witaba mubelu wa Tatu wetu wa mu diulu. (1 Kolinto 7:39) Ke tshishimikidi tshia dibaka dishindame, didi dipa Nzambi lumu ne bunême padi eku bena dibaka bamusadila bu ‘benzejanganyi nende ba mudimu’ mu mushindu wa pa buawu.​—Filipoi 4:3.

Udi musue balue kukutangila anyi?

Nansha mudi malu manyanguke lelu, udi mua kupeta disanka didi difumina ku dimanya dijalame didi Bible ufila pa bidi bitangila Nzambi, Bukalenge buende ne malu malenga adiye mulongoluele bantu. Biwikala musue kumanya malu makuabu anyi musue balue kukutangila bua kulonga nebe Bible kuyi ufuta mfranga, udi mua kuebeja Bantemu ba muaba uudi peshi kufundila Association “Les Témoins de Jéhovah”, B.P. 634 Limete, Kinshasa, République démocratique du Congo.