Mbanganyi badi balunda bebe mu site ya dipetelangana ne bantu ku Enternete?

Mulunda mmuntu udi “mulamate mukuabu bua dinanga anyi bualu udi umuangata ne mushinga.” Tshilejilu, Yonatana ne Davidi bakabanga bulunda bushême Davidi mumane kushipa Goleyata. (1Sm 18:1) Yonso wa kudibu uvua uleja ngikadilu ivua yenza ne: eu ikale anu mulunda wa mukuabu. Ke bualu kayi, bulunda bukole mbushindamene pa dimanya dijalame. Bua kufika ku dimanya muntu, bitu bilomba dîba ne kudienzeja. Kadi mu site ya dipetelangana ne bantu ku Enternete, mbipepele bua bantu kudia bibulundalunda, bualu nebibalombe anu bua kutua kaba kampanda patupu. Bu mudi bantu badi babuela miaba ya dipetelangana ku Enternete balongolola bimpe menemene tshia kuamba ne bela meji a tshiamba bakuabu bua bualu buabu, mbipepele bua bobu kusokoka tshidibu menemene. Nunku, mbimpe kuditekela mikalu bua bantu badi ne bua kuikala balunda bebe. Muntu uudi kuyi mumanye yeye ukulomba bua nushale balunda, kumvu bibi bua kulengulula dilomba diende adi anyi kudibenga wela meji ne: nebimutape ku muoyo to. Bua njiwu idi mua kumueneka, bamue kabatshiena babuela miaba ya dipetelangana ku Enternete to. Kadi wewe musue kuikala kubuela miaba ayi, ntshinyi tshiudi ne bua kulama mu meji?

NUTANGILE FILME WA IKALA NE MEJI PAUDI MU SITE WA DIPETELANGANA NE BANTU KU ENTERNETE, PASHISHE NUANDAMUNE NKONKO EYI:

• 

  Ntshinyi tshiudi ne bua kukonkonona kumpala kua kufunda malu ku Enternete anyi kuelaku foto?

• 

  Bua tshinyi udi ne bua kusungula bimpe bimpe bantu badi ne bua kuikala balunda bebe mu site ya dipetelangana ne bantu ku Enternete?

• 

  Bua tshinyi mbimpe udikosele dîba diudi ne bua kupitshisha mu site ya dipetelangana ne bantu ku Enternete?​—Ef 5:15, 16