Bivua ne bua kuikala bitonde bantu bakaji aba bua muvuabu basangane mu lukita mumueneka muputu! Mariya wa ku Magadala wakaya lubilu kudi “Simona Petelo ne muyidi mukuabu uvua Yezu munange bikole,” mmumue ne: mupostolo Yone. (Yone 20:2) Kadi bantu bakaji bakuabu bavua bashale ku lukita bakamona muanjelu. Mu lukita lua tshivulukilu alu muvua muanjelu mukuabu, uvua “muvuale muzabi mutoke.”​—Mâko 16:5.

Umue wa ku banjelu wakabambila ne: “Kanutshinyi to, bualu ndi mumanye ne: nudi nukeba Yezu uvuabu bashipele ku mutshi. Kena muaba eu to, bualu ukadi mujudibue, anu bu muvuaye muambe. Luayi numone muaba uvuaye mulale. Nanku, ndayi lukasa, nuambile bayidi bende ne: ukadi mujudibue ku lufu, bualu monayi! udi udianjila kumpala kuenu mu Galela.” (Matayi 28:5-7) Nunku bantu bakaji aba bakanyema “benda bazakala ne bapampakana bikole,” bua kuya kuambila bayidi.​—Mâko 16:8.

Nunku, Mariya udi usangana Petelo ne Yone. Wakabambila wenda upuyakane bikole ne: “Mbumbushe Mukalenge mu lukita, katuena bamanye kudibu bamuteke to.” (Yone 20:2) Petelo ne Yone bakasa lubilu. Yone uvua ne lubilu lua bungi kufikaye ku lukita kumpala. Wakinangilamu, kumonaye bilamba, kadi muimanyine pambelu.

Pakafika Petelo wakabuela diakamue. Wakamona bilamba bia line ne tshilamba tshivuabu bajingile Yezu ku mutu. Yone wakabuela, kuitabaye tshivua Mariya muambe. Nansha muvua Yezu mudianjile kuamba ne: neabishibue, muntu nansha umue wa kudibu kavua mumvue ne: mmubishibue to. (Matayi 16:21) Bakaya kumbelu ne dipampakana dikole. Kadi Mariya uvua mupingane ku lukita wakashalaku.

Tshikondo atshi, bantu bakaji bakuabu bavua mu njila bua kuya kuambila bayidi ne: Yezu ukavua mubishibue. Patshivuabu benda banyema, bakatuilangana ne Yezu, yeye kubambila ne: “Muoyo wenu au!” Bakadikupa ku makasa ende ne “kumunemekelabu.” Pashishe Yezu wakamba ne: “Kanutshinyi to! Ndayi, nuambile bana betu lumu elu bua bamone mua kuya ku Galela, nebammuenenaku.”​—Matayi 28:9, 10.

Katupa kakese kumpala, pavua buloba bukanke ne banjelu bamueneke, basalayi bavua ku lukita “bakazakala, kuluabu anu bu bafue.” Pakajukabu bakaya mu tshimenga “kuambilabu bamfumu ba bakuidi malu onso avua menzeke.” Ke bakuidi kutuilangana ne bakulu ba bena Yuda. Bakangata dipangadika dia kukosa basalayi mishiku bua basokoke tshilumbu etshi ne bambe ne: “Bayidi bende bavua balue butuku, bamuibe patuvua balale.”​—Matayi 28:4, 11, 13.

Bavua mua kushipa basalayi bena Lomo bobu balale tulu ku mudimu wabu, ke bakuidi kubalayabu ne: “Bualu ebu [dishima dia muvuabu balale] buobu bufike ku matshi a nguvena, netumumvuije tshilumbu etshi ne kanuakuikala ne bualu bua kuditatshishila to.” (Matayi 28:14) Basalayi bakitaba mishiku, kuenzabu tshivua bakuidi babambile. Nunku lumu lua dishima lua ne: mbibe tshitalu tshia Yezu luakatangalaka bikole mu bena Yuda.

Mariya wa ku Magadala utshivua yeye ku lukita udila. Wakinangila mu lukita, kumonaye banjelu babidi bavuale bilamba bitoke! Umue musombe ku mutu muaba uvuabu bateke mubidi wa Yezu, mukuabu muaba uvua mikolo. Bakamuebeja ne: “Mukaji, udi udila bua tshinyi?” Mariya wakabandamuna ne: “Mbumbushe Mukalenge wanyi, tshiena mumanye kudibu bamuteke to.” Padi Mariya ukudimuka udi umona muntu mukuabu. Muntu au mumane kuambulula lukonko lua banjelu, wakasakidila ne: “Udi ukeba nganyi?” Bu muvua Mariya wela meji ne: mmuena mudimu wa mu budimi abu, wakamba ne: “Mukalenge, biwikala mumumbushe, ngambilaku muaba uudi mumuteke, nemmuangate.”​—Yone 20:13-15.

Mu bulelela, Mariya uvua wakula ne Yezu ukavuabu babishe ku lufu, kadi musangu au kavua mumujingulule to. Kadi padiye umubikila ne: “Mariya!” udi umanya ne: n’Yezu, uvuluka muvuaye uyukila nende pa tshibidilu. Mariya wakandamuna ne disanka dionso ne: “Laboni!” (muaku udi umvuija “Mulongeshi!”) Bu muvuaye mumanye ne: Yezu ukavua pa kuya mu diulu, Mariya wakamukuata. Kadi Yezu wakamuambila ne: “Lekela kunkuata, bualu tshiena muanji kubanda kudi Tatu to. Kadi ndaku kudi bana betu, ubambile ne: ‘Ndi mbanda kudi Tatu wanyi ne Tatu wenu, kudi Nzambi wanyi ne Nzambi wenu.’”​—Yone 20:16, 17.

Mariya wakanyema kuyaye muaba uvua bapostolo ne bayidi bakuabu badisangishe. Kubambilaye ne: “Ndi mumone Mukalenge!” Yeye kusakidila malu makuabu ku akavua bakaji bakuabu babambile. (Yone 20:18) Kadi mêyi aa ‘akamueneka kudibu bu a tshianana.’​—Luka 24:11.

Mu Dia lumingu dia 16 ngondo wa Nisana, bayidi mbatshioke mu lungenyi. Kabavua bumvue bua tshinyi mu lukita muvua mutupu to. (Matayi 28:9, 10; Luka 24:11) Dituku dimane kuya, Keleopa ne muyidi mukuabu badi bumbuka mu Yelushalema baya batangile ku Emause, uvua ntanta wa kilometre 11.

Padibu benda baya, badi benda bayikila bua tshivua tshienzeke. Pashishe muenyi kampanda wakabapeta. Kubebejaye ne: “Mmalu kayi anudi nuenda nuya nuenda nuyukila au?” Keleopa udi wandamuna ne: “Wewe udi muenyi udi musombe pa nkayebe mu Yelushalema, kuyi mumanye malu adi menzekamu mu matuku aa anyi?” Muenyi udi umuebeja ne: “Mmalu kayi?”​—Luka 24:17-19.

Badi bamba ne: “Malu adi atangila Yezu muena Nazaleta, tuvua batekemene ne: muntu au ke uvua ne bua kupikula Isalele.”​—Luka 24:19-21.

Keleopa ne mulunda wende bakatungunuka ne kuakula bua malu avua menzeke dituku adi. Bakamba ne: bamue bantu bakaji bavua baye ku lukita luvuabu bajiike Yezu bavua balusangane munda mutupu, ne bantu bakaji abu bavua bamone bualu budi bukemesha bua muvua banjelu babamuenekele bamba ne: Yezu ukadi ne muoyo. Bakamba kabidi ne: bantu bakuabu bakaya ku lukita ne “kusanganabu malu anu muvua bakaji abu bambe.”​—Luka 24:24.

Bayidi babidi aba kabavua bushuwa bumvue bimpe malu avua menzeke to. Ke muenyi eu kuakaja ngelelu wabu wa meji mubi uvua unyanga mioyo yabu ne bukokeshi buonso wamba ne: “Nuenu bantu badi kabayi ne lungenyi, badi ne lujoko mu muoyo bua kuitaba malu onso adi baprofete bambe! Kabivuaku bikengela bua Kristo kukenga ne malu aa bua kubuelaye mu butumbi buende anyi?” (Luka 24:25, 26) Wakatungunuka ne kubumvuija mvese ya bungi ya mu Mifundu ivua yakula bua Kristo.

Ndekelu wa bionso bantu basatu aba bakafika pabuipi ne Emause. Bu muvua bayidi babidi aba bajinga kumvua malu makuabu, bakasengelela muenyi eu bamba ne: “Shala netu, bualu tukadi anu mene dilolo ne dituku dikadi diamba kujika.” Wakitaba bua kushala nabu ne bakadia. Bu muvua muenyi eu muenze disambila, mutshibule diampa, ne mubapeshadi, bakamumanya, kadi pashishe wakajimina. (Luka 24:29-31) Mpindieu mbashindike ne: Yezu udi ne muoyo.

Bayidi babidi aba bakakula ne disanka bua malu avuabu bamone bamba ne: “Mioyo yetu kayivua itema munda muetu pavuaye wakula netu mu njila, pavuaye utubuluila bimpe Mifundu anyi?” (Luka 24:32) Bakapingana ne lukasa ku Yelushalema, kusanganabu bapostolo bikale ne bantu bakuabu. Kumpala kua Keleopa ne mulunda wende kubambila tshivua tshienzeke, bakumvua bantu bakuabu bamba ne: “Mu bulelela, Mukalenge mmujudibue, uvua mumuenekele Simona!” (Luka 24:34) Pashishe bantu babidi aba bakalonda muvua Yezu mubamuenekele. Bushuwa bobu pabu bavua badimuene bualu abu.

Yezu udi ubamuenekela mu nzubu, ne mpindieu bonso badi bapampakana! Bualu ebu buvua bubapitshile bualu bavua bakange tshiibi ne bikuvu bu muvuabu batshina bena Yuda. Kadi Yezu udi wimana diakamue munkatshi muabu. Kubambilaye ne lutulu luonso ne: “Ditalala dikale nenu.” Kadi bavua ne buôwa. Anu muvuabu benze kumpala, “bakela meji ne: bavua bamona nyuma kampanda.”​—Luka 24:36, 37; Matayi 14:25-27.

Bua Yezu kubajadikila ne: kavua tshilengulengu anyi tshintu kampanda tshivuabu belela meji, kadi bu muvuaye ne mubidi wa buntu, wakabaleja bianza biende ne makasa ende wamba ne: “Bua tshinyi nudi nupampakana? Bua tshinyi dielakana ndijuke mu mioyo yenu? Tangilayi bianza bianyi ne makasa anyi, ne: mmeme; ndengayi, numone, bualu nyuma katu ne munyinyi ne mifuba bu binudi nummona nabi to.” (Luka 24:36-39) Bakasanka bikole ne kukemabu, kadi batshivua anu belakana bua kuitaba.

Bu muvuaye musue kabidi bua kubambuluisha bua bajadike ne: mmuntu mulelela, wakabebeja ne: “Nudi ne tshintu tshia kudia muaba au anyi?” Wakitaba mushipa muosha ne kuwudiaye. Pashishe kuambaye ne: “Aa mmêyi amvua nnuambila pantshivua nenu [kumpala kua lufu luanyi], ne: malu onso avuabu bafunde bua bualu buanyi mu Mikenji ya Mose, mu mifundu ya Baprofete ne mu Misambu adi ne bua kukumbana.”​—Luka 24:41-44.

Yezu wakambuluisha Keleopa ne muena diende bua kumvua Mifundu, mpindieu udi wenza nunku bua bantu bonso badi muaba au wamba ne: “Bakafunda nunku: Kristo uvua ne bua kukenga, ne kujuka ku lufu dituku disatu, ne bavua ne bua kuyisha mu bisamba bionso dinyingalala bua mpekatu bua difuidibua luse bua mpekatu mu dîna diende, kubangila mu Yelushalema. Nudi ne bua kuikala bantemu ba malu aa.”​—Luka 24:46-48.

Mupostolo Tomase kavuaku to bua kabingila kampanda. Mu matuku akalonda, bantu bakuabu bakamuambila ne disanka ne: “Tudi bamone Mukalenge!” Tomase wakabandamuna ne: “Meme tshiyi mumone bimanyinu bia misonso mu bianza biende, tshiyi mubueje munu wanyi mu bimanyinu bia misonso abi ne tshiyi mubueje tshianza tshianyi mu lubadi luende, tshiakuitabuja nansha kakese.”​—Yone 20:25.

Matuku muanda mukulu pashishe, bayidi bavua badisangishe kabidi muaba kampanda bakanga bibi, kadi musangu eu Tomase uvuaku. Yezu udi ubapatukila munkatshi muabu ne muikale ne mubidi wetu wa mashi ne mâyi eu, udi ubela muoyo wamba ne: “Ditalala dikale nenu.” Yezu udi utangila Tomase umuambila ne: “Ela munu webe muaba eu, tangila bianza bianyi, angata tshianza tshiebe, tshibueja mu lubadi luanyi, ne lekela mpata, kadi itabuja.” Tomase wakakema wamba ne: “Mukalenge wanyi ne Nzambi wanyi!” (Yone 20:26-28) Bushuwa mpindieu Tomasa mmutuishibue ne: Yezu udi ne muoyo bu muleji mpala wa Yehowa Nzambi.

Yezu udi wamba ne: “Udi muitabuje bualu udi mummone anyi? Ba diakalenga mbadi bitabuja nansha kabayi bamone.”​—Yone 20:29.